E Biblia parhudias lengo traio

SOSTAR iek manush kamlias te amboldel ka o luvudimos kai sikilo kana sas tsinorho? Sar araklias iek terno ka o dat kai kamelas sa pesko traio? Dikh so von mothon.

“Trobuvas te amboldau pale ka o Jehova”.​—ELIE KHALIL

KANA ARAKHADILO: 1976

THEM: CHIPRE

PA LESTE: O SHAU JASARDO

SAR SAS MURHO TRAIO: Arakhadilem ando Chipre numa barilem ando Australia. Murhe dada sas marturia le Jehovaske, ai kerde sa so sas ande lenge vast te sikaven man te kamau ka o Del ai leski Vorba, e Biblia. Numa kana simas terno kamavas te kerau so me kamavas. Ankliavas chorial de riate ai, murhe amigonentsa, choravas timoulia ai butivar thavas man ande but baiuria.

Kana astardem te kerau sa kako keravas le chorial, ke chi kamavas te joliarau murhe daden. Numa tsirha po tsirha godia dar zhalastar. Murhe amiguria sas mai bare mandar ai chi kamenas ka o Jehova. Von sikavenas man te kerau prame kai nas vorta. Ai ande iek gies, phendem murhe dadenge ke chi kamavas te zhanau khanchi pa lengo pakiamos. Makar kamle te azhutin man, chi kamavas te ashunau len. Shindem lengo ilo.

Gelemtar kheral ai astardem te piau draba chorhe. Vi thodem te bariol marihuana ai te bikinau. Ningeravas iek traio chorho ai siempre zhavas te khelau. Kana varekon phenelas vai kerelas vareso kai chi plachalas man joliavas man ande fuga. Butivar tsipivas vai maravas man. Chachimasa, keravas sa so chi trobul te kerel iek kristiano.

SAR E BIBLIA PARHUDIAS MURHO TRAIO: Kerdilem amigo katar iek raklorho kai pelas draba chorhe ai ke jasardias peske dades de tsinorhara. Univar beshasas de riate ai dasas duma but chasuria. Butivar phenelas mange sar kamelas te dikhel pale peske dades. Sar me zhanavas de tsinorhara ke si te zhuvindin le mule, phendem leske so kerdias o Jesus kana zhuvindisardias le mulen ai shinadias ke si te anel len pale ando traio (Jono 5:28, 29 , E Nevi Viasta ai o Psalmo [ENV]). Phenavas leske: “De tu gogi, si te dikhes pale kire dades, ai savorhe si te trais ande iek paraiso pe Phuv”. Godo dias leske ando ilo.

Univar, murhe amigo delas duma pa le palune giesa vai pa e Trinidad. Me lavas leski Biblia te sikavau leske uni texturia kai sikaven o chachimos pa o Jehova, o Jesus ai le palune giesa (Iovano 14:28; 2 Timote 3:1-5) Sode mai davas duma ka murho amigo pa o Jehova, mai davas man gogi ande Leste.

Tsirha po tsirha, astardias te bariol pale o chachimos la Bibliako kai sas garado ande murho ilo, kai murhe dada thode zor te sikaven man de tsinorhara. Univar kana simas ande uni fiesti, ai piavas draba chorhe murhe amigonentsa, astaravas te gindiu man ando Jehova. Makar but anda murhe amiguria phenenas ke kamenas le Devles, so kerenas chi sikavelas godo. Chi kamavas te sikavau iek diela kai chi sim, aliardem ke trobuvas te amboldau pale ka o Jehova.

Chachimasa, iek diela si te zhanes so trobus te keres ai aver te keres la. Uni prame sas mange vushoro te mekau len, sar le draba chorhe ai le amiguria kai kerenas prame kai nai vorta. Vi astardem te sikiuau pa e Biblia iekhe phuresa kai si Marturo.

