E Biblia parhudias lengo traio

SOSTAR iek manush kai sas punk ai joliavolas ande fuga astardias te sikavel kamlimos le manushenge? Sostar iek terno anda o México meklias iek traio zhungalo? Sostar meklias te zhal pe bicicleta andel carreri iek manush anda o Japón? Dikh so sas lentsa.

“Simas lazhaviardo, barikano ai joliavavas ande fuga”​—DENNIS O’BEIRNE

KANA ARAKHADILO: 1958

THEM: INGLATERRA

PA LESTE: PUNK KAI CHI PLACHALAS LES LE MANUSH

SAR SAS MURHO TRAIO: Barilem sar catolico irlandes, ke pa e partia murhe dadeski sim irlandes. Butivar murhi familia tradelas man ande khangeri korkorho, ai godo chi plachalas man. Serau mange ke plachalas man le dieli kai avenas katar o Del. Suako riat rhugivas o rhugimos kai sikadias o Jesus; kamavas te zhanau so kamelas te mothol suako vorba anda o rhugimos.

Kana simas terno kamavas te zhanau so kerenas le manush rastafari ai kamavas te zhanau dieli pa e politika, sar le manush antinazi. Plachalas man o gindo katar le manush punk kai gindinas sar mande. Suako gies piavas draba chorhe, numa piavas mai but tsigeri dile. Piavas but pimos, nas mange pala murho traio ai chi kamavas khanikas. Nas mange drago le manush, te ankalaven mange patretsi ai te avela ke nas mange drago so denas duma, chi davas duma but. Kana dau man gogi ande sa kako, dau po gor ke simas lazhaviardo, barikano ai joliavavas ande fuga. Numa simas lasho murhe amigonentsa.

Kana sas man 20 borsh astardias te plachal man e Biblia. Iek amigo kai bikinelas draba chorhe astardias te chitol e Biblia kana sas phandado. Iek gies astardiam te das duma pa e religion, pa e khangeri ai so kerel o Beng pe lumia. Kindem iek Biblia ai astardem te sikiuau. Murho amigo ai me chitosas la ai kidasas amen te phenas so sikiliamas ai so aliarasas. But shon kerdiam gadia.

Uni prame kai aliardiam sas: ke trais ande le palune giesa; ke le kristianuria trobun te ningeren le lashe viesti katar e Amperetsia le Devleski; ke chi trobun te thonpe ande le dieli katar e lumia ai chi ande politika, ai ke e Biblia del lashe suaturia pa o traio. Zhanasas ke e Biblia mothol o chachimos, ai ke trobulas te avel iek chachi religion. Numa pushasas amen, savi si godia? Dikhliam ke le bare khangeria anda e lumia thon partia ande politika ai ke le dieli kai keren nas so phendias o Jesus. Diam po gor ke le Devleske nas drago sa godo, ai pala godia astardiam te dikhas aver religionuria kai nas defial prinzharde.

Diam duma uni manushentsa anda godola religionuria ai pushliam lendar but dieli anda e Biblia. Sar zhanasas so phenel e Biblia, ande fuga dasas po gor te avela ke so phenenas malavelas vorta la Bibliasa. Porme te das duma lentsa, mangavas katar o Del ke te avela ke godola manush sas anda e chachi religion, te sikavel mange ke trobuvas te dikhau len pale. Nakhle but shon, chi sikade amen la Bibliasa so pushasas ai chi kamavas te dikhas ka chi iek.

La vriamasa diam duma le marturentsa le Jehovaske. Kana astardiam te pushas lendar dieli, von sikade amenge la Bibliasa. So phende sas sa iek fialo so zhanasas. Pushliam lendar dieli kai chi zhanasas sar, so gindil o Del pa le tsigeri ai le draba chorhe, ai pale sikade amenge la Bibliasa. Ashiliam te zhas kai kidenpe le Marturia.

Nas mange vushoro. Sar nas mange drago le manush kai sas mishto lasharde ai lashe, chi plachaias man te aven savorhe mande ai te den duma mantsa. Chi delas mange ando shero ke savorhe sas gadia ai chi mai gelem kai kidenpe le Marturia. Manglem katar o Del ke te avela ke godola manush sas len e religion chachi, te azhutil man te amboldau pale. Atunchi kamlem chachimasa te astarau te sikiuau pa e Biblia le Marturentsa.

