Le marturia le Jehovaske das amen gogi anda amare phral ke kamas te aven mishto (1 Petri 2:17). But anda amende aliaras amen sar e Tannis, iek phei anda e Kenia kai mothol: “Drago mange te zhanau so si amare phralentsa pe sa e lumia”. Sar zhanas amen le marturia le Jehovaske so nakhen amare phral? Ke de kin o borsh 2013 anklen ando jw.org viesti pa lende.

 Kakala viesti chache le ai den duma pa kana vazdenpe riga te luvudis le Devles, e buki kai kerdiol te azhutin kas kinuin ai pa bare prame kai kerdion sar kana anklel iek Biblia ande aver shib. Vi motholpe pal phral kai phandade le pa lengo pachamos ai pa kana savorhe ningeras iek baro divano pe sa e lumia, sar kana serelpe pa e martia le Jesusoski. Numa kon ramon kakala viesti? Kon roden le ai lasharen le?

 O Comité de Coordinadores katar le Phral kai Ningeren amen lel sama ka o grupo kai kerel kacha buki. Si mai but de 100 phral ai phea kai den anda pengi vriama ai uni anda lende azhutin de durial. Von roden le viesti, ramon le, ambolden le ande aver shib ai mai but. Vi den duma le manushentsa kai zhanen pa e viasta kai trobun te ramon. Ai phral katar mai but de 80 khera Betel pe lumia azhutin te kerdiol kacha buki.

 Te anklel iek viasta le phral keren buki kidine. Kana ashunen pa vareso kai zhalpe ande lumia, von roden ai dikhen sar sas chachimasa le prame. Shai avela pushen ai den duma varekasa kai zhanel pa godo. Kana si len sa so trobun len ramon ai lasharen o artikulo, porme thon le patretsi ai traden le ka o Comité de Coordinadores te dikhen te avela mishto.

 So phenen amare phral pal viesti kai anklen? Amari phei Cheryl kai beshel ando Filipinas, phenel: “Plachal man te chitou diminiatsi sa le viesti kai anklen pa murhe phral ai e organizacion”.

 But manush len sama ke nai iek fialo le viesti kai anklen ando jw.org de sar le kolaver riga. E Tatiana anda o Kazajistán, mothol: “Drago mange le viesti kai si ando jw.org ke shai pakiau ande lende. Numa phenen o chachimos”. E Alma anda o México, mai mothol: “Ande aver riga den mai but viesti chorhe, numa ande amari rig po Internet denpe viesti kai zuriaren amen”.

 Na numa den amen viesti chache, le viesti kai anklen zuriaren amaro pachamos. Bernard, anda o Kenia, mothol: “Pala kakala viesti akana dikhau le phralen sar murhi familia, avena kai avena. Kana rhugiu ka o Jehova shai mangau pa suako anda lende”. E phei Bybron, anda o Kenia, phenel: “Aliarau man veselime kana dikhau ke anklel ande aver shib amari Biblia! Lau sama ke o Jehova kamel amen savorhen”.

 Vi zuriaren amen le viesti pa amare phral kai lenpe pala lende. Dikhta so mothol e Jackline aver phei anda o Kenia: “Kana gindiu ande lende ke chi daran, godo del man zor. Lau sama so azhutisardias len te rhevdin. Ai sikilem ke so den le mai zor si kana rhugin, kana chiton e Biblia ai te gilaban”.

 Iek phei anda o Costa Rica kai bushol Beatriz naisil le viesti pal prame kai nakhen ande lumia, voi phenel: “Che bari prama te dikhas sar e organizacion ande fuga del so trobul ka amare phral. Kamlimasa lel sama mishto lendar. Dikhau ke chachimasa kacha si e organizacion katar o Jehova”.

 Sam naisime kai anklen le viesti ande amari rig po Internet! Pala kakala viesti shai zhanas so zhalpe amara familiasa pe sa e lumia. Te na avilosas pala so den tumendar ando donate.pr418.com nas te zhanas pa lende. Naisis ilesa pala sa so den tumendar.