Numa aver diela sas mai phare te parhuvau, sar te na joliavau ande fuga. Shai ninkeravas e joli pe iek vriama, numa univar nashtivas ai pala godo aliaravas man doshalo. Simas defial tristo, pala godo kamlem te dau duma le manushesa kai sikavelas man pa e Biblia. Siempre sikavelas mange rhavda ai kamlimos, gadia delas man zor. Iek data, phendias mange te chitou iek Atalaya kai delas duma pa e rhavda.  a Dikhliam so shai kerau te na joliavau ande fuga. Seravas so chitosardem ando artikulo ai rhugivas man but ka o Jehova, gadia tsirha po tsirha parhudilem. Ando abril katar o 2000 boldilem sar marturo le Jehovasko. Murhe dada sas defial veselime.

SAVO LASHIMOS LEM: Si man pacha ando ilo ai iek gogi vuzhi, ke chi mai piau draba chorhe ai chi kerau prame bi malade. Kana kerau buki, kana kidau man le phralentsa vai kana kerau aver diela kai plachal man, kerava so kerava sim defial veselime ai dikhau o traio lashe iakhentsa.

Naisiu ka o Jehova pala le dada kai si man, von chi mekle te azhukeren man. Vi dau man gogi andel vorbi kai phendias o Jesus ando Iovano 6:44, kai mothol: “Khonik nashtil te avel mande, te na avela O Dat kai tradia ma te tsirdel les mande”. Sim veselime kana dau man gogi ke amboldem ka o Jehova sostar vo andias man peste.

“Kamavas te avel man iek dat”​—(MARCO ANTONIO ALVAREZ SOTO)

KANA ARAKHADILO: 1977

THEM: CHILE

PA LESTE: SAS ANDE IEK GRUPO KAI KERELAS MUZIKA DEATH-METAL

SAR SAS MURHO TRAIO: Barilem murha dasa ande Punta Arenas, ande iek foro kai si ando estrecho de Magallanes. Murhe dada meklepe kana mande sas 5 borsh, godo kerdias te aliarau man korkorho. Kamavas te avel man iek dat.

Murhi dei sikiolas pa e Biblia le marturentsa le Jehovaske ai ningerelas man kai kidenpe. Numa nas mange drago te zhau, ai univar javas o traio po drom. Meklem te zhau kana sas man 13 borsh.

Ande godia vriama sas mange drago e muzika ai simas lasho ande godo. Kana sas man 15 borsh gilabavas heavy-metal ai death-metal andel fiesti kai zhanas but manush, andel kafanabi ai fiesti mai tsinorhe. Kidavas man manushentsa kai zhanenas pa e muzika, godo kerdias te avel mange drago e muzika clasica. Astardem te estudiu ande iek escuela kai sikaven muzika. Kana sas man 20 borsh gelem te beshau ando Santiago te estudiu mai. Ai sa godia vriama chi meklem o heavy-metal ai o death-metal.

Numa aliaravas murho traio nango. Te na aliarau man gadia, makiuvavas ai piavas draba chorhe murhe amigonentsa anda o grupo katar e muzika, kas me gindivas ke sas murhi familia. Simas iek manush kai keravas so me kamavas, lavas pe mande ando kalimos, mekavas le bal (shor) po mui ai mekavas le bal lungi zhi ka mashkar.

Pala sar simas butivar javas man ai sas man bedi la krisasa. Iek gies, iek grupo kai bikinelas draba chorhe amisaile ka murhe amiguria ai mande. Sar simas pilo astardiam te maras amen, ai marde man gadia de zurales ke parhade murhi falka.

So mai dukhadias man avilo katar le manush kai sas pasha mande. Iek gies dem po gor ke murho amigo ai murhi zhuvli jojavenas man de dumut, ai murhe kolaver amiguria zhanenas ai chi phende mange khanchi. Shindilo murho ilo.

Gelem palpale ande Punta Arenas ai astardem te sikavau muzika ai violonchelo. Vi keravas muzika andel grupuria katar heavy-metal ai death-metal. Ande godia vriama prinzhardem ka e Sussan, iek shukar rakli, ai astardem te traiu lasa. La vriamasa e Sussan zhanglias ke laki dei pakialas ande Trinidad ai ke me chi pakiavas ande godo. Pala godia pushlias mandar: “Savo si o chachimos?”. Phendem lake ke o sikaimos pa e Trinidad si jojaimos ai makar me nashtivas te sikavau lake la Bibliasa, ei zhanavas kon shai sikavel lake. Phendem lake ke le marturia le Jehovaske shai sikaven lake la Bibliasa. Atunchi kerdem vareso kai chi kerdem but borsh: rhugisailem ka o Del ai manglem te azhutil man.