SAR E BIBLIA PARHUDIAS MURHO TRAIO: Zhanavas ke trobuvas te mekau le draba chorhe ai ande fuga meklem len. Numa nas mange vushoro te mekau le tsigeri. Kamlem te mekau len butivar ai nashtisardem. Phende mange ke uni manush mekle len kana shude e pachika le tsigerengi, pala godia vi me manglem katar o Jehova te azhutil man. De atunchara chi mai pilem. Sikilem ke si bari diela te rhugiu man ka o Jehova chachimasa.

Aver diela kai parhudem sas sar davas pe mande. E pervo data kai gelem kai kidenpe le Marturia sas man le bal opre ai forbosarde vuneto, la vriamasa forbosardem len naranja. Sas man kaltsi jeans ai iek rajami morchiaki. Chi davas po gor sostar trobuvas te parhuvau uni prame makar le Marturia phende mange. Deman gogi ande so phenel 1 Iovano 2:15-17: “Trobul te na avel tumenge drago e lumia ai chi le dieli kai si ande lumia. Ke kodo kai si leske drago e lumia, e dragostia le Devleski nai ande leste”. Dem po gor ke te sikavau murho kamlimos le Devleske, trobuvas te parhudiuvau. Sostar sar lasharavas man sikavavas ke sas mange drago e lumia. Ai gadia kerdem.

Aliardem ke nas le Marturia kon kamenas te zhau kai kidenpe, sas o Del, sar phenel Zhiduvuria 10:24, 25. Kana astardem te zhau suako data kai kidenpe ai te prinzharau le phralen, kamlem te boldiuvau.

SAVO LASHIMOS LEM: Plachal man te gindiu sar o Jehova mekel amen te avas leske amiguria. Lesko kamlimos ai sar sikavel mila azhutisardias man te kerau sar leste ai te kerau sar lesko shau o Jesukristo (1 Petri 2:21). Sikilem ke, makar thau mandar te avau iek kristiano mai lasho shai kerau dieli kai plachal man. Thau mandar te avau pakivalo ai te sikavau kamlimos, ai te avau sar o Kristo kana sim murha rhomniasa ai murhe shavesa. Ai lau sama katar murhe phral. Te kerau sar o Kristo azhutisardias man te avau mishto mantsa, ai te kamau le kolavren.

“Sas lashe mantsa”​—GUADALUPE VILLARREAL

KANA ARAKHADILO: 1964

THEM: MEXICO

PA LESTE: TRAIO ZHUNGALO

SAR SAS MURHO TRAIO: Barilem murhe 6 phralentsa ando Hermosillo (Sonora, México), iek foro kai nas but love. Murho dat mulo kana simas tsinorho, pala godia murhi dei trobusardias te del amen te jas savorhen. De tsinorhara astardem te kerau buki te azhutiu la familia. Butivar zhavas purhango ke nas amen love te kinas papucha. Sar but famili, amen traisas ande iek kher tsinorho.

Sar murhi dei kerelas buki suako gies, nashtilas te arakhel amen. Kana sas man 6 borsh iek terno kai sas les 15 borsh but vriama amisailo mande zhungales. Iek diela kai kerdias mange godo, sas ke chi zhanavas so plachalas man. Gindivas ke sas mishto te plachal man le mursh. Kana dem duma le dojtorentsa ai le rashantsa te azhutin man, phende mange ke nas man chi iek beda ai ke so aliaravas sas vorta.

Kana sas man 14 borsh phendem ke simas homosexual. Ai sas man godo traio 11 borsh mai, ande godia vriama anklistem bute murshentsa. Sikilem sar te shinau le bal ai thodem iek salon de belleza. Sas man sa godo ai nas man iek traio veselime, jojavenas man ai javas kino. Aliaravas ke so keravas nas mishto ai pushavas man te avela sas manush lashe ai chache.

Serdem mange katar murhi phei, ke boldili sar marturo le Jehovasko porme te sikiol pa e Biblia. Voi phenelas so sikiolas, numa chi lavas lake opre. Numa plachalas man o traio kai sas la ai laki tsera. Murho kumnato ai voi sikavenaspe lashimos ai ke kamenaspe ai respetinaspe. La vriamasa astardem te sikiuau pa e Biblia iekha zhuvliasa kai sas Marturo. Kana astardem te sikiuau nas mange drago te estudiu, numa la vriamasa astardias te plachal man mai but.

