Ande kacha publikasion kai estudisardian, sikilian but pa o Jehova. Pala godo, kiro kamlimos karing o Del barilo gadia but ke shai avela shinadian kiro traio leste ai boldilian vai shai gindis te keres kako ande tsirha vriama. Numa polme te boldios, trobus te barios mai ando chachimos ai te mai pashos ka o Jehova pe sa e vriama. Aida dikhas sar.

1. Sostar trobus te thas amendar te avas mai amiguria katar o Jehova?

Trobus te thas amendar te avas mai amiguria katar o Jehova. Sostar? Te na avas ningerde pe aver rig ai te na duriuvas lestar (Zhiduvuria 2:1). So si te azhutil amen te luvudis chachimasa ka o Jehova? Te das mai but anda amari vriama te ningeras le lashe viesti ai te rodas aver prame kai shai keras le Devleske (chito Filipenses 3:16, NWT). Nai aver prama mai shukar de sar te luvudis ka o Jehova! (Salmo 84:10).

2. So mai trobus te keres?

Makar si te getos kacha publikasion, kiro traio sar iek kristiano toma akana astarel. E Biblia phenel ke suako kristiano trobul te parhudiol ai te avel iek manush nevo (Efisiana 4:23, 24). Te na mekesa te estudis o Suato le Devlesko ai te chides tu ande congregacion, si te sikios mai pa o Jehova ai ke fialo si vo. Rode sar te mias mai but po Del o Jehova ai parhu so trobusa anda kiro traio te veselis lesko ilo.

3. Sar si te azhutil tu o Jehova te barios ando chachimos?

E Biblia phenel: “O Del [...] kerela anda tumende te aven vorta, ai dela tumen zor ai putiera, ai kerela anda tumende manush kai nashtin te rimonpe” (1 Petri 5:10). Savorhe shai avas zumade, numa o Jehova del amen e zor te na peras (Salmo 139:23, 24). Vo shinavel ke si te del tu e zor ai e voia te luvudis les (chito Filipenses 2:13, NWT).

 TE MAI SIKIOS

4. Na mek te des duma ai te ashunes ka kiro amigo

Pala o rhugimos ai so sikilian anda e Biblia areslian te aves amigo katar o Jehova. Sar shai azhutin tu gadala dui prame te mai pashos pasha o Jehova?

Chiton Salmo 62:8 ai den duma pa:

• Te aves mai amigo katar o Jehova trobul te avel kiro rhugimos chacho ai de anda o ilo. Sar shai keres godo?

Chiton Salmo 1:2 ai den duma pa:

• Te aves mai amigo katar o Jehova trobus te chitos e Biblia ai te ankalaves o mishtimos anda late. Sar shai keres godo?

Sar shai les mai mishtimos kana estudis e Biblia? Te zhanes sar te keres kako, dikhen o VIDEO. Polme den duma pa:

• Save prame anda o video shai thos ande kiro traio?

• Pa soste kames te estudis?

 SO DIKHLIAM

Ker prame te mai aves amigo katar o Jehova ai alosar bukia te luvudis les. Gadia shai avel tu iek lasho traio akana ai mai angle!

So sas te mothos?

• Sar zhanes ke o Jehova si te azhutil tu te luvudis les chachimasa?

• So shai keres te aves mai amigo katar o Jehova?

• Te barios ando chachimos, sostar si bari prama te keres bukia le Devleske?