Chi si te bistras o Baro Chidimos trine giesengo anda o 2020. Sas e pervo data kai savorhe pe sa e lumia dikhliam po Internet iek fialo programo! Numa, amare phral ando Malaui ai o Mozambique dikhle kako programo makar nas len Internet. Sar sas kako?

 O Comité de Coordinadores ai o Comité de Enseñanza katar le Phral kai Ningeren amen dikhle mishto pe kacha data te ashundiol o Baro Chidimos po radio ai pe television ando Malaui ai o Mozambique. Sostar kerdilo kako? Ando Malaui o Internet defial kuchi lo, pala godo tsirha andal marturia le Jehovaske si len Internet. O phral William Chumbi kai si ando Betel katar Malaui, phenel: “Numa sas amen e radio ai e television te shai das kako jabe dujosko le phralen”. O Luka Sibeko aver phral kai si ando Betel kotsar, mai phenel: “Te na avilosas amen e radio ai e television, numa uni anda amare phral sas te len o mishtimos katar kako Baro Chidimos”. Ai ando Mozambique zhalpe vareso gadia, na but anda amare phral shai pokinen Internet vai shai kinen vareso te dikhen o chidimos.

 Pala e pandemia katar o COVID-19, gata ashundion ai dikhion suako chidimos kai si amen ando kurko. a Amare phral mangle mai chasuria te shai ashundiol amaro Baro Chidimos po radio ai pe television.

 Ando Malaui, amare phral trobusarde te lasharen vareso mai. Le gazduri katar le programuria kai denpe po radio ai pe television, numa den iek chaso te nakhen o programo, sostar gindin ke te avela lungo le manush si te meken te ashunen. Numa le phral phende ke amari buki si sa le manushenge. Iek ejemplo si ke ande kacha pandemia ningeras le lashe viesti pa e Biblia, ai kako azhutil savorhen te aven lashe manush ai te aven len iek familia veselime. Kana le gazduri ashunde, dine ka amare phral mai chasuria te delpe amaro programo.

 Ando Malaui millonuria manush ashunde amaro programo po radio ai pe television. Ai ando Mozambique amaro Baro Chidimos ashundilo pe 85 programuri katar e radio ai dikhilo ande iek programo katar television.

 Te shai dikhiol amaro Baro Chidimos pe television, pokinde 28.227 dolaria b ai te ashundiol po radio andel kakala dui thema, pokinde vareso gadia sar 20.000 dolaria. Te delpe pe suako radio pokinde de 15 zhi kai 2.777 dolaria, ke uni aresenas ka but manush ai aver ka tsirha manush.

 Amare phral line sama mishto sar te usin le love. Ando Malaui kerde lenge mai lesni le programuri po radio, ai iek anda lende 30% mai lesni. Gadia ashile amare phralenge 1.711 dolaria te usilpe kana trobulape. Ai ando Mozambique mekle len mai lesni ke ashunenas ke le marturia le Jehovaske sas chache manush ai ke pokinen kana trobulpe.

 Amare phral naisisarde but ke ashunde o Baro Chidimos gadia. O phral Patrick, kai si phuro kai chidenpe ando Malaui, phenel: “Naisis kal Phral kai Ningeren amen kai kerde kako ande pandemia”. Aver phral ando Malaui kai bushelpe Isaac, phendias: “Numa si amen radio te ashunas, pala godo sam defial naisime ke ashundiam o Baro Chidimos gadia. Amenge sas iek lashi prama kai dias amen e organizacion le Jehovaski. Pala sa kako sa murhi familia lias baro mishtimos. Zhanas chachimasa ke o Jehova kamel zurales peske foros”.

 Ka iek manush anda Mozambique kai zhal angle ando chachimos sas e pervo data kai dikhlias o Baro Chidimos anda o 2020, vo phendias: “Kana dikhlem o Baro Chidimos pe television, gindisailem ke o Jehova o Del si les sa e putiera. E pandemia chi terdiardias ka o Jehova te del amen o jabe dujosko, so trobul amen katse khere. Dikhlem mishto ke le servitori le Jehovaske kamenpe ai zhanau chachimasa ke kacha si e religion chachi”.

 Iek phral kai bushelpe Wyson, phenel: “Kamau te naisiu kai sluga chachi ke lel sama amendar ande kacha pandemia. Nai amen but ai beshas ande iek foro kai nai but love. Numa liam baro mishtimos ke sas amen o Baro Chidimos po radio ai pe television”.

 O Cómite de Coordinadores ai o Cómite de Enseñanza katar le Phral kai Ningeren amen pale dikhle mishto te ashundiol o Baro Chidimos anda o 2021 po radio ai te dikhiol pe television ande uni riga. Sar pokindiol sa kako? Pala so den tumendar ando donate.pr418.com te kerdiol amari buki pe sa e lumia. Naisis tumendar ke den ilesa.