De anda o Marzo katar o 2020, e Organización Mundial de la Salud phendias ke sam ande iek pandemia pala o COVID-19, chi zhanasas ke sas te nakhel iek borsh ai nas te getol. Pala kacha pandemia millonuria manush ai vi le marturia le Jehovaske nasuaile, nekezhime le ai nai len so trobun len te train. So kerde le Marturia te azhutin ka peske phral?

 O Cómite de Coordinadores katar le Phral kai Ningeren amen lashardias 950 grupuria te azhutin le phralen ande pandemia pe sa e lumia. Kakala grupuria lasharde e buki te azhutin le phralen ande pengo foro ai vi ande mai but riga. Ande aver, le Marturia line so denas le amperetsii te azhutin kal manush.

 Pal viesti kai denpe ando Paraguay, zhanas ke le manush kotsar nai len but te jan pala e pandemia. Numa o grupo katar le phral kai azhutin ando Paraguay, gata dine sas so trobul ka iek familia shtare zhenengi te train pe dui kurke. Kakala prame te jan ai te vuzharen mon 30 dolaria.

 So keren le phral kai azhutin te arakhenpe katar o COVID-19 ai te arakhen le kolavren? Von usharaven pengo mui ai thonpe dur iek avrestar kana keren buki ai ningeren le prame. Sa le manush kai keren buki lentsa arakhenpe gadia. Le phral len sama te aven vuzhe le matori, kai keren buki ai kai garaven le prame.

 Ando enero katar o 2021, o Cómite de Coordinadores dikhlias mishto te usin pe 25 millonuria dolaria te azhutin kal phral kai kinuin pala o COVID-19. Suako Betel ai suako grupo kai azhutil dikhel mishto sar trobul te usinpe le love kai das amendar ai roden te kinen le prame kai trobunpe mai lesni. Gadia sas ando Chile, le phral kamenas te kinen 750 kiluria lenteji, numa ande iek shon kuchile defial zurales ai le phral lasharde te kinen len gadia de kuchi. Nakhle dui chasuria, ai iek manush dias palpale le lenteji kai kindias. Atunchi kon bikinelas len, kamlias te bikinel len amare phralenge, mai lesni, sar molas de iek shon palpale!

 Kana le phral gele pala lende, o manush chi mai kamelas te bikinel len. Ke phendias ke amare phral nas chachimasa kana denas so perelas suakoneske. Kana ashundias godo iek anda amare phral rhugisardias ka o Jehova ai polme phendias le manusheske ke von pushle kas trobun len vareso chachimasa. Ai ke sar sa le famili nai iek fialo, lasharen le gone le pramentsa kai trobun len suako anda lende. Mai phendias leske ke sa so keras le marturia le Jehovaske chi keras les pala le love, keras les ilesa. Sa godo plachaias les but. Ai na numa bikindias lesni le lenteji kai trobunas len, mai dias len 400 kiluria lenteji ivia te ningeren len kana amboldena te kinen.

 E Lusu si iek phei phivli kai beshel peska familiasa ando Liberia. De diminiatsi kana penas chaio ai chitonas o texto katar godo gies, o nepotutso dias po gor ke ma nas len jabe ai phendias ka peski mami: “Mamio, akana so si te jas?”. Voi phendias leske ke gata rhugisardias ka o Jehova ai manglias lestar te azhutil len ai ke chachimasa o Del sas te del len so trobun len. Mai anglal te perel o kham, le phral kai chidenpe lasa akharde la te zhal te rodel jabe. Voi mothol amenge: “Akana murho nepoto zhanel ke o Jehova ashunel amen ai ke dias anglal ka murho rhugimos”.

 Ande República Democrática del Congo beshel iek zhuvli kai dikhlias sar ningerenas jabe ka uni Marturia kai beshen pasha late. Voi phendias: “Kana getola kacha pandemia si te kerdiuvau marturo le Jehovasko ke von len sama katar peske phral ande kakala vriemi phare”. Lako rhom pushlias latar: “ Si te kerdios marturo le Jehovasko numa pala iek pachika pirincho?”. Voi phendias leske: “No, nai pala godo, numa godia pachika pirincho sikadias ke von kamenpe chachimasa”.

 Pala so den tumendar, le Marturia shai azhutin ande fuga amare phralen ande kacha pandemia. Naisis ilesa pala so den tumendar ando donate.pr418.com.