Ando borsh 2020 sas but bedi pe phuv ai avili e pandemia anda o COVID-19. So kerde le marturia le Jehovaske te azhutin godole manushen kai kinuisarde pala kakala prame?

 Ande amaro borsh 2020 kai keras buki, a o Comité de Coordinadores katar le Phral kai Ningeren amen dikhlias mishto te usinpe 28 millonuria dolaria b te azhutin godolen kai nakhle bedi chorhe. Kakala bedi sas mai but de 200 pe sa e lumia, uni anda lende sas: e pandemia anda o COVID-19, aver sas kana o pai tasadias uni riga ande África, kana shukile uni riga ando Zimbabue, vai kana phurdias zurales e barval ande uni thema ai so zhalpe ande Venezuela ke nai jabe savorhenge. Le loventsa kinde jabe, pai, gada, draba, vi usisaile te zhan le manush kal dojtoria ai te aven len iek rig te beshen zhi kai lashavon sa le prame. Gadala love vi usisaile te kinen dieli te kosen le riga, te lasharen ai vazden le khera. Aida dikhas sar sas godo.

 COVID-19. Pe sa e lumia amare phral kinuin pala kacha pandemia, but nasuaile ai aver dukhade le ando ilo. Sas pharo lenge te aven len le love kai trobun len te train. Pala godo kidinisaile 800 grupuria anda amare phral te azhutin le phralen te aven len so trobun len. Godola grupuria phenen ka o Comité de Coordinadores te traden so trobulpe.

 Ande kako borsh von azhutisarde amare phralen te aven len o jabe, o pai, le draba, le dieli te shai naion ai te premeninpe. Ande uni foruria azhutisarde le phralen te shai aven len so delas len godola kai amperetsin o them.

 But andal manush kai nai Marturia dikhle e buki kai kerdiam. Iek ejemplo sas o Field Simwinga, kai si zhandari ando Nakonde (Zambia) vo phendias le phralenge: “Aliaras ke nashtis te pokinas so tumen kerde, azhutisarde ka but famili kai kinuisarde pala so sas kana trobunas len.”

 Tsirha jabe ando Angola. Pala e pandemia katar o COVID-19 chi areselas but jabe ando Angola, ai godo kerdias te avel mai kuchi o jabe. Suako data mai pharo sas amare phralenge te kinen so trobun len te jan.

 Anda godia mangliaspe ka amare phral ando Brasil te azhutin amare phralen ando Angola ai te traden lenge jabe. Te shai usilpe mishto so das amendar, amare phral pushle ai dikhle sar te kinen ai te traden o jabe. Alosarde te kinel sa ande iek data te avel mai lesni. Gadia pokindiol numa 22 dolaria te kinelpe ai te traden 20 kg jabe sar pirincho, zetino ai fusui. Zhi agies trade 33.544 gone jabe kai si 654.000 kg. Sa kako ai aver dieli kai kinenas kotse, azhutisardias te pravardion mai but de 50.000 manush.

 Sar aliarenpe amare phral? Alexandre, kai beshel ande iek foro kai si dur katar o Angola, phenel: “Chachimasa dikhau ke o Jehova kamel man, ke chi sim korkorho ai ke e organizacion le Jehovaski si leske pala mande”. E Mariza, iek dei kai bariarel peske shaves korkorho, phenel amenge: “O Jehova ashundias murho rhugimos. Naisiu but leske ai vi ka leski organizacion”.

 Shukile uni riga ando Zimbabue. Ando borsh 2020 pala e phuv kai shukili ando Zimbabue millonuria manush nashtinas te pravarenpe ai pala e bari bokh kai sas, merenas. Uni anda amare phral nas len but te jan.

 Kidinisaile 5 grupuria te azhutin ai te traden jabe amare phralenge. Aver anda amare phral lasharde ai trade jabe, te keren kako usisarde pengi matora. c Ando borsh 2020 kai keras buki usisaile 691.561 dolaria te pravaren mai but de 22.700 manush.

 Ka uni anda lende o jabe areslo vorta kana manas len. Anda godia le phral dine fala le Devleske pala so areslo lende ai gilabade ilesa le Jehovaske.

 Ande iek foro, dui anda amare phea kai si phivlia gele te ashunen uni manushen katar iek organizacion (ONG) kai kamelas te azhutil le manushen. Numa ande godo chidimos astarde te den duma pal manush kai ningerenas o them. Te shai len so shinavenas godola manush trobunas te thonpe ande godo, numa amare phea chi kamle. Kana geletar savorhe kotse marenas mui lendar ai phenenas: “Na aven te mangen jabe, ashunde?”. Numa dui kurke mai angle le phral aresle ka lengo foro ai dine le phean so trobunas len... godo sas mai anglal te aresen le prame kai shinadias godia organizacion (ONG).

 E buki kai kerdili ando Zimbabue lashi sas angla le iakha le manushenge. Aida dikhas so sas amara pheasa e Prisca kai beshelas ande iek foro tsinorho. Makar sas la but bedi pala e phuv kai shukili voi zhalas te ningerel o suato duvar ando kurko ai vi kana sas e vriama te kerel buki ando kimpo. Le zhene anda o foro marenas mui latar ai phenenas: “Si te mundares cha familia bokhatar pala so keres”. Numa e Prisca phenelas lenge: “O Jehova chi mekel ka peske servitori”. Ande tsirha vriama amari organizacion tradias lake o jabe kai trobulas la. Uni andal zhene kai beshenas kotse nashtinas te pakian so sas ai phende lake: “O Del nunca chi meklias tu. Kamas te zhanas mai but pa leste”. Akana mai but de 7 anda godola zhene, ashunen amaro chidimos po radio.

 Kana mai getola kacha lumia, but bedi sar kakala si te aven (Mate 24:3, 7). Naisis but pala so den tumendar ilesa kai den ando donate.pr418.com. Sa godo azhutil te aven len so trobul amare phralenge kai kinuin.