Le love si doshale pala le prame chorhe?
So phenel e Biblia
No. E Biblia chi phenel ke le love nai lashe ai ke anen dieli chorhe. But manush phenen “Le love si o kochai anda sa le dieli le chorhe”, ai but phenen ke godo gindo avel katar e Biblia. Numa si gadia? No. Chachimasa, e Biblia phenel: “E dragostia le lovenge si kai ingerel ka but nasulimos” (1 Timote 6:10).
So phenel e Biblia pa le love?
E Biblia phenel ke, te zhanasa so te keras le loventsa, shai azhutin amen ai shai arakhen amen (Eclesiastés 7:12). Ai del duma mishto pa le manush kai den ilesa ai azhutin avren peske loventsa (Proverbios 11:25).
E Biblia phenel ke le love chi trobul te avel sa ande amaro traio. Zhidovuri 13:5 (E Nevi Viasta ai o Psalmo [ENV]) mothol: “Na den tume te kamen le love; t’avel tumenge dosta so si tumen”. So sikavel o verseto? Ke le love nai e prama mai bari ando traio. Numa trobus te avas veselime le pramentsa kai trobun amen sar: o jabe, le gada ai iek kher (1 Timote 6:8).
Sostar o kamlimos le lovengo nai lasho?
Le manush kai numa kamen but love penge, chi lena o traio kai chi mai getol (Efisiana 5:5). Sostar? Pervo, ke godola kai kamen love numa penge si sar te luvudin ka iek del (Kolosiana 3:5). Ai duito, sostar te aven len le prame kai kamen, keren so nai vorta ai chi len sama chi iek zakono. Proverbios 28:20, mothol “godo kai kamel te barbavol fuga nashtila te ashel chacho”. Iek manush gadia shai kerela prame kai nai vorta sar te chorel, te atsavel, te daravel avren te lel vareso, te lel varekas ai te mangel love pala leste, vai te mundarel varekas.
Ai makar chi kerasa vareso kai nai vorta, o kamlimos le lovengo shai anel amenge but bedi. Pala godia e Biblia phenel: “Numa kodola kai mangen te barvalon, peren ande zumaimos ai line le ande atsaimos katar but dieli bi malade” (1 Timote 6:9).
O lashimos kai las kana keras so phenel e Biblia
Te las sama so gindil o Del ai chi kerasa prame chorhe te avel amen love, si te avas mishto amentsa ai si te veselis le Devles. Ai te thasa amendar te pakias lesko mui, vo phenel amenge: “Me chi mukava tut, ai chi mukava tut korkorho” (Zhidovuri 13:5, 6, ENV). Ai vo shinavel amenge ke “o manush chacho lela but lashimos” (Proverbios 28:20).
