Barilem ande iek rig chorhi ando foro Montreal. Simas o mai tsinorho anda ojto phral. Kana sas man shou shon, murho dat mulo ai murhi dei bariardias amen korkorho.

De tsinorhara sas ande murho traio prame sar draba chorhe, te khelau mange pe lovende ai te marau man. Simas manushentsa kai kerenas prame chorhe. Kana sas man 10 borsh, azhutivas kal zhuvlia kai keren buki bimalades ai vi kal manush kai den love unzhile. Plachalas man te atsavau ai te jojavau le manushen.

Kana sas man 14 borsh zhanavas mishto sar te atsavau le manushen. Kinavas but chasuria, vusletsi ai angrustia ke sas len tsirha sumnakai ai thavas semno sar 14 kilates ai bikinavas len pe vulitsa ai kai mekenpe le matori ando shopping. Sas vushoro te avel man love! Iek gies lem 10.000 dolaria anda o Canadá.

Kana sas man 15 borsh, shude man anda e rig kai azhutil kal terne kai si len bedi la krisasa (reformatorio). Sovavas pe but riga, sar pe vulitsa ai ande le khera katar murhe amiguria.

Univar le krisa ningerenas man te pushen man pal prame kai keravas. Ai sar so bikinavas nas chordano chi zhavas phandado. Numa trobusardem te pokinau pala le dieli jojamne kai bikinavas ai ke nas man lila te bikinau. Chi daravas khanikastar ai khanchestar. Kerdem buki te len peske love le manush kai den love unzhile. Sar trobuvas te arakhau man, univar ningeravas pe mande iek pushka. Vi kerdem buki le manushenge kai sas ande mafia.

Sas man 17 borsh kana ashundem pa e Biblia. Kana beshavas iekha zhuvliasa, kai astardiasas te sikiol pa e Biblia le marturentsa le Jehovaske. Sar chi plachalas man uni prame anda e Biblia, meklem la ai gelemtar avriasa kai gata ankliavas.

Nashtivas te pakiau ke voi, vi astardias te sikiol pa e Biblia le marturentsa le Jehovaske. Plachaias man sar parhudiolas, kerdili mai dragostosa ai sas la mai rhavda. Iek gies akharde man kai kidenpe ai gelem. Kotse arakhlem lashe manush, nas sar le kolaver kai si ande e lumia. Kotse aliardem man defial mishto. De tsinorhara chi sikade mange but kamlimos ai murhi familia chi lias mange opre. O kamlimos kai sikade mange ai so kerde mantsa le marturia le Jehovaske sas so trobulas man. Pala godia astardem te sikiuau pa e Biblia.

So sikilem skepisardias murho traio. Duie manushentsa sas amen lashardo te zhas te choras, ke sar khelavas mange pe lovende kamavas 50.000 dolaria. Nais le Devleske ke chi gelem! Le kolaver dui gele, iek anda lende mulo ai o kolaver phandade les.

Kana sikiuavas pa e Biblia davas po gor ke trobuvas te mai parhudiuvau. Iek ejemplo si, ke ando 1 Korintianuri 6:10 (E Nevi Viasta ai o Psalmo) e Biblia phenel ke: “Chi le chor, chi le xanzhvale, chi le matiarne, chi kai prasan, chi kai len avrestar, chi avela lenge e amperetsia le Devleski”. Astardem te rovau kana chitosardem godo verseto. Trobuvas te parhuvau sa so simas (Romanuria 12:2). Plachalas man te marau man ai traivas ando jojaimos, murho traio nas vorta.

Sikilem ke o Jehova lasho lo ai iertil amen (Isaías 1:18). Pala godia rhugisardem zurales ilesa, manglem te azhutil man te mekau sa le prame zhungale kai keravas. Tsirha po tsirha azhutisardias man te mekau palpale godola prame kai keravas. Iek bari prama sas ke ansurisailem.

Gata kana sas man 24 borsh, sas man trin shave. Trobulas man iek lashi buki te dau len te jan. Numa chi gelemas but vriama ande escuela, ai mai anglal chi kerdemas buki. Pale rhugisardem ai manglem katar o Jehova te azhutil man ai gelem te rodau buki. Phenavas ke kamavas te parhudiuvau ai te kerau buki vorta. Ai ke sikiuavas pa e Biblia te avau iek lasho manush. Numa khonik chi kamelas te lel man. Atunchi, porme te phenau iek data mai sar sas murho traio, iek manush phendias mange: “Chi zhanau sostar, numa aliarau ke trobuv te dau tu e buki”. Zhanau ke kotse o Jehova dias anglal ka murho rhugimos. La vriamasa murhi rhomni ai me kerdiliam marturia le Jehovaske.

Agies traiu sostar thodem ande murho traio so phenel e Biblia ai so kerdias o Jesus. Si man iek shukar familia ai si man iek gogi vuzhi, ke zhanau chachimasa ke o Jehova iertisardias mange.

De 14 borsh dau anda murhi vriama te ningerau le lashe viesti ai azhutiu avren te sikion pa e Biblia. De tsirha vriama murhi rhomni del anda peski vriama te sikavel kal manush pa e Biblia. Ai ande gadala tranda borsh azhutisardem ka 22 manush kai kerenas buki mantsa te kerdion marturia le Jehovaske. Zhi agies zhau ando shopping, numa na te atsavau le manushen, zhau te dau duma pa murho pakiamos. Akana kamau te dau len iek lashi viasta: iek traio kai chi mai avena chor (Salmo 37:10, 11).