“Shai avela ke but manush kai chiton kacha publikasion prinzharen aver manush kai nashtin te dikhen”, phendias The Watch Tower (La Torre del Vigía) 1 anda o junio, 1912. Kotse vi phenelas ke sas mai publikasionuria lenge ivia. Mai phendias: “Kakala publikasionuria lashavon te chiton le naientsa le manush kai nashtin te dikhen. Ka but manush korhe mol but lenge te zhanen ke avela e lumia pherdo suntsimos”.

 Kana ramosarde kakala suaturia, le marturia le Jehovaske gata lasharasas publikasionuria la Bibliake kai chitonaspe “le naientsa” makar ande godia vriama nas iek braille savorhenge ande shib inglés. Agies mai lasharas publikasionuria le manushenge kai nashtin te dikhen ande mai but de 50 shiba! Sar lashavon?

 Pervo lenpe le vorbi ai thonpe ando braille. Michael Millen, kai kerel buki ando Servicios de Procesamiento de Texto, ando Patterson (Nueva York), phenel: “De mai anglal kinasas sofware te thas le vorbi ando braille, numa nashtisas te usis len ande sa le shiba. Akana usis Watchtower Translation System, kai mekel amen te thas le vorbi ando braille ande but shiba la lumiake. Si iek baro programa. Me pakiau ke nai aver sar kako”.

 Andel publikasionuria braille vi shai chitolpe so dikhiol andel patretsi. Iek ejemplo si, o pervo patreto anda e publikasion Iek lasho traio kai mothol gadia ando braille: “Iek manush astarel te phirel pe iek drom kai si pherdo lulugia ai plaia”. O Jamshed kerel buki le phralenge kai kidelpe ai del but anda peski vriama te predikil. Sar vo nashtil te dikhel, phenel: “Si bari prama mange te chitou so dikhiol andel patretsi”.

 Polme te thol ando braille, kacha buki tradelpe kal khera Betel. Kotse thonpe andel rhartii zurale te na parhadion kana lasharen len, ai chi kana usin len vai nakhel e vriama. Polme, thon le rhartii iek po iek ai keren iek libro. Mai angle tradelpe kako ai aver publikasionuria kal phral. Univar shai tradelpe ivia po correo te avela ke shai kerelpe kako. Ai shai avela ke amare phral trobul len publikasionuria te aven gata kana kidas amen, pala godia le khera Betel lasharen le prame ande fuga te traden len.

 Denpe but love ai vriama te kerdiol sa kacha buki. Kai kerdion le publikasionuria ando Wallkill, Nueva York, ningerel sa godia vriama te kerdion dui Bibli ando braille ai 50.000 anda amare Bibli. Aver diela si, ke iek Biblia skurto ando braille grado 2 si la 25 libruria ando inglés. a Le prame kai trobunpe te lasharen la mon 123 dati mai but de sa so trobunpe te lasharen iek Biblia andal amare. Numa e pervo patrin mol 150 dolaria!

 Sar aliarenpe le phral kai azhutin te kerdion kakala publikasionuria? E Nadia, iek phei kai kerel buki ando kher Betel anda Sudáfrica, phenel: “O traio nai vushoro amare phralenge kai nashtin te dikhen mishto vai korhe le. Pala godia mol but mange te kerau vareso pala lende. Zhanau chachimasa ke o Jehova kamel len defial zurales”.

 Ai te avela iek manush kai nashtil te dikhel chi zhanel te chitol braille, so shai kerel? De uni borsh palpale anklisti iek publikasion kai bushol Aprenda a leer braille ai anel dui prame te sikiol te ramol ai te chitol braille. Te shai kerel kako trobul te azhutil les varekon kai shai dikhel. Sode mai sikiola mai si te serel sar te ramol ai te chitol peske naientsa.

 Sar azhutin le publikasionuria ando braille kal phral korhe vai kai nashtin te dikhen mishto? Aida dikhas so sas le phralesa o Ernst, kai beshel ando Haití. Vo zhalas kai kidas amen, numa nas les kanchi te chitol ando braille. Pala godia vo serelas peske sa so kamelas te mothol ando kidimos. Vo phenel: “Numa akana si mai shukar. Shai vazdau o vast ai te dau anglal kana kamava. Aliarau man ande familia katar o Jehova. Akana savorhe zuriaras amaro pakiamos iek fialo”.

 O Jan si iek phuro kai kidelpe ando Austria ai nashtil te dikhel mishto. Ningerel angle kana estudin La Atalaya ai o Estudio bíblico de la congregación, phenel: “Amare publikasionuria ando braille si le mai vushoro te chitos. Uni ejempluria si, ke ande suako patrin si iek numero, shai arakhau le noti ande fuga ai so motholpe pa so dikhiol andel patretsi si vorta so trobus te zhanes”.

 Ando Corea del Sur beshel iek phei kai bushol Seon-ok. Voi del but anda peski vriama te predikil makar korhi la ai kashuki la. De mai anglal, trobulas varekon te sikavel lake so motholaspe ando kidimos. Numa akana, shai chitol korkorho le publikasionuria ando braille. Voi phenel: “Nai vushoro te chitou aver publikasionuria ando braille ke chi kerdile mishto ai le patria zanorhe le. Numa si mai vushoro te chitou le publikasionuria katar le marturia le Jehovaske, ke le rhartii mai zurale le ai aliarau mishto le punturia murhe naientsa. Akana chi mai trobul man varekon te chitou, shai kerau les me korkorho. Plachal man but te sikiuau ai te shai dau anglal ando kidimos. Chitou sa le publikasionuria ando braille kai aresen ande murhe vast. Chachimasa, nashtiu te avau bi lengo!”.

 Ande amare publikasionuria ando braille, sar le kolaver, phenelpe: “Kacha publikasion zhal pe sa e lumia te sikavel e Biblia. Kacha buki ninkerelpe pala so den le manush anda pengi voia. Chi trobul te bi kinelpe”. Pa so den tumendar ando donate.pr418.com savorhe shai zuriaras amaro pakiamos, vi le manush korhe ai godola kai nashtin te dikhen mishto. Naisis but pala so den ilesa!