Ando borsh 2021 kai keras buki, a o COVID-19 andias but prame pel manush. Sar phendiaspe ando artikulo “Azhutinpe pe sa e lumia ande kacha pandemia” pokindias millonuria dolaria b te pokinelpe so trobulaspe ai kidinisaile 950 grupuria anda amare phral te azhutin le phralen.

 Kana e pandemia bariolas ande lumia, aver bedi mai zhalas pe phuv ai vi godola sas pe amare phral. Pala godo makar dasas love te azhutis ande pandemia, o Comité de Coordinadores katar le Phral kai Ningeren amen dikhlias mishto te delpe 8 millonuria dolaria te azhutis ande mai but katar 200 bedi kai nakhle. Aida dikhas so kerdile le loventsa kai dine tumendar ande dui bedi anda kakala.

 O 22 anda o mayo katar o 2021, e plaiin Nyiragongo, ande República Democrática del Congo, astardias te shudel iag ai parha. Godo pharhadias khera, escueli ai iek rig kai garavelaspe pai. Ai na numa godo, le giesa kai nakhle, e plaiin shudelas thuv chorho ando foro Goma ai zhangliaspe ke e phuv izdraili butivar. But manush nashle kotsar ai uni geletar zhi ande Ruanda.

 Anda sa le manush kai geletar katar pesko kher, 5.000 sas marturia le Jehovaske. Uni anda lende jasarde penge khera pala e iag ai parhi, ai aver ankalade lenge prame anda o kher kana geletar. Le grupuria katar le phral kai azhutin le phralen anda o Ruanda ai anda e República Democrática del Congo kerde buki kidine. O kher Betel anda o Congo phenel amenge pa iek anda le grupuria kotsar: “Mai anglal te phenelpe te zhantar katar o foro, le grupuria astarde te den jabe, pai, fotsi, gada ai aver prame, makar le manush anda o foro diliardesas”. Ande iek foro kai gelesas mai but de 2.000 phral, iek grupo kai azhutil le phralen vazdias tseri, dine prame te vusharaven pengo mui ai phendias lenge sa so te keren te na len o COVID-19 ai chi colera.

 Ande trin shon, amare phral dine mai but de 6.000 kiluria anda pirincho, 6.000 kiluria anda arho, mai but de 8.000 litruria anda zetino (vuloi) te kiraven ai mai but de 8.000 litruria anda pai. Te na jan gadiki love, o kher Betel kindias jabe andal birturia kotsar, te na anen len avrial.

 Iek phei phenel: “Jasas but briga”, e plaiin pharhadiasas lako kher, numa azhutisarde la la ai peska familia andel prame le Devleske ai ande sa le kolaver prame kai trobulas len. Voi mothol: “Fala ka o Jehova, si amen sa so trobul amen. Dikhliam amare iakhentsa ke o Jehova ninkerel amare bedi, ai kerel mai vushoro te rhevdis”.

 De but borsh ande Venezuela, nakhen bedi pala le love. Nai but jabe ai si but chorimos. Amare phralenge o traio si defial pharo. Numa e organizacion le Jehovaski chi meklias len korkorho.

 Ando borsh kai kerdiam buki 2021, diaspe mai de iek millono ai dopash dolaria te kinelpe jabe ai sapui te ningeren len kal phral kai mai trobulas len. O kher Betel anda Venezuela phenel: “Nai vushoro te tradas suako shon 130.000 kiluria katar jabe ande suako rig katar o them te ningeras len ka le phral kai trobun len”. Te na chorhavon, le phral traden jabe kai chi tholpe zhungalo. O kher Betel mai mothol: “Kindiam but jabe kai sas mai lezni (eftino) ande godia vriama ai kana nai kuchi. Ai rodas sar si mai vushoro te ningeras les”.

 O Leonel, kai si ande iek Grupo katar le phral kai azhutin le phralen ando Venezuela ai plachal les but leski buki, mothol: “Te kerau kacha buki si defial bari mange. Kako dias man e zor kai trobulas man te zhau angle de sar muli murhi rhomni pala o COVID-19. Ai sar si man but prame te kerau aliarau ke shai azhutiu ka le phral kai trobul len, dikhlem murhe iakhentsa ke o Jehova chi mekel peske foros”.

 Dikh so phendias iek phral kai mai anglal kerdiasas buki ande iek grupo katar le phral kai azhutin le phralen: “Akana simas me kon trobulas te azhutin les. Na numa dine man le prame kai trobulas amen. Vi le phral azhutisarde ka murhi rhomni ai mande, von arakhle amendar, dine amen zor ai pacha”.

 Uni bedi aven fuga. Numa, amari organizacion ningerel fuga le prame kai trobun len amare phral ai shai kerel sa godola prame pala le love kai tumen den. Ando donate.pr418.com shai dikhen sar shai den love. Sam defial naisime ke tumen den ilesa!