Kon zhal ando cheri?
So sikavel e Biblia
O Del alosardias ka uni chache kristianuria, ke porme te meren si te zhuvindin ando cheri (1 Petri 1:3, 4, E Nevi Viasta ai o Psalmo [ENV]). Porme te aven alome pala o Del, trobun te aven len iek pakiamos zuralo sa pengo traio ai te train sar o Del kamel te na jasaren o traio kai si te len ando cheri (Efisiana 5:5; Filipiana 3:12-14).
So si te keren?
Le alome avena amperaturia ai rasha (sacerdoturia) le Jesusosa pe iek mia borsh (Sikavimos [Apokalipsis]5:9, 10; 20:6, ENV). Von si te aven iek nevi amperetsia ando cheri (“neve cheri” sar phenel e Biblia) kai amperetsila le manushen (e “nevi phuv”) kai si te train pe phuv. Kakala amperaturia si te keren te trais ande iek lumia vorta ai lashi, sar kamelas o Del (Isaías 65:17; 2 Petri 3:13).
Sode manush si te zhan ando cheri?
E Biblia phenel ke 144.000 manush si te zhan ando cheri (Sicharimos [Apokalipsis] 7:4). O apostol Juan ande iek vizion dikhlias ke “O Bakriorho [o Jesukristo zhuvindo] beshelas anda punrhende po plai Zion ai lesa iek shel ai shtarvardesh tai shtar mi zhene” (Sicharimos [Apokalipsis] 14:1-3; Iovano 1:29; 1 Petri 1:19). E plaiin Sion sikavel e voia kai dias o Jehova ka o Jesus ai kal 144.000 te amperetsin ando cheri (Psalmo 2:6, ENV; Zhiduvuria 12:22).
Godola kai “si akharde, ai alosarde” te amperetsin le Kristosa ande Amperetsia le Devleski si prinzharde sar tsirha “bakriorha” (Sicharimos [Apokalipsis] 17:14; Luk 12:32). Godo sikavel ke le alome si tsirha de sar le kolaver bakrorhe le Kristoske (Iovano 10:16).
Ginduria kai nai chache pa le manush kai zhan ando cheri
Uni manush phenen: Sa le manush lashe zhan ando cheri.
O chachimos: O Del shinavel ke but manush lashe si te train pe Phuv (Psalmo 37:29, 34, ENV).
O Jesus phendias: “Khonik chi anklisto ande o cheri” (Jono 3:13, ENV). Godo sikadias ke le manush kai mule mai anglal lestar, sar o Abrahan, o Moises, o Job ai o David chi gele ando cheri (Apostoli 2:29, 34, ENV). Von azhukerenas te zhuvindin pe Phuv (Job 14:13-15).
E Biblia sikavel ke ando “mai angluno zhivindimos” si te zhuvindin le manush alome ando cheri (Sikavimos [Apokalipsis] 20:6, ENV). Godo sikavel ke porme katar o pervo zhuvindimos, si te zhuvindin aver manush pe Phuv.
E Biblia sikavel ke ande Amperetsia le Devleski “chi mai avela martia” (Sicharimos [Apokalipsis] 21:3, 4). Kakala vorbi den duma pa e Phuv, ke ando cheri nas ai nai martia.
Uni manush phenen: Suako manush shai alosarel kai kamel te trail, ando cheri vai pe Phuv.
O chachimos: O Del alosarel save chache kristianuria akharel te train “ande o cheri” (Filipiana 3:14). Amen chi alosaras savo drago amenge ai savo kamas (Mate 20:20-23).
Uni manush phenen: Le manush kai nai lashe te train ando cheri azhukeren te train pe Phuv.
O chachimos: O Del phenel le manushenge kai traina pe Phuv “murho foro”, “murhe alome” ai “le shave kai o Jehova suntsosardias” (Isaías 65:21-23). Si te keren chachi e voia le Devleski: ke manush, kai nai khanchi nasul ande lende, traina pe Phuv ande iek shukar paraiso ai chi merena (Génesis 1:28; Psalmo 115:16, ENV; Isaías 45:18).
Uni manush phenen: O numero 144.000 kamel te phenel aver prama.
O chachimos: Makar ande kako libro si numeruria kai kamen te phenen aver prama, si aver numeruria kai numa si iek numero. Iek ejemplo si “le anava le desh u dui apostlonge le Bakriorhoske” (Sicharimos [Apokalipsis] 21:14). Aida dikhas aver dieli kai sikaven ke o numero 144.000 del duma pa manush.
Sicharimos [Apokalipsis] 7:4 del duma pa sode zhene semnome si te train ando cheri, phenel ke “sas iek shel ai shtarvardesh tai shtar mi” ai porme del duma pa iek “baro narodo” kai chi iek manush nashtil te zhinel. Vi “o baro narodo” lel o skepimos (Sicharimos [Apokalipsis] 7:9, 10). Te avela ke o numero 144.000 kamelas te phenel aver prama ai na numa iek numero, nas te zhangliolpe save manush si anda suako grupo. a
E Biblia phenel ke le 144.000 sas kinde “pala o rat le Kristosko, ai si le pervo kai si te aven dine ka o Del” (Sicharimos [Apokalipsis] 14:4). Kana phenel “le pervo kai si te aven dine” sikavel ke si tsirha manush alome anda sa e Phuv. Pala godia phenel sode manush si te amperetsin ando cheri le Kristosa. Godola manush si tsirha kana dikhas sode manush si te train pe Phuv (Sicharimos [Apokalipsis] 5:10).
a Ande iek libro kai del duma pa o Apokalipsis (Revelation 1-7: An Exegetical Commentary, patrin 474) o Robert Thomas ramosardias pa o numero 144.000 kai phenel Sicharimos [Apokalipsis] 7:4: “Si iek numero chacho, ai na sar ando 7:9 kai chi phenel sode manush si. Te aliarasa ke kako numero kamel te phenel aver prama, trobus te aliaras gadia sa le numeruria anda kako libro”.
Shai avela plachal tu
BARE PRAME KAI SIKAVEL E BIBLIA
So si e Amperetsia le Devleski?
Kana o Jesus avilo pe phuv butivar dias duma pa e Amperetsia le Devleski. Ai pe but vriama le manush mangen ando rhugimos te avel godia Amperetsia.
