Suako anda amende alosaras so te las pe amende. Kana las amen pala o zakono le Devlesko shai uriavas amen sar si amenge drago ai sar si drago le Devleske. Aida dikhas sar azhutil amen o zakono le Devlesko.

1. Save suaturia la Bibliake azhutin amen te uriavas amen mishto?

Iek kristiano trobul te uriavelpe malades te na kerel barimata ai te sikavel ke leski gogi po than la, ai vi trobul te avel vuzho ai lashardo te sikavel ke luvudil le Devles (1 Timoteo 2:9, 10, NWT). Dikhta shtar prame kai shai sikiuas pa kako texto. 1) Amare gada trobul te sikaven ke uriavas amen “malades”. Kana gelian kai chidas amen le marturia le Jehovaske, lian sama ke chi uriavas amen sa iek fialo. Numa so thas pe amende ai sar lasharas amen sikavel ke respetis le Devles kai luvudis. 2) Te na keras “barimata” kamel te phenel ke si te arakhas so thas pe amende te na aven ginduria chorhe ai te na keras te dikhen numa pe amende. 3) Iek manush kai sikavel ke zhanel pestar chi lelpe pala fersavi moda. 4) Amare gada ai sar lasharas amen trobun te sikaven le manushenge ke luvudis ka o Del o chacho (1 Korintiana 10:31).

2. Sostar trobus te gindis ande amare phral kana alosaras sar te uriavas amen?

Suako anda amende shai alosarel sar te uriavelpe, numa trobus te las sama te na keras nasul khanikaske. Keras sa so si ande amare vast te na peravas khanikas ai te aliarenpe mishto. Pala godia las amen pala kako suato: “Suako anda amende trobul te rodel te avel drago le kolavreske pala lesko mishtimos, te vazdas les” (chito Romanos 15:1, 2, NWT).

3. Sar amaro uriaimos shai azhutil le kolavrenge te prinzharen ka o Jehova?

Kamas te las sama sar te uriavas amen kana zhas varekai, ai mai but kana zhas kai chidas amen ai kana ningeras o Suato le Devlesko. Chi kamas ke pala amare gada ai pa sar lasharas amen te na ashunen le manush e viasta kai ningeras. Kamas te azhutis le kolavren te zhanen pa o chachimos ai te avel shukar so sikavel “amaro skepitori” (Titos 2:10).

 TE MAI SIKIOS

4. Kana lasharas amen mishto sikavas ke respetis ka o Jehova

Sostar trobus te las sama mishto sar uriavas amen? Chiton Salmo 47:2 ai den duma pa:

• Amen ningeras o anau katar o Jehova, sar azhutil amen te zhanas godo te alosaras mishto amare gada?

• Gindis ke si mishto te las sama so thas pe amende kana chidas amen ai kana ningeras le lashe viesti? Sostar gindis gadia?

 5. Sar te alosaras mishto amare gada ai sar te lasharas amen

Dikhen o VIDEO.

Amare gada chi trobun te aven kuchi, trobun te aven vuzhe ai mishto ande fersavi rig kai zhasa. Chiton 1 Corintios 10:24 [NWT] ai 1 Timoteo 2:9, 10 [NWT]. Polme den duma pa sostar chi alosaras te las pe amende gada...

• ... shinde ai melale.

• ... defial kidine pe amende, vai te keren te avel kal kolaver ginduria chorhe.

Makar le kristianuria chi mai las amen pala o zakono ke o Jehova dias ka o Moises, kako zakono azhutil amen te zhanas so gindil o Jehova. Chiton Deuteronomio 22:5 ai den duma pa:

• Sostar nai vorta te uriadiol iek zhuvli te mial iek mursh ai iek mursh te mial iek zhuvli?

Chiton 1 Corintios 10:32, 33 [NWT] ai 1 Juan 2:15, 16 [NWT], ai den duma pa:

• Trobus te las sama te avela ke sar uriavas amen ai amare gada chi keren mishto le kolavrenge? Sostar?

• Kai tu beshes, sar uriadion le manush?

• Gindis ke le kristianuria shai len pe pende gadia? Sostar gindis gadia?

 SO DIKHLIAM

Kana alosaras mishto amare gada ai sar lasharas amen sikavas ke respetis ka o Jehova ai le kolavren.

So sas te mothos?

• Sostar o Jehova lel sama sar lasharas amen?

• Save suaturia la Bibliake shai azhutin amen te alosaras so te las pe amende?

• Sar amare gada ai sar lasharas amen keren te pashon vai te durion le manush katar o Del?