E Biblia parhudias lengo traio

Savi diela dias les mai veselia ka iek manush anda o Escocia kai sas les iek bari buki? Sar iek manush anda o Brasil parhudias iek traio chorho ai meklias te pel cocaina? So azhutisardias ka iek terno anda o Eslovenia te mekel o pimos? Dikh so von mothon.

“Murho traio mialas defial shukar” (JOHN RICKETTS)

KANA ARAKHADILO: 1958

THEM: ESCOCIA (REINO UNIDO)

PA LESTE: ZHALAS LESKE MISHTO ANDEL BUKIA

SAR SAS MURHO TRAIO: De tsinorhara sas man suako fialo.

Murho dat kerelas buki ando ejercito ande Gran Bretaña, anda godia murhi familia ai me mukisailiam butivar. Na numa beshliam ando Escocia, vi geliam te beshas ande Ingraterra, Niamtso, Kenia, Malasia, Irlanda ai ando Chipre. Kana sas man 8 borsh astardem te zhau te sikiuau ande but escueli anda o Escocia ai getosardem te estudiu ande Universidad Cambridge.

Kana sas man 20 borsh, kerdem buki ande industria katar o petroleo 8 borsh. Pervo ande América del sur, porme ando África ai getosardem ande Australia Occidental, kotse vazdem iek bari empresa kai mai angle bikindem.

Pala le love kai lem kana bikindem e empresa, meklem te kerau buki kana sas man 40 borsh. So sas te kerau akana ke sas man but vriama? Astardem te zhau pe suako rig ai murho traio mialas defial shukar. Phiradem man e Australia duvar pe moto ai vi phiradem man pe sa e lumia.

SAR E BIBLIA PARHUDIAS MURHO TRAIO: Mai anglal te mekau e buki, aliaravas ke trobuvas te naisiu le Devleske pala o traio kai ningeravas. Pala godia astardem te zhau ka e Iglesia Anglicana, kai zhavas de tsinorhara, numa kotse chi sikavenas but anda e Biblia. Porme gelem te sikiuau kai sas le mormones, numa kotse chi lenas opre so mothol e Biblia ai godo chi plachaias man.

Iek gies, le marturia le Jehovaske marde murho vudar. Dem po gor ande fuga ke so pakian ankalado lo anda e Vorba le Devleski. Iek texto la Bibliako kai sikade mange sas 1 Timote 2:3, 4 kai phenel ke o Del kamel ke sa le manush te skepinpe ai te prinzharen mishto o chachimos la Bibliako. Lem sama ke le Marturia na numa kamen te prinzharen e Biblia, vi kamen te aliaren la mishto.

Kana astardem te sikiuau lentsa aliardem o chachimos la Bibliako.

Plachaias man te zhanau ke o Del ai o Jesus nai iek fialo, ai ke nai iek trinidad (Iovano 14:28; 1 Korintiana 11:3). Dem po gor ke o chachimos sas vushoro te aliardiol ai ke jasardem but vriama te shai aliarau so si e trinidad.

Ande tsirha vriama astardem te zhau kai kidenpe le Marturia. Plachaias man lengo kamlimos ai sar thon ande pengo traio o chachimos la Bibliako. Godola manush mialas mange sunturia. O kamlimos o chacho kai sikavenas penge azhutisardias man te dau po gor ke von si ande religion e chachi (Iovano 13:35).

SAVO LASHIMOS LEM: Polme te boldiuvau prinzhardem ka e Diane, iek zhuvli lashi kai barili sar marturo le Jehovasko. Plachaias man pala le lashe dieli kai sas la ai pala godo ansurisailem lasa. O Jehova suntsosardias man lasa, sostar sas iek lashi amiga ai azhutisardias man ande sa.

Kamasas sa amare ilesa te ningeras le lashe viesti kai mai trobulaspe, pala godia ando 2010 mukisailiam ande Belice, ando Centroamérica. Katse predikis le manushenge kai kamen le Devles ai kamen te prinzharen les mai.

