Suako borsh but Marturia kai keren but buki le Jehovaske zhan kai Escuela Bíblica de Galaad de la Watchtower kai si ando Patterson (Nueva York). a Ande kacha escuela le phral sikion sar shai keren mishto pengi buki ande organizacion. So sikion azhutil te zuriaren le phralen kai chidenpe ai kal khera Betel pe sa e lumia.

 Galaad si chachimasa iek escuela kai zhan phral anda sa le thema. Ando 2019 getosaili e Escuela de Galaad 147 kai gele 56 phral ai phea anda 29 thema. Uni anda lende kerde buki andel khera Betel, aver predikin ande aver thema, ai vi sas phral kai zhan duvar ando borsh kai kidenpe amare phral.

 Lashavon but prame mai anglal katar o pervo gies anda kacha escuela. Iek prama kai trobul te lashavol si sar si te zhan le phral kai escuela. Ando Betel katar Estados Unidos si phral ande iek grupo kai lasharen kacha buki, von kinen le biletsi te zhan amare phral po aviono. Ai ande escuela 147 suako bileto molas 1.075 dolaria te zhan ai te ambolden le phral. Le phral kai sas ande Islas Salomón trobusarde te len shtar avionuria te zhan ai trin avionuria te ambolden. Kakala phral kerde 35.400 kilometria te zhan kai escuela ai godo molas 2.300 dolaria pala suako phral. Te shai usis mishto so das amendar, amare phral kai lasharen sa kako si len iek programa kai azhutil len. Kako programa rodel kai ai kana si mai lesni le biletsi. Polme te kinel o bileto, o programa mai rodel te arakhel aver mai lesni. Butivar amare phral ande lumia nirin kilometria ke shai usinpe te kinen iek bileto. Von den ilesa kakala kilometria ai gadia shai kinenpe mai biletsi.

 But andal phral kai zhan te sikion trobul len iek lil te den andre ando Estados Unidos. Pala godo ando Betel katar Estados Unidos si aver grupo anda amare phral kai azhutin len te aven len kako lil te estudin tsirha vriama ande kako them. Sa godola lila kai trobun len mon 510 dolaria pala suako manush.

 Sar las o mishtimos anda sa le prame kai sikion kakala phral? Hendra Gunawan iek phral kai kidelpe le marturentsa katar o Sureste Asiático, vo phenel amenge: “Mai anglal te aven amende iek phral ai leski rhomni kai gele kai Escuela de Galaad, nas phral kai predikinas but chasuria. Numa kana aresle, dine amen but zor ai godo kerdias te mai kamen te predikin amare phral katse. Ai mai angle, iek anda amare phea geli kai Escuela para Evangelizadores del Reino”.

 O phral Sergio Panjaitan kerel buki ando Betel katar o Sureste Asiático. Kotse kerel buki uni phralentsa kai gele ande Escuela de Galaad. Vo mothol: “Sa so sikile kakala phral na numa sas baro suntsimos lenge vi amenge. Sikile but numa chi kerdion mai bare katar le kolaver, von kamen te sikaven amen so sikile. Godo del amen zor ai amen kamas te das zor le kolavren”.

 Sar pokindion le prame te kerdiol iek escuela gadia? Pokindion le pramentsa kai denpe te zhal angle amari buki pe sa e lumia ai univar godo delpe ando donate.pr418.com. Naisis ilesa pala so den tumendar, gadia shai kerdili iek escuela sar kacha, iek escuela kai aven phral ai phea anda sa e lumia.