O Del akharel sa le manushen anda sa le thema te pashon leste ando rhugimos (1 Iovano 5:14). Numa godo chi kamel te phenel ke vo ashunel, vai ke si leske drago, fersavo rhugimos. E Biblia phenel ke o rhom trobul te respetil peska rhomnia te ashunel les o Del (1 Petri 3:7). Kana le israelituria butivar kerenas o bi lashimos, o Del chi kamelas te ashunel len. Numa te avela iek manush kerdias bezeja phare ai keilpe chachimasa, o Del ashunel lesko rhugimos. Chito Isaías 1:15; Le Apostolengo 3:19.

 Kana rhugis vi luvudis, pala godo ferdi trobus te rhugis ka o Jehova (Mate 4:10; 6:9). Ai sar sam bezejale, trobus te rhugis ando anau le Jesusosko, ke vo mulo pala amare bezeja (Iovano 14:6). O Jehova chi kamel te avel suako rhugimos sa iek fialo vai te aven ramome, kamel te rhugis leske anda o ilo. Chito Mate 6:7; Filipiana 4:6, 7.

 Amaro Del, kai kerdias amen, ashunel vi o rhugimos kai keras ande amaro gindo (1 Samuel 1:12, 13). Ai phenel amenge ke shai rhugis butivar ando gies, kana ushtias, kana zhas te sovas, mai anglal te jas ai kana si amen bedi. Chito 1 Petri 5:7; Mate 15:36.

 Traisaras mashkar manush kai chi pakianpe ando Del ai asan kana ashunen ke vo shinavel ke si te anel pacha pe Phuv, atunchi, shai avela pharo te pashuvas ka o Del (2 Timote 3:1, 4; 2 Petri 3:3, 13). Pala godo trobul te kidas amen godolentsa kai si ande amaro pakiamos te las zor ai te das len zor, ke savorhende trobul amen godo. Chito Zhiduvuria 10:24, 25.

  Te avas pasha le manush kai kamen le Devles, si te aliaras amen mai pashe katar o Del. Kana kidas amen le marturentsa le Jehovaske ande lengi khangeri shai las o mishtimos katar o pakiamos avrengo. Chito Romanuria 1:11, 12.

 Te desa tu gogi ande so sikiliam pa o Jehova ande Biblia, si te pashos leste. Gindi tu ande sa so kerdias, le lashe vorbi kai del amen ai azhutin amen, ai sa so shinavel amenge. Te das amen gogi ande sa kako ai te rhugisa, si te mol amenge but o jaraimos ai o kamlimos le Devlesko. Chito 1 Timote 4:15, 16.

 Ferdi shai aves pasha o Del te avela tu pakiamos ande leste. Numa o pakiamos si sar varekon kai trail, trobul te jal te na merel. Te na merel amaro pakiamos trobus te das amen gogi so ningerel amen te pakias gadia. Chito Mate 4:4; Zhiduvuria 11:1, 6.

 O Jehova lel sama katar godola manush kai kamen les. Vo shai arakhel len katar fersavi prama kai shai kerel te kovliol lengo pakiamos ai te na jasaren so azhukeren pe mai angle: o traio kai chi mai si te getol (Salmo 91:1, 2, 7-10). Azhutil len te avel len iek traio sasto ai te aven barikane, ai sikavel len sar te train mai mishto. Chito Iakov 1:25; 4:4, 8.