SIKAIMOS 10
Sar te zhanas savi si e religion chachi?
1. Si ferdi iek religion chachi?
“Arakhen tume katar le profeturia kai nai chache” (MATE 7:15).
O Jesus sikadias ka peske disipluria ferdi iek religion, e religion chachi. Phendias ke si sar iek drom kai ningerel len ka o traio kai chi mai getol, numa tsirha manush sas te arakhen les (Mate 7:14). O Del mangel te luvudis les ferdi sar sikavelpe ande peski Vorba, e Biblia. Godola kai luvudin les sar mothol e Biblia, kidine le ande iek pakiamos. Chito Iovano 4:23, 24; 14:6; Efisiana 4:4, 5.
2. So phendias o Jesus pal jojamne kristianuria?
“Won mothon ke zhanen le Devles; numa lengo traio sikavel ke chi zhanen les” (TITOS 1:16).
O Jesus phendias ke sas te aven jojamne profeturia kai sas te meliaren leski religion. Gadala manush phenen ke von ai lenge khangeria si kristianuria, ai makar but manush gindin ke si gadia, dikhiol sar si von. Numa le chache kristianuria train sar sikavel e religion chachi ande so keren ai ande ke fialo si. Chito Mate 24:24; Iovano 13:35.
3. Kon kerel so sikavel e religion chachi?
Aida dikhas 5 prame kai keren le chache kristianuria:
-
Presnain e Biblia sar e Vorba le Devleski. Thon sa pengi zor te lenpe pala o zakono la Bibliako ai chi lenpe pala o sikaimos le manushengo sar keren le kolaver religionuria (Mate 15:7-9). Na numa godo, thon ande pengo traio sa so sikaven le manushenge. Chito Iovano 17:17; 2 Timote 3:16, 17.
-
Presnain o anau le Devlesko, Jehova. O Jesus kerdias gadia kana sikadias o anau peske Dadesko. Dias duma le manushentsa pa o Jehova ai sikadias len te mangen ando rhugimos te avel suntsome lesko anau (Mate 6:9). Kotse kai tu beshes, savi religion kerel te prinzharen o anau le Devlesko? Chito Iovano 17:26; Romanuria 10:13, 14.
-
Den duma pa e Amperetsia le Devleski. O Jesus avilo pe Phuv te del duma pa e Amperetsia le Devleski, kai si te anel lashimos sa le manushenge. Dias duma pa godo zhi kai mulo (Luk 4:43; 8:1; 23:42, 43). Ai vi phendias ke peske disipluria sas te den duma pa godia Amperetsia. Te aresela varekon agies zhi tute ai te del duma tusa pa e Amperetsia le Devleski, anda savi religion gindis ke si? Chito Mate 24:14.
-
Von nai anda kacha lumia chorhi. Le disipluria le Jesusoske chi thonpe andel amperetsii le manushenge ai chi andel bedi la lumiake (Iovano 17:16; 18:36). Thon zor te na astardion pe lende le prame bi lashe katar e lumia. Chito Iakov 4:4.
-
Sikaven chacho kamlimos. E Vorba le Devleski sikadias len te respetin sa le zhenen avena katar avena. Le religionuria jojamne butivar thon partia le mundarimaske, numa le chache kristianuria chi keren godo (Miqueas 4:1-3). Den anda pengi vriama ai sa so si len te azhutin ai te zuriaren le manushen, numa kana keren godo chi azhukeren khanchi palpale. Chito Iovano 13:34, 35; 1 Iovano 4:20.
4. Shai des po gor savi si e religion chachi?
Savi religion sikavel ferdi so motholpe ande Biblia, presnail o anau le Devlesko ai phenel ke e Amperetsia le Devleski si te anel lashimos sa le manushenge? Ande savi religion kamenpe chachimasa sa le manush kai si ande late ai chi thon partia ka o mundarimos? So gindis tu? Chito 1 Iovano 3:10-12.
