Suako borsh boldile but manush, pala godo trobul amen mai riga te chidas amen te luvudis ka o Jehova. Le grupuria katar le phral kai vazden ai lasharen kakala riga, phende ke ando 2020 trobunas te keren kacha buki ande 2.700 riga. a

 Numa pala o COVID-19 but prame parhudile. Le phral kai ningeren amen dikhle mishto te terdiaren e buki te las sama katar amare phral ai te keren so trade le amperetsii la lumiake. Numa ando 2020 mai anglal te avel godo nasualimos, vazdile ai lashaile mai but de 1.700 anda kakala riga. Ai vi getosaile mai but de 100 bukia kai trobunas te kerdion andel khera Betel. Aida dikhas dui anda kakala bukia ai savo mishtimos line amare phral.

 Betel anda o Camerún. O Betel kai sas ando foro Duala sas defial tsinorho ai trobulas te lashardion but dieli kotse. Amare phral kamle te lasharen sa o Betel, numa dine po gor ke sas defial kuchi te kerel godo. Aver prama kai gindosaile sas te vazden les pale de neves ande aver rig vai te kinen aver kher te lasharen les ai thon o Betel kotse. Numa nashtisarde te keren chi iek andal prame kai gindinas.

 Le phral zhangle ke ando Duala kamenas te keren iek baro drom pasha e rig kai zhasas kana sas amen o baro chidimos. Kako baro drom si te azhutil te aresen mai fuga ka o Betel ai te avel les so trobul les. Pala godo, le phral kai ningeren amen dikhle mishto te vazdelpe o Betel pasha e rig kai kerenas o baro chidimos.

 Te zhal angle kacha buki, amare phral pokinde uni manushenge te vazden o Betel, gadia sas te avel mai fuga ai mai lesni. Ai gadia sas, ke sa e buki sas dui millonuria mai lesni de so gindinas ke sas te avel. Pala godo sa le phral mukisaile mai angla te avel o COVID-19 ande lumia.

 Akana le phral kai si ando Betel anda o Camerún shai keren buki, train mai mishto ai dikhen kako Betel sar iek podarka le Jehovaski. Iek phral ai leski rhomni phenen: “Akana kamas te mai keras buki ke kacha podarka mol but amenge”.

 Kai ambolden le suaturia ande shib tojolabal (México). Pe but vriama le phral kai azhutinas te lasharel le publikasionuria ande shib tojolabal sas ando Betel kai si ando Centroamérica, pasha e Ciudad de México. Numa e shib tojolabal delpe duma andel foruria Altamirano ai Las Margaritas kai si uni 1.000 kilometria katar o Betel. Pala godo nas vushoro le phralenge kai trobunas te ambolden le suaturia ande kacha shib. Ka o Betel nas vushoro te kidel phralen ande godola foruria te keren publikasionuria te chiton ai te ashundion ande shib tojolabal.

 Anda godia le phral kai ningeren amen alosarde te mukilpe o grupo kai amboldel le suaturia ando tojolabal ka o foro kai delpe duma kacha shib.Te kerdiol kako, o Betel kindias ai lashardias iek baro kher te kerdiol e buki. Godo sas mai lesni de sar te vazdelpe iek kher vai te pokindiol iek suako shon.

 Iek phral kai kerel kacha buki ando tojolabal phenel amenge sar aliarelpe: “Ande 10 borsh kai kerau kacha buki, chi arakhlem chi iek familia kai delas duma murhi shib. Akana sam ande iek foro kai shai avas mashkar lende ai suako gies shai dau duma lentsa ande shib tojolabal. Gadia sikilem neve suaturia ai azhutil man ande e buki kai kerau”.

 Ando borsh kai avel 2021 te shai kerdiol, kamas te keras buki ande uni 75 khera. Uni riga si te lashavon publikasionuria ande aver shib ai aver te sikion mai phral ai phea pa e Biblia. Azhukeras te shai getosaras e buki ande 8 khera Betel sar Rámapo (Nueva York) ai te mukinpe o Betel anda e Argentina ai e Italia. Na numa godo, trobulpe mai but de 1.000 riga te kidas amen te luvudis ka amaro Del. Ai 6.000 anda amare riga si len but prame te lashavon ai te parhudion. Ai aver 4.000 kai trobun te kerdion pale.

 Sar pokindiol sa godia buki? O phral Lázaro González, kai si ando Betel katar e Centroamérica, del duma pa godo. Kana dias duma pa e buki kai kerdili kai si le phral kai ambolden le suaturia ande shib tojolabal, mothol: “Le phral kai train ande amaro them nai len but, nais le phralenge pe sa e lumia kai den pendar kerdiam but prame. Akana si amen mai riga te lasharas publikasionuria ande aver shiba ai shai tradas le phralen mai pashe katar le manush kai den duma godia shib. Naisis le phralenge kai den pendar ilesa”. Dikhlian? Sa kakala bukia pe sa e lumia kerdile pala so das amendar. But anda so das amendar, das les ando donate.pr418.com.