Akana kai zhanau o chachimos pa o Del ai so mothol e Biblia aliarau pacha ando ilo. Sar dau but anda murhi vriama te ningerau le lashe viesti, azhutisardem ka but manush te prinzharen e Vorba le Devleski. Aliarau bari veselia kana dikhau ke e Biblia parhuvel o traio le manushengo, gadia sar parhudias murho traio. Chachimasa arakhlem sar te naisiu ka o Jehova pala o traio kai dias man.

“Von sas defial lashe mantsa” (MAURICIO ARAUJO)

KANA ARAKHADILO: 1967

THEM: BRASIL

PA LESTE: NINGERELAS IEK TRAIO MELALO

SAR SAS MURHO TRAIO: Barilem ando Avaré, iek foro tsinorho anda o San Pablo, kai le manush kai beshen kotse nai len but love.

Kana me arakhadilem gata mulo sas murho dat. De tsinorhara zumavavas mange le gada murha dake kana voi nas khere. Mishkivas man sar iek zhuvli, ai le manush astarde te phenen ke me simas homosexual. La vriamasa astardem te avel man sexo raklorhentsa ai vi murshentsa mai bare.

Kana simas terno zhavas kal birturia de riate, kal kafanabi ai kal khangeria te rodau mursh ai zhuvlia kasa te avel man sexo. Kana sas e vriama katar o carnaval , lavas pe mande sar zhuvli ai khelavas andel desfiluria katar le escueli anda e samba. Zhalas mange defial mishto.

Murhe amiguria sas homosexualuria, zhuvlia chorha ai manush kai penas draba chorhe. Uni anda lende phende mange te piau crack (cocaina), ai astardias te plachal man fuga. Univar beshavas lentsa sorho riat ai piavas tsigeri, ai vi kana simas korkorho piavas sorho gies. Mialas ke simas defial nasualo ai astarde te phenen ke sas man sida.

SAR E BIBLIA PARHUDIAS MURHO TRAIO: Ande godia vriama prinzhardem kal marturia le Jehovaske. Von sas defial lashe mantsa. Chitosarde mange Romanos 10:13 (La Biblia, Traducción del Nuevo Mundo [NWT]), kai phenel ke “sa godola kai akharena ka o Jehova pe lesko anau avena skepime”. Kotse aliardem ke si bari prama te akharas le Devles pe lesko anau. Butivar, porme te piau crack sorho riat, putravas e feliastra, dikhavas o cheri ai rhugivas man ka o Jehova asuentsa pel iakha ai phenavas te azhutil man.

Dem po gor ke murhi dei jalas but kino kana dikhelas o traio kai ningeravas. Pala godia aliardem ande murho ilo ke trobuvas te mekau le draba le chorhe. Porme, ande tsirha vriama astardem te sikiuau pa e Biblia le Marturentsa. Von phende mange ke te sikiuau pa e Biblia sas te del man zor ai te azhutil man te mekau le draba le chorhe. Ai chachimasa azhutisardias man.

Kana mai aliaravas o chachimos la Bibliako, mai davas po gor ke trobuvas te parhuvau but dieli anda murho traio. E prama mai phari mange sas te mekau e homosexualidad, sostar de kin serau barilem ande godo traio. Vareso kai trobuvas te kerau, sas te duriuvau katar le amiguria kai sas man de dumut, ai te mekau te zhau kal birturia ai kal pub de riate.

Makar sa kako nas vushoro mange, delas man zor te serau ke o Jehova lelas sama mandar ai ke sa so keravas te parhuvau murho traio molas leske but (1 Iovano 3:19, 20). Ando borsh 2002 meklem sa le prame bi malade, sar e homosexualidad, ai boldilem sar marturo le Jehovasko.

SAVO LASHIMOS LEM: Kana murhi dei dikhlias sar parhudilo murho traio plachaias la but ai astardias te estudil e Biblia. Numa dias la iek infarto cerebral (pharhuli iek vuna ande lako shero). Numa godo chi kerdias te mekel te bariol lako kamlimos karing o Jehova ai leski Vorba.

De 8 borsh dau but anda murhi vriama te sikavau le manushen o chachimos la Bibliako. Univar chachimasa trobuvas te ankalavau anda murho shero le ginduria bi malade. Numa azhutil man te zhanau ke, te na perau ande godola prame, o Jehova veselime lo mantsa.

