Le marturia le Jehovaske thas amendar te aven amari familia ai le kolavrengi mai kidine. Si bari prama amenge e familia ke zhanas ke si o Del kon kerdias la (Génesis 2:21-24; Efesianuri 3:14, 15, E Nevi Viasta ai o Psalmo [ENV]). Vo thodias suako chachimos ande Biblia ai but ansurime kai lenpe pala lende anda sa e lumia veselime le ai te ningerenpe mishto.

 Iek diela kai keras si, ke thas ande amaro traio le suaturia kai phenel e Biblia kai azhutin amen te avas mai lashe rhom, rhomnia ai dada (Proverbios 31:10-31; Efisiana 5:22–6:4; 1 Timote 5:8). Ai chachimasa e Biblia shai zuriarel kal famili makar savorhe chi pakiana iek fialo (1 Petri 3:1, 2). Aida dikhas uni ejempluria pa so phende uni zhene kana pesko manush kerdilo marturo le Jehovasko:

•   “Kana ansurisailiam le pervo shou borsh aliarasas ke amari tsera chi zhalas mishto ai jasas amen but. Numa kana e Ivete kerdili marturo le Jehovasko, sikavelas mai but pacha ai kamlimos. De kin parhudilo lako traio amari tsera zhal angle” (Clauir, anda Brasil).

•   “Kana murho manush, o Chansa, astardias te sikiol pa e Biblia le marturentsa le Jehovaske, godo nas mange drago, gindivas ke rhespinas la familia. Numa la vriamasa dem po gor ke e Biblia azhutisardias but ka amari tsera” (Agness, anda Zambia).

 Aver prama si ke, kana keras e buki te ningeras le lashe viesti, sikavas le manushen sar e Biblia shai azhutil penga familia ande gadala prame:

•   Te rodas iek manush malado te ansuris amen

•   Te nakhas le prame kai nai vushoro ando pervo borsh kai sam ansurime

•   Te ningeras amen mishto le sokrosa ai la sakrasa

•   Te usis mishto le love

•   Te mekas te jas amen

•   Te iertis chachimasa

•   Te sikavas kal shave

 Univar shai avela. Iek viasta kai ankaladias e empresa Sofres ando 1998 sikadias ke 1 anda 20 tseri sas les bare baiuria kana iek andal ansurime parhudias peski religion ai kerdilo marturo le Jehovasko.

 O Jesus phendias ke ka peske manush univar sas te aven len bedi ande familia (Mate 10:32-36). O Will Durant kai zhanel but pa e historia phendias ke ande vriama katar e amperetsia anda Roma dosharenas kal kristianuria te rhespin la familia”. a Vi agies kal marturia le Jehovaske univar dosharen amen te rhespis la familia. Numa, si chaches ke le marturia le Jehovaske anen godola bedi?

 Kana dosharde kal marturia le Jehovaske te rhespin la familia, o Tribunal Europeo de Derechos Humanos phendias ke “butivar godola anda e familia kai nai Marturia anen le bedi kana chi kamen ai chi respetin e voia katar godo manush te avel anda aver religion ai te thol la ande pesko traio”. O Tribunal mai phendias: “Pa kako nakhen but famili kai nai len iek fialo religion; ai vi le marturia le Jehovaske nakhen pa kako”. b Numa makar amen avasa mashkar manush kai chi plachal len so keras, le marturia le Jehovaske keras sa so si ande amare vast te keras so phenel kako verseto anda e Biblia: “Te kerdia tumenge vari kon nasulimos na keren vi tume leske. [...] Keren so godi dashtin, ai kodia si pala tumende, te traiin ande pacha sa le manushensa” (Romanuria 12:17, 18).

 Le Marturia las amen pala so phenel e Biblia te ansuris amen “ferdi, tʹavel ande o Baro”; godo sikavel amen ke trobus te ansuris amen numa manushentsa kai pakian sar amende (1 Korintianuri 7:39, ENV). Kako so mangel amendar o Del chachimasa azhutil amen. Iek ejemplo si, so mothol iek artikulo anda e publikasion Journal of Marriage and Family anda o 2010 kai phenelas ke “le tseri kai pakian ai thon ande pengo traio iek fialo religion butivar ningerenpe mai mishto”. c

 Le marturia le Jehovaske chi sikaven te mekenpe te avela nai ansurime avre Marturentsa. E Biblia phenel: “Te si iek phral kai si les rhomni kai chi pachalpe, ai te mangela te beshel lesa, te na shudel la. Ai e zhuvli kai si la iek rhom kai chi pachalpe ando Del, ai te mangela te beshel lasa, te na zhaltar katar pesko rhom” (1 Korintiana 7:12, 13). Vi amen keras so phenel kako verseto.