Arakhadilem ando Acul, iek foro kai si andel plaia katar Guatemala. Murhi familia si anda le ixiles, iek vitsa tsinorhi kai avel katar le mayas. Sikilem español, ai vi sikilem amari shib. Barilem mashkar iek mundarimos kai sas ande murho foro pe trandai shou borsh. Ande godia vriama mule but ixiles.

Kana sas man shtar borsh, ai ka murho phral sas efta, vo khelelas peske ai sas les andel vast iek granada kai pharhuli. Pala godo, me ashilem korho, numa murho phral mulo. De kotsar angle, barilem ando foro Guatemala ande iek kher le manushenge kai chi dikhenas ai kotse sikilem te chitou braille. Chi zhanavas sostar, numa le manush kai kerenas buki kotse chi mekenas man te dau duma avren tsinorhentsa, ai le tsinorhe chi kamenas te aven mantsa. Suako gies aliaravas man korkorho, azhukeravas zurales te aven le dui shon anda o borsh te zhautar murha dasa kai kamelas man ai sas defial lashi mantsa. Numa, voi muli kana sas man desh borsh. Dukhalas man but o ilo, ke jasardem o manush kai kamelas man mai zurales anda sa e lumia.

Kana sas man 11 borsh, amboldem ka murho foro ai gelem te beshau murhe dopash phralesa ai leski familia. Von arakhenas man ai denas man le prame kai trobulas man, numa khonik nashtilas te azhutil man te aliarau man mai mishto. Univar tsipivas ai pushavas katar o Del: “Sostar muli murhi dei? Sostar ashilem korho?”. Le manush phenenas mange ke le prame chorhe, sar le prame kai nakhavas, avenas katar o Del. Pala godia, gindivas man ke o Del chi kerel so si vorta ai ke nai leske pala le manush. Chi mundardem man sostar chi arakhlem sar te kerau les.

Sar simas korho, nashtivas te arakhau man katar le prame kai kerenas mange nasul. Kana simas tsinorho, butivar amisaile mande. Chi phendem khanikaske pa godola prame chorhe kai kerde mange, sostar gindivas ke khonik nas te kerel khanchi. Le manush chi denas duma mantsa but. Aliaravas man tristo ai chi plachalas man te avau le manushentsa, sostar chi pakiavas ande lende.

Kana sas man 13 borsh, dui marturia le Jehovaske kai sas ansurime dine duma mantsa kana simas ande escuela. Iek zhuvli kai aliarelas mila pala mande ai ke sikavelas ande escuela phendias lenge te den duma mantsa. Von phende mange ke e Biblia shinavel ke le korhe si te dikhen ai ke le mule si te zhuvindin (Isaías 35:5; Iovano 11:25, 26). Plachalas man te ashunau len, numa sar chi simas sikado te dau duma le manushentsa, chi phenavas khanchi. Makar chi davas duma but, ai simas lazhano, von chi mekle te sikaven mange kamlimos ai pa e Biblia. Trobunas te phiren desh kilometria pe plaiin te aresen ka murho foro.

Kana murho phral dikhlias sar sas von, phendias mange ke nas len but love, numa ke sas mishto furiarde. Chachimasa kamenas man sostar anenas mange uni prame. Zhanavas ke numa le chache kristianuria sas te den ilesa ai nas te azhukeren khanchi palpale.

Le publikasionuria ando braille azhutinas man te sikiuau pa e Biblia. Aliaravas but, numa sas uni anda kakala prame ke nas vushoro mange. Sas dui prame kai sas phare mange te pakiau: iek, ke o Del lel sama mandar, ai e kolaver, te dikhen man le manush sar dikhel man o Del. Polme Aliardem sostar agies vo mekel o bi lashimos, numa nas mange vushoro te dikhau les sar iek lasho dat. *

So sikiuavas kana estudivas pa e Biblia, tsirha po tsirha, azhutisardias man te parhuvau so gindivas. Iek ejemplo si, ke ka o Del dukhal les kana dikhel le prame chorhe kai nakhas. Pa leske servitori kai jan kino, vo phenel: “Chaches dikhlem e dukh katar murho foro [...;] zhanau pra mishto o kino kai nakhen” (Éxodo 3:7). Kana dem po gor o kamlimos kai si les o Jehova, alosardem te dau murho traio te kerau leski voia. Ando borsh 1998 boldilem sar marturo le Jehovasko.

Iek borsh polme te boldiuvau, kerdem iek curso manushenge kai chi dikhen ando foro Escuintla. Iek phral kai chidelaspe ande godo foro ai kai ningerelas angle kai chidenaspe le Marturia, zhanglias ke nas mange vushoro te aresau zhi kai Acul. Ke te chidau man kotse, trobuvas te nakhau pa e plaiin kai nakhenas le Marturia kai estudinas mantsa. Te azhutil man, godo phral arakhlias iek familia kai sas Marturia te beshau lende khere, von azhutinas man te zhau ka suako kidimos. Zhi agies, arakhen man sar te avau iek anda lengi familia.

Shai phenau mai but prame pa o kamlimos kai sikade mange le phral. Zhanau chachimasa ke te avau le marturentsa le Jehovaske sim mashkar chache kristianuria (Iovano 13:34, 35).

Akana chi mai aliarau ke chi mou khanchi, ai ke nai man vareso lasho te azhukerau. Akana si man pala soste te traiu. Chi gindiu ande so nashtin te keren murhe iakha, dau but chasuria anda murhi vriama te azhutiu le kolavren te sikion pa suako shukar prama kai sikavel e Biblia. Sim iek andal phure kai ningeren angle kai chidenpe le Marturia ai dau divanuria la bibliake. Sim naisime ke shai dau divanuria kana kerdiol iek baro kidimos kai zhan mai but de mia manush.

Ando 2010 ando El Salvador, gelem kai Escuela de Entrenamiento Ministerial (kai akana bushelpe Escuela para Evangelizadores del Reino). Kacha escuela azhutisardias man te azhutiu mai but murhe phralen. Kotse sikilem ke o Jehova kamel man zurales ai ke sim kuchi angla leske iakha, ai ke te zhal angle leski buki, vo shai usil fersavo manush.

O Jesukristo phendias: “Si mai veselia te des de sar te avel tut dino” (Hechos 20:35, La Biblia. Traducción del Nuevo Mundo). Sim iek manush chachimasa veselime, ande murho traio chi gindisailem ke shai avava gadia, akana aliarau ke shai azhutiu avren manushen.