“Nai de dumut gindisas ke nas te avel amen o jabe dujosko ande iek computadora vai ando telefono”. Vi tu gindisas gadia? Kakala suaturia phendias le o phral Geoffrey Jackson ando Informe 6 del Cuerpo Gobernante ando borsh 2020. Ai mai phendias: “So sas te keras te na avilosas amen ande kacha pandemia e aplicacion JW Library. O Jehova de dumut azhutilas amen te avas gata pe kacha vriama”.

 Sar kerdias o Jehova te avas gata agies? Sar trobulaspe te lasharen e aplicacion JW Library? Ai so trobulpe te ninkeren la ai te phirel mishto?

 Ando Mayo katar o 2013, le Phral kai Ningeren amen mangle te kerdiol iek aplicacion te avel kotse e Traducción del Nuevo Mundo. Kacha buki kerde la le phral anda o Departamento de Programación de MEPS, anda o Betel katar o Estados Unidos. Paul Willies kai kerel buki ande kako, phendias: “Si e pervo data kai keras iek aplicacion kai shai fuliaren la le manush. Te lasharas la, kerdiam iek grupo kai trobulas te keren buki le phralentsa katar aver grupuria anda o Betel. Pala godia, trobusardiam te terdiaras uni bukia kai sas amen. Rhugisailiam but ka o Jehova ai dikhliam lesko vast: numa nakhle 5 shon ai anklisti e aplicacion ando kidimos anda o borsh”.

 Polme sas aver prama: te avel ando JW Library mai but libruria ai publikasionuria ande but shiba. Ando enero katar o 2015, sas la but publikasionuria ando inglés, ai 6 shon mai angle gata shai fuliarenaspe ande mai but de iek shel shiba.

 Te phirel mai mishto kacha aplicacion le phral kerde but prame. Iek ejemplo si, ke thode videuria ai iek rig kai si la so trobul amen te avas gata kana kidas amen. Vareso mai si, ke katar e Biblia shai dikhes uni prame kai si ande Guía de estudio.

 Suako shon putren e aplicacion JW Library mai but de 15 millonuria manush. Anda kakala, 8 millonuria putren la suako gies. So trobulpe te phirel mishto e aplicacion ande but telefonuria ai computadoruria? O phral Paul Willies mothol: “Kacha si iek bari buki kai chi terdiol. Thas neve prame ande late, ai rodas te avel vushoro te usilpe. Sar le computadoruria ai le telefonuria parhudion, amen trobus te keras buki te phirel mishto e aplicacion ande suako dispositivo. Ai sar si amen mai publikasionuria ai audiuria ando JW Library trobus te neviaras amaro software ai te ninkeras les mishto”. Agies ando JW Library si sar 200.000 publikasionuria ai mai but de 600.000 audiuria ai videuria ande but shiba.

 Te ninkerdiol e aplicacion suako gies, na numa trobunpe ekipuria, vi trobus te kinas uni programi (software). Ai numa iek anda lende mol 1.500 dolaria ando borsh. O Departamento de Programación de MEPS del uni 10.000 dolaria ando borsh te kinelpe computadoruria, tablets ai telefonuria neve, te len sama te phirel mishto e aplicacion.

 Pala e aplicacion JW Library, chi mai das but love andel rhartii te kerdion le publikasionuria ai te tradas len. Aida dikhas iek ejemplo, ando 2013 lashardiam andel rhartii 12 millonuria anda e publikasion Examinando las Escrituras diariamente. Numa ando 2020 ferdi lashardiam 5 millonuria, makar sas 700.000 manush mai kai predikin pe sa e lumia. Sostar sas kako? Ke akana but phral chiton o verseto anda o gies po JW Library. a

 JW Library azhutil amen ande but prame. E Geneviève, kai beshel ando Canadá, pakial ke kacha aplicacion azhutil la te estudil mai mishto. Voi phenel: “Chachimasa, te trobuva te lau but libruria te estudiu nas te kerau les suako gies. Akana pala e aplicacion, numa trobuv te lau murhi tablet ai kotse si man sa so trobul man. Te estudiu suako diminiatsi azhutisardias man te avel man iek pakiamos mai zuralo ai te pashuvau mai ka o Jehova”.

 Kacha aplicacion azhutisardias amen ande pandemia katar o COVID-19. Iek ejemplo si, o Charlyn anda o Estados Unidos kai phenel: “Ande kacha vriama kai nakhli pala o COVID-19 pe sa e lumia, chi dikhlem chi iek publikasion nevi ande rhartia. Numa ando JW Library si sa so trobul amen te zuriaras amaro pakiamos. Naisiu but ka o Jehova pala kacha shukar prama”.

 But phral gindin sar e Faye kai beshel ando Filipinas. Voi mothol: “Si bari prama kacha aplicacion si la so trobul man te pashuvau ka o Jehova. Usiu la te chitou diminiatsi, te ashunau vareso kai del man zor zhi kai kerau prame ando kher, te estudiu e Biblia ai te avau gata kana kidas amen. Kana ashel man vriama, dikhau videuria ai kana sim varekai ai trobuv te azhukerau chitou e Biblia ai amare publikasionuria. Kacha aplicacion si sar o sumnakai!”.

 Azhutil amen but te predikis. Iek ejemplo si, iek phei anda o Camerún plachaias la but iek verseto katar e Biblia kai usisardias iek phei kai sas lasa kana predikinas. Polme kamlias te usil les, numa chi serelas savo sas. Voi mothol: “Seravas uni vorbi anda o verseto. Pala godia, gelem kai aplicacion, thodem e Biblia ai rodem opre kai si iek lupita ai ramosardem le suaturia. Gadia arakhau le verseturia kai chi serau”.

 Pala so den tumendar ando donate.pr418.com shai lasharas ai te ninkeras e aplicacion te phirel mishto. Gadia le phral pe sa e lumia len mishtimos anda late. Nais tumenge kai den ilesa.

1. Octubre anda 2013: Anklisti e aplicacion ai sas la e nevi Traducción del Nuevo Mundo ando inglés.

2. Enero anda 2015: Thode mai publikasionuria ando inglés ai polme ande but shiba.

3. Noviembre anda 2015: Thode te forbos le vorbi.

4. Mayo anda: 2016: Thode kai phenel “Kana kidas amen”.

5. Mayo anda 2017: Thode te ramos le prame kai chi kamas te bistras.

6. Diciembre anda 2017: Thode e Biblia de estudio ando inglés.

7. Marzo anda 2019: Thode te fuliaras audiuria, te dikhas videuria, ai te dikhas uni anda le prame anda e Guía de estudio.

8. Enero anda 2021: Thode te shai estudis e Biblia mashkar e publikasion Iek lasho traio.