SAR E BIBLIA PARHUDIAS MURHO TRAIO: Butivar le manush asanas mandar, numa kana gelem kai kidenpe le marturia le Jehovaske von chi kerde godo. Kotse dikhlem vareso kai chi dikhlemas mai anglal. E pervo data kai gelem dine duma mantsa mishto ai sas lashe. Pala godia aliardem man mishto.

E pervo data kai gelem ka iek baro kidimos dikhlem ke sa le manush sas sar murhi phei: pakivale ai lashe. Gindisailem: “Avela kakala manush lashe so rodau de dumut?”. Nashtivas te pakiau ke sas manush kidine ai ke kamenaspe, ai ke denas anglal ka so pushavas la Bibliasa. Dem po gor ke so phenelas e Biblia azhutilas len ande lengo traio. Zhanavas ke trobuvas te parhuvau but te avau sar lende.

Trobusardem te parhuvau sa murho traio, ke traivas sar iek zhuvli. Trobusardem te parhuvau but, sar davas duma, so keravas, le gada, le bal, le amiguria, sa. Le amiguria kai sas man phenenas mange: “Sostar keres kako? Mai anglal sanas mishto. Na sikio pa e Biblia. Si tu sa ando traio”. E prama mai phari mange sas, te mekau le prame bimalade kai keravas.

So phenel 1 Corintios 6:9-11 (La Biblia. Traducción del Nuevo Mundo) areslo ande murho ilo ai aliardem ke shai parhuvavas, kothe phenel: “Chi zhanen ke le manush kai nai vorta chi avela lenge dini e Amperetsia le Devleski? Na jojaven tumen. Le manush kai keren prame sexuales bimalade, kai luvudin aver dela, le ansurime kai phiren avresa kai nai lako rhom vai leski rhomni, le mursh kai meken te keren lentsa prame marime, le mursh kai phiren avre murshentsa [...] chi avela lenge e Amperetsia le Devleski. Ai, uni anda tumende kerenas gadia. Numa porme tumen sanas vuzhe”. O Jehova azhutisardias kal manush kai traisarde de dumut te parhudion, ai vi azhutisardias man. Nakhli but vriama ai trobusardem te thau but mandar. Le lashe suaturia ai o kamlimos katar le Marturia azhutisardias man but.

SAVO LASHIMOS LEM: Agies sim ansurime ai murha rhomniasa sikavas amare shaves te trail sar phenel e Biblia. Meklem palpale o traio kai sas man, akana si man but dieli shukar ai kerau buki kai kidau man. Sim phuro ande iek rig kai kidenpe le marturia le Jehovaske ai azhutisardem uni manushen te sikion o chachimos la Bibliako. Sar parhudem murho traio azhutisardias murha da te astarel te sikiol pa e Biblia ai la vriamasa boldili sar Marturo. Iek anda murhe phea kai sas la iek traio zhungalo parhudias pesko traio ai kerdili marturo le Jehovasko.

Uni manush kai phenenas mange ke chi trobuvas te parhuvau, akana phenen ke murho traio si mai lasho. Ai me zhanau so azhutisardias man. Makar rodem te azhutin man manush anda kacha lumia, nashtisarde; numa o Jehova azhutisardias man chachimasa. Makar chi aliaravas man bari diela, vo dikhlias pe mande ai sikadias mange kamlimos ai rhavda. Ai godo azhutisardias man chachimasa: ke iek Del kamlimasko ai jarano dikhlias pe mande ai shinadias mange iek traio mai lasho.

“Aliaravas man korkorho ke khanchi chi pherelas man ai chi simas veselime”​—KAZUHIRO KUNIMOCHI

KANA ARAKHADILO: 1951

THEM: JAPÓN

PA LESTE: ZHALAS PE BICICLETA

SAR SAS MURHO TRAIO: Barilem ando foro Shizuoka (Japón), murha familiasa samas ojto ai traisas ande iek kher tsinorho. Murho dat bikinelas bicicleti ai de tsinorhara ningerelas man kai carreri. Ai pala godo de tsinorhara astardias te plachal man te zhau pe bicicleta (o ciclismo). Vo kamelas te avau iek ciclista profesional, pala godo kana sas man uni 14 borsh astardias te sikavel man sar te zhau mai mishto pe bicicleta. De kal 16 zhi kal 18 trivar nirisardem e carrera kai lasharelpe te prasten le mai lashe anda o them. Iek universidad akhardias man te estudiu, numa alosardem te azhutin man te zhau mai mishto pe bicicleta. Ai kana sas man 19 borsh gata simas profesional.