Te pashuvau pasha o Del ai te traiu sar vo kamel, azhutisardias man te respetiu man ai te avau mishto mantsa. Akana shai phenau ke sim iek manush veselime.

“Simas iek manush ke kana piavas chi mai terdiuvavas” (LUKA ŠUC)

KANA ARAKHADILO: 1975

THEM: ESLOVENIA

PA LESTE: PIAVAS BUT PIMOS

SAR SAS MURHO TRAIO: Arakhadilem ande Liubliana, iek foro anda o Eslovenia. Barilem ande pacha, numa kana sas man 4 borsh murho dat mundardilo. De atunchara, murhi dei trobusardias te kerel but buki te bariarel murhe phrales ai man.

Kana sas man 15 borsh gelem te beshau ka murhi mami. Sas mange drago te beshau lasa sostar murhe amiguria sas pashe, ai sar nas murhi dei shai keravas so me kamavas. Kal 16 borsh kerdilem amigo katar uni manush kai anklenas te pen kana getolas suako kurko. Meklem te barion murhe bal ai lavas pe mande te dikhen ke chi pakiavas o mui khanikasko. Polme astardem te piau tsigeri.

Zumadem but draba chorhe, numa so sas mange drago mai sas o pimos. Ande tsirha vriama piavas korkorho mai but katar iek voiaga (stakla) mol. Zhanavas so te kerau te na den po gor ke simas mato. Univar makar murho aburo purhilas man, khonik nashtilas te del po gor sode litri mol vai biaria pilemas.

Univar kana ankliasas, me simas kon azhutivas ka murhe amiguria te inkerdion ande punrhende, makar me pilemas mai but lendar. Iek gies ashundem ka iek anda murhe amiguria te mothol le kolavreske ke me simas iek manush ke kana pel chi mai terdiol. Godola suaturia dukhade man but ke ando Eslovenia akharen gadia le manushen kai si makiarne.

Astardem te dau man gogi so keravas murhe traiosa, aliaravas ke chi movas khanchi ai godo diliarelas man ke gindivas ke sa so keravas sas intaino.

SAR E BIBLIA PARHUDIAS MURHO TRAIO: Ande godia vriama lem sama ke iek terno kai zhalas mantsa ande escuela parhudilo, sas mai lasho, ai kamavas te zhanau sostar. Akhardem les te pias iek kafa ai te das duma. Phendias mange ke astardias te estudil e Biblia le marturentsa katar o Jehova. Ai vi phendias mange pa uni dieli kai sikiolas. Sar chi zhanavas khanchi pa so mothol e Biblia, sa so motholas mange sas nevo. Astardem te zhau kai kidenpe le Marturia ai te estudiu e Biblia lentsa.

Gadia sas sar sikilem o chachimos. Iek prama kai sikilem si ke sam ande iek vriama kai e Biblia akharel “le palune giesa” ai ke fuga o Del si te ankalavel le manushen bilashe kai si pe Phuv (2 Timoteo 3:1-5; Psalmo 37:29, E Nevi Viasta ai o Psalmo [ENV]). Atunchi kamlem te khosau murho traio te avau iek anda godola manush lashe.

Kana phenavas ka murhe amiguria so sikilem anda e Biblia, but anda lende asanas mandar. Numa godo azhutisardias man te dau po gor ke von nas lashe amiguria. Vi dem po gor ke kana kidavas man godola manushentsa pale piavas. Von azhukerenas te getol o kurko te astaren te pen ai te makion pale.

Astardem te rodau amiguria neve mashkar le marturia le Jehovaske. Von na numa, denas man zor, vi kamenas ilesa le Devles ai thonas pendar te keren sa so vo kamel. Te avau pasha lende azhutisardias man but ai la vriamasa meklem o pimos.

SAVO LASHIMOS LEM: Naisiu ka o Jehova ke chi mai trobul man o pimos te avau veselime. Chi zhanau so sas te avel mandar te na parhudemas murho traio, numa akana chachimasa aliarau man defial mishto.

De 7 borsh kerau buki ando kher Betel katar le marturia le Jehovaske anda o Eslovenia ai godo si iek bari veselia mange. Chachimasa te prinzharau ka o Jehova ai te kerau buki leske dine man pala soske te traiu.