Le marturia le Jehovaske chi kidas amen kana iek manush pherdiol borsh sostar zhanas chachimasa ke godo nai drago le Devleske. E Biblia chi mothol ke nashtis te seras godola giesa, numa azhutil amen te aliaras sar dikhel len o Del. Aida dikhas 4 prame kai den duma pa kako ai so sikavel e Biblia.

1.   Chi avel katar o Del te seras le giesa kai pherdiuvas borsh. Iek enciclopedia sikavel ke le giesa kai le manush pherdion borsh aven katar o pakiamos kai phenel ke “le dujuria ai le putiaria chorhe kamen te keren nasul ka o manush kai serel godo gies” ai ke “le suaturia kai phenen leske le amiguria kai si lesa den les baj te arakhen les” katar godola dieli nasul (Funk & Wagnalls Standard Dictionary of Folklore, Mythology, and Legend). Aver libro mothol ke de dumut ramonaspe le giesa kai arakhadionas le glati, ke godo sas “iek bari prama te keren mai angle o horoscopo”, kako si ankalado anda “e ciencia kai zhinel le cheraia”. Ai o libro vi phenel: “But manush pakian ke le memelia kai usinpe o gies kai pherdion borsh si len magia te kerdion chaches so o manush mangel” (The Lore of Birthdays).

    Numa e Biblia mothol ke e magia, o drabarimos, le prame kai keren te pashon le manush kal dujuria le chorhe vai prame sar kakala nai vorta (Deuteronomio 18:14; Galatiana 5:19-21). Iek ejemplo si, ke o Del shindias kris pe o foro Babilonia, ke le manush kai beshenas kotse zhinenas le cheraia, ai godo si drabarimos (Isaías 47:11-15). Makar le marturia le Jehovaske chi jal amen e briga katar aven le bare giesa le manushenge, nashtis te garavas le prame kai sikavel e Biblia pa o drabarimos.

2.   Le pervo kristianuria chi serenas le giesa kai pherdionas borsh. Pa so mothol iek enciclopedia, le pervo kristianuria “pakianas ke te seren fersavo gies kai pherdionas borsh sas vareso kai avelas katar e religion jojamni” (The World Book Encyclopedia). E Biblia mothol ke le apostoluria ai aver manush kai o Jesus sikadias kana sas pe Phuv, dine amenge o ejemplo kai trobus te las sar kristianuria (2 Thesaloniana 3:6).

3.   E Biblia numa del duma pa iek gies kai trobun te seren le kristianuria, nai o gies kai arakhadiolas varekon, si o gies kai mulo o Jesus (Luk 22:17-20). Kako nai vareso nevo, e Biblia mothol ke o gies kai meras si mai lasho de sar o gies kai arakhadiuas (Eclesiastés 7:1). O Jesus kerdias but prame lashe kana sas pe Phuv, ai sas lasho angla le iakha le Devleske, pala godo o gies kai mulo sas mai baro de sar o gies kai arakhadilo (Zhidovuri 1:4, E Nevi Viasta ai o Psalmo [ENV]).

4.   Ande Biblia chi iek data mothol ke iek servitori katar o Del serelas o gies kai varekon pherdiolas borsh. E Vorba le Devleski del duma pa dui manush kai serde le giesa kai pherdionas borsh ai von chi luvudinas ka o Del. Na numa godo, so mothol e Biblia pa kakala dui dati nai lasho (Génesis 40:20-22; Marko 6:21-29).

 Sar suako dat lasho, le marturia le Jehovaske kamen but penge shaven. Pala godo, den len podarki (lashe prame) fersavo gies ando borsh ai vi lasharen dieli ai uni pakiva te aven veselime. Kamen te keren sar o Del kai del lashe prame ka peske servitori siempre (Mate 7:11). Pala godo le shave katar le Marturia chi aliaren ke jasaren penge vareso lasho. Aida dikhas so mothon uni anda lende:

•   “Plachal man mai kana den man vareso shukar kana chi azhukerau les” (E Tammy, 12 borsh).

•   “Murhe dada den man podarki fersavo gies, na kana pherdiuvau borsh. Plachal man but so keren” (O Gregory, 11 borsh).

•   “Le tsinorhe numa jan ai gilaban. Gadala pakiva chi plachan man, si mai shukar le pakiva kai keras ande murho kher” (O Eric, 6 borsh).