Le marturia le Jehovaske chitonas but Bibli te sikion. Numa savi mai plachal len si e Traducción del Nuevo Mundo kai si ande but shiba. Ke si la o anau le Devlesko, phenel chachimasa so sas ramome ai si vushoro te aliardiol.

•   Si la o anau le Devlesko. Uni manush kai ambolden e Biblia ande aver shiba chi bariaren sar trobulpe ka godo kai kerdias la. Iek ejemplo si, ke ande iek Biblia thode eftavar desh anava katar le manush kai azhutisarde te lasharen la, numa chi phenel chi iek data o anau katar godo kai kerdias la: Jehova.

   E Traducción del Nuevo Mundo, nai sar le kolaver Bibli, sikavel o anau le Devlesko andel mia riga kai gata sas andel rhartii purane ai chi sikavel le anava katar le manush kai azhutisarde te ambolden la.

•   Phenel chachimasa so sas ramome. Uni Bibli chi phenen chachimasa so kamenas te sikaven le rhartii purane. Iek ejemplo si, ke iek anda lende ando Mateo 7:13 phenel gadia: “Den andre po vudar tsinorho sostar o vudar ai o drom kai ningeren ando iado bugle le ai bare le”. Numa, andel rhartii purane chi phenel “iado”, phenel “martia”. Mial ke le manush kai ambolde gadala suaturia pakianas ke porme te meren le bi lashe zhan ando iado te kinuin. Numa e Biblia chi sikavel godo. Pala godo, e Traducción del Nuevo Mundo phenel “martia”, sar andel rhartii purane.

•   Vushoro te aliardiol. Iek Biblia kai amboldelpe ande aver shib trobul te phenel chachimasa so sas ramome, numa vi trobul te aliarelpe mishto. Iek ejemplo si ke butivar amboldenpe le suaturia katar Mateo 5:3 vorba vorbatar, ai phenen gadia: “Veselime te aven le chorhe ando dujo”. Numa godola suaturia nai vushoro le manushenge te aliaren agies. Pala godo, e Traducción del Nuevo Mundo amboldel kako verseto gadia: “Veselime godola kai zhanen ke trobun len katar o Del”.

 E Traducción del Nuevo Mundo respetil o anau le Devlesko, phenel chachimasa so sas ramome ai aliarelpe mishto so kamel te phenel. Numa si la vareso mai kai chi kerdiolpe le kolavrentsa: delpe ivia. Pala godo millonuria manush shai chiton la ande pengi shib makar chi avela len love te kinen la.