SIKAIMOS 22

Sar shai ningeres le lashe viesti?

THO

Kana mai sikios pa o chachimos la Bibliako shai avela gindis: “Savorhe trobun te zhanen kako!”. Ai si gadia, savorhe trobun te zhanen pa kako. Numa shai avela ke daras te phenes avrenge pa so sikios. Aida dikhas so shai keres te na daras ai te aves veselime te des duma avrentsa pal lashe viesti la Bibliake.

1. Sar te des duma pa so sikios le manushentsa kai prinzhares?

Le disipuluria le Jesusoske phende: “Nashtisaras te garavas, ai te na das duma pa so dikhliam ai so ashundiam” (Le Apostolengo 4:20). O chachimos sas vareso defial kuchi lenge ai pala godia von kamenas te den duma pa godo savorhentsa. Vi tu aliares tu gadia? Atunchi shai rodes te des duma ka kire niamuria ai amiguria pa so sikios. Kana desa duma na bister te sikaves respeto (chito Colosenses 4:6, NWT).

Te shai astares te des duma

Te astares te des duma varekasa anda kiri familia pa e Biblia, shai phenes: “Kako kurko sikilem vareso defial shukar”.
Kana iek amigo nasuavola vai avela les iek briga shai sikaves leske iek texto la Bibliako te del les zor.
Kana le manush kai keren buki tusa pushena tu so kerdian ando kurko, phen lenge so sikilian le manushesa kai sikavel tu pa e Biblia vai kana gelian ka o chidimos.
Sikau ka kire amiguria amari rig po Internet jw.org.
Phen lenge te aven tusa kana sikios pa e Biblia vai sar shai mangen te sikion pa e Biblia ando jw.org.

2. Sostar si bari prama te ningeres le lashe viesti le phralentsa?

Le disipuluria le Jesusoske chi dine duma pal lashe viesti numa le manushentsa kai prinzharenas. O Jesus “tradia le dui po dui” ande sa le foruria te ningeren le lashe viesti (Marko 6:7). Te kerdiol kacha buki gadia azhutisardias buten manushen te ashunen le lashe viesti. Ai le disipuluria sas defial veselime te keren kacha buki kidine (Lucas 10:17, NWT). Sas te plachal tu te ningeres le lashe viesti le phralentsa?

TE MAI SIKIOS

Aida dikhas so shai azhutil tu te na daras ai te aliares tu veselime kana ningeres le lashe viesti.

3. O Jehova si te avel tusa

Uni manush kai kamen te ningeren o suato jal len e briga anda so shai keren le zhene vai so shai gindin pa lende.

Ai tu, kana gindis te des duma avrentsa pa so sikios, daras? Sostar?

Dikhen o VIDEO ai den duma pa:

VIDEO: Manglem katar o Jehova te del man e zor (4:05)

So kerde te na daran le terne anda o video?

Chiton Isaías 41:10 ai den duma pa:

Te avela daras te ningeres o suato, sostar trobus te rhugis?

Zhanesas kako?

But kai agies si marturia le Jehovaske daranas te ningeren o suato. Iek anda lende sas o Sergey, vo aliarelas ke chi molas khanchi ai leske sas pharo te del duma avrentsa. Numa ande iek gies astardias te sikiol pa e Biblia. Vo phenel: “Makar sas mange dar, astardem te dau duma avrentsa pa so sikiuavas. Dem po gor ke kako dias man zor te aliarau man mishto ai kerdias te avel ande murho ilo so sikiuavas pa e Biblia”.

4. Sikau respeto

Mai anglal te des duma varekasa pa so sikios, trobus te des tu gogi so si te mothos ai trobus te gindis sar si te des duma. Chiton 2 Timoteo 2:24 [NWT] ai 1 Pedro 3:15 [NWT], ai den duma pa:

Sar shai keres so mothon kakala verseturia kana desa duma pa e Biblia avrentsa?
Shai avela kire niamuria vai amiguria chi gindin sar tute. So shai keres ai so chi trobus te keres?
Sostar si mai mishto te sikaves respeto kana des duma lentsa ai na te phenes lenge ande soste trobun te pakian?

5. Sam veselime kana das duma pal lashe viesti

O Jehova dias ka o Jesus e buki te ningerel le lashe viesti. Sar dikhelas o Jesus godia buki? Chiton Juan 4:34 [NWT], ai den duma pa:

Te jasa iek lasho jabe azhutil amen te avas saste ai veselime. Sostar phendias o Jesus ke te keras e voia le Devleski, sar kana ningeras le lashe viesti, si sar te jas iek lasho jabe?
So gindis, savi veselia shai avel tu kana desa duma pal lashe viesti?

So shai azhutil tu

Kana chidesa tu ando dopash le kurkesko, le sama sar te astares te des duma pal lashe viesti.
De duma le manushesa kai sikavel tu, sar shai sikaves ando chidimos sar te ningerelpe o suato. Kako si te azhutil tu te aliares tu gata te des duma avrentsa pa so sikios.
Dikhta ande kacha publikasion kai mothol “Uni manush phenen” ai “Uni manush pushen” te des tu gogi so shai phenes suako manusheske.

UNI MANUSH PUSHEN: “Sar san? So mai kerdian?”.