Mai but de 60% katar amare phral kai ambolden le suaturia ande aver shib keren kacha buki ande aver riga, kai nai ando Betel. Ande soste azhutil kako? Save dieli trobun le phralen te keren kacha buki? Sostar kakala riga azhutin te kerdiol mai mishto e buki?

 Pala kakala riga amare phral shai train ando foro kai delpe duma e shib. E Karin, iek phei kai kerel kacha buki ande iek shib katar o Niamtso, phenel amenge: “De kin mukisailiam ando Cuauhtémoc, ando Chihuahua (México) sorho gies das duma ande shib kai amboldas le suaturia. Na numa le phralentsa kai keras buki vai kana zhas te predikis, vi kana zhas te kinas. Ashunas but suaturia ke de dumult chi ashunasas. Akana zhanas sar den duma le zhene agies”.

 O phral James, trail ande Ghana ai kerel buki le phralentsa kai ambolden le suaturia ande Frafa. Vo phenel ke plachaias les kana sas ando Betel, numa vi mothol: “Plachal man mai but ke sam ande iek rig kai usilpe te ambolden le suaturia. Shai predikis ande kacha shib ai shai dikhas sar aresen le manushenge le lashe viesti. Godo del ande murho ilo”.

 Sar alosarelpe kai si te avel e rig te ambolden le suaturia? O Joseph kai kerel buki ando grupo kai vazden ai lasharen le riga ando Warwick (Nueva York), phenel: “Vareso kai chi azhutil kana trobus te rodas iek rig, si ke ande but foruria nai pai, luso vai o Internet nai lasho ai godo chi mekel te fuliaras le dieli kai trobunpe te keras kacha buki. Pala godo mai anglal te alosaras savi si te avel e rig, las sama ande save foruria delpe duma godia shib”.

 Butivar si mai vuzhoro ai mai fugo kana tholpe iek rig te ambolden le suaturia ande iek rig kai gata si amen, sar le riga kai chidas amen vai kai si amen o baro chidimos. Te avela nashtilpe, le phral shai pushen te kinen iek rig ai te avela parhudion le prame godia rig shai bikinelpe ai le love shai usinpe kai trobulpe.

 Ande amaro borsh kai keras buki 2020, usisardepe 13 millonuria dolaria te inkerdion ai te aven vorta kakala riga. Le phral kai keren kacha buki trobun len computadoruria, internet, uni programuria te usinpe, ai aver dieli te ashundion le publikasionuria. Iek ejemplo si, ke trobunpe 750 dolaria te kinelpe iek computadora ai te ashel gata te kerdiol e buki. Amare phral vi trobun len o programo Watchtower Translation System, kai azhutil te ambolden le suaturia ande pengi shib.

 Kal phral kai keren kacha buki aresle sa le dieli kai trobun len. Sas bari prama godo ke kana astardias e pandemia katar o COVID-19 le phral gata sas len le dieli kai trobunas len te mai keren le publikasionuria te ashundion ai le videuria.

 Vi si uni phral kai azhutin te dikhen mishto le publikasionuria mai anglal te ankalavenpe ai si aver phral kai azhutin te len sama sa le riga kai kerdiol kacha buki. “But anda amare phral aven te keren so von zhanen ai te azhutin katse”, phenel o phral Cirstin, kai kerel buki kai ambolden le suaturia ande shib afrikáans ando Ciudad del Cabo (Sudáfrica).

 Le phral veselime le pala so shai keren. Iek ejemplo si iek phei kai mothol ke kana azhutil ka iek rig kai ambolden le suaturia si sar “te aliarel iek shukar barval”. Aver phral zhan ai thon pengo glaso ai gadia azhutin te kerdion publikasionuria te ashundion. E phei Juana kai amboldel le suaturia ande shib totonaco ando Veracruz (México), phenel amenge: “Akana ke trais pasha le foruria kai mai delpe duma amari shib, si mai vushoro le phralenge te azhutin te thon pengo glaso kal publikasionuria ai kal videuria”.

 Chachimasa kakala riga azhutin te ambolden le publikasionuria mai mishto ande aver shib? Millonuria manush kai chiton le publikasionuria phenen ke gadia si. O phral Cedric, kai si ando grupo kai amboldel le suaturia ande shib Congo ande República Democrática del Congo, phenel: “Uni phral phenenas ke le suaturia kai usisas, sas e shib congo ‘katar e Watch Tower’ ai ke nas sar von denas duma. Numa akana phenen ke le suaturia kai usis si ande e shib congo kai delpe duma agies ai ke von den duma suako gies”.

 O phral Andile amboldel le suaturia ande shib xhosa ai phenel amenge kai vi nakhel kako ande Sudáfrica: “But manush den po gor sar parhudili amari buki. Uni tsinorhe kai chitonas La Atalaya ando inglés, akana alosaren te chiton ando xhosa. Ai plachal len but La Traducción del Nuevo Mundo kai si nevi sostar si vushoro te aliaren la”.

 Te tholpe iek rig te amboldel le suaturia ande aver shib, te inkerdiol mishto ai te aven phral te azhutin, sa godo shai kerdiol pala so den tumendar ilesa ando donate.pr418.com te zhal angle e buki pe sa e lumia.