Ande godia vriama, kamavas te avau o mai lasho anda o Japón. Kamavas te lau but love ai te dau murha familia iek traio shukar, ai pala godia thodem mandar te avau iek ciclista mai lasho. Kana zhavas pe bicicleta ai zhalastar e zor mandar, phenavas mange ke arakhadilem te avau ciclista ai ke nashtivas te peravau le vast. Ande tsirha vriama astardias te zhal mange mishto. Shou var ashilem duito.

Sas man bari rhavda ai simas iek andal manush kai mai nirinas, pala godia thode mange o anau “Le punrhe zurale anda Tokai”, iek rig anda o them. Sar numa kamavas te niriu, le kolaver manush kai prastenas daranas mandar ke nas mange mila khanikastar. Sar sas man love shai kinavas mange so kamavas. Kidem mange iek kher kai sas les iek baro gimnasio, ai iek matora kai molas sar o kher. Te kerdiolpe mai but murhe love thodem len andel khera ai andel empresi.

Aliaravas man korkorho ke khanchi chi pherelas man ai chi simas veselime. Ande godia vriama simas ansurime ai sas man trin shave. Butivar joliavavas murha rhomniasa ai murhe shaventsa anda intaino. Dikhenas murho mui ai denas po gor te avela simas defial joliariko.

Iek gies murhi rhomni astardias te sikiol pa e Biblia le marturentsa le Jehovaske ai godo parhudias amaro traio. Kana voi phendias ke kamelas te zhal kai kidenpe le Marturia, alosardem te zhas sa e familia. Zhi agies serau iek phuro anda e congregacion ke avilo khere te astarau te sikiuau pa e Biblia. So sikilem areslo ande murho ilo.

SAR E BIBLIA PARHUDIAS MURHO TRAIO: Chi si te bistrau kana chitosardem so mothol Efesianuri 5:5 (E Nevi Viasta ai o Psalmo). Kotse phenel: “chi jekh kurvari, vai jekh kai nai vuzhio, vai xanzhvalo, (o xanzhvalo si sar kudo kai patial ande le staturi,) chi avela len khanchi ande e amperetsia le Kristoski ai le Devleski”. Dem po gor ke te khelau mange pe lovende ai te zhau pe bicicleta si sar te kamava te niriu numa me ai te jasaren le kolaver, pala godia murhi gogi sikadi pala e Biblia astardias te phenel mange ke nas vorta. Aliardem ke te kamava te kerau so mangel o Del trobuvas te mekau te zhau andel carreri pe bicicleta, vareso kai nas vushoro mange.

Getosardemas o borsh kai mai mishto gelem pe bicicleta. Chi kamavas te mekau kacha buki. Numa, te sikiuau pa e Biblia delas man pacha, vareso kai chi delas man te zhau pe bicicleta. Trivar gelem andel carreri porme te sikiuau pa e Biblia, numa ande murho ilo kamavas te mai zhau. Chi zhanavas so te kerau te dau te jal murha familia. Murho dat sas defial tristo ai ka murhe niamuria nas lenge drago murhi nevi religion. Pala godia anklisto mange iek ulcera.

Ande godia vriama so azhutisardias man sas, te na mekau te sikiuau pa e Biblia ai te zhau kai kidenpe le Marturia. Ai gadia murho pakiamos bariolas. Manglem katar o Jehova te ashunel man, ai te sikavel mange ke vo ashunel kana rhugis amen leste. Aliardem man mai mishto kana murhi rhomni phendias mange ke chi trobulas la iek kher baro te avel veselime. Tsirha po tsirha murho traio lashavolas.

SAVO LASHIMOS LEM: Sikilem ke so phenel o Jesus ando Mate 6:33 si chacho, kana phenel: “Rode mai anglal e amperetsia le Devleski, ai so si vorta angla Del; ai O Del, dela tume sa kodola dieli opral”. Ande kakala borsh sas amen “sa kodola dieli” kai o Jesus phendias, le dieli kai trobun amen te trais. Makar akana chi lau but love sar lavas de mai anglal, ande gadala 20 borsh sas amen so trobulas amen.

Te luvudiu ka o Del murhe phralentsa dias man veselia ai le borsh nakhen fuga. Akana murhi familia mai mishto la. Ai murhi trin shave penge rhomniantsa luvudin ka o Jehova.