Uni giesa mai angle dikhlem iek manush kai mialas mange prinzhardo ai pushlem les te avela si marturo le Jehovasko. Makar darailo pala sar simas furiardo, dias duma mantsa mishto kana pushlem les kai kidenpe le marturia le Jehovaske. Kotse dem po gor ke o Jehova ashundias murho rhugimos. Gelem kai kidenpe le Marturia ai beshlem palal te na dikhel man khonik. Numa but prinzharde man de kana zhavas kana simas tsinorho. Aliardem bari pacha kana dine man angali ai sikade mange kamlimos. Sas sar te avela ke amboldem khere. Kana dikhlem ka o Marturo kai sikavelas man e Biblia de tsinorhara, manglem lestar te sikavel man pale.

SAR E BIBLIA PARHUDIAS MURHO TRAIO: Iek gies chitosardem Proverbios 27:11, kai mothol: “Av jarano murho shau ai veselisar murho ilo”. Kana dikhlem ke iek manush shai veselil ka o Del kai kerdias sa o universo, areslo mange ando ilo. Kotse dem po gor ke o Jehova sas o dat kai rodem sa murho traio.

Kamavas te dikhel pe mande murho Dat kai si ando cheri ai te kerau leski voia, numa simas phanglo kal draba chorhe ai ka o pimos but borsh. Aliardem so kamlias te sikavel o Jesus ando Mate 6:24, kai mothol “khonik nashti podail duie gazden”. Thavas zor te parhuvau murho traio ai 1 Korintianuri 15:33 (E Nevi Viasta ai o Psalmo [ENV]) azhutisardias man, kotse phenel: “le zhiungale vortacha rimon le lashe dieli”. Aliardem ke trobuvas te duriuvau katar le manush ai te mekau te zhau ande uni riga kai chi azhutinas man te parhuvau murho traio. So mothol e Biblia si o chachimos: trobuvas te thau zor te duriuvau katar le dieli le chorhe te na perau ando bezej (Mateo 5:30, La Biblia. Traducción del Nuevo Mundo [NWT]).

Sar plachalas man but e muzika, e diela mai phari mange sas te mekau o heavy-metal. Numa murhe amiguria le Marturia azhutisarde man te shai kerau le. Meklem o pimos, le draba chorhe, shindem le bal, shindem le shor ai vi meklem te lau pe mande ando kalimos. Kana phendem ka e Sussan ke kamavas te shinau le bal, nashtilas te pakial ai phendias mange: “Si te zhau tusa kai chidenpe le Marturia. Kamau te zhanau so keren kotse”. Plachaiala but ai ande tsirha vriama astardias te sikiol pa e Biblia. La vriamasa ansurisailiam, ai ando 2008 le dui boldiliam sar marturia le Jehovaske. Agies sam veselime te luvudis ka o Jehova murha dasa.

SAVO LASHIMOS LEM: Skepisailem anda iek lumia kai del iek veselia jojamni ai amiguria kai atsaven. Zhi agies drago mange e muzika, numa akana alosarau so ashunau. Pa so nakhlem ande murho traio shai azhutiu murha familia ai avren manushen, ai mai but ka le terne. Kamau te azhutiu len te den po gor ke but andal dieli kai del kacha lumia shai mial shukar numa chi mol khanchi (Filipenses 3:8, NWT).

Te avau pasha o Del azhutisardias man te arakhau lashe amiguria kai kidas amen le kristianuria. Kotse dikhau kamlimos ai pacha. Numa e diela mai bari si ke arakhlem o dat kai kamavas: o Jehova.

[Nota]

[Suato]

“Shai amboldem ka o Jehova sostar vo andias man”