No. Le religionuria nai sa iek fialo. Ande Biblia arakhas but ejempluria kai sikaven sar nai drago le Devleske te luvudis les. Shai dikhas dui prame kai chi plachal les.

1: Te luvudin ka dela jojamne

 E Biblia phenel ke chi mol khanchi te luvudin dela jojamne (Jeremías 10:3-5; 16:19, 20). O Jehova phendias ka pesko purano foro Israel: “Numa man trobus te luvudis” (Éxodo 20:3, 23; 23:24). a Kana le israelituria luvudisarde ka aver dela, “o Jehova joliailo” lentsa (Números 25:3; Levítico 20:2; Jueces 2:13, 14).

 O Del chi parhuvel pesko gindo pa o luvudimos katar “le dela” jojamne (1 Korintianuri 8:5, 6, E Nevi Viasta ai o Psalmo, [ENV] ; Galatianuri 4:8, ENV). O Jehova mangel katar le manush kai kamen te luvudin les te anklen anda le religionuria kai nai chache. E Biblia phenel: “Anklen avri lendar” (2 Korintianuri 6:14-17, ENV). Te avela ke sa le religionuria si sa iek fialo ai sa pasharen amen ka o Del, sostar o Del phendias godo?

2: Te luvudin le Devles sar nai leske drago

 O Jehova meklias rigate ka le israelituria kana line le zakonuria ai o luvudimos katar le religionuria jojamne (Éxodo 32:8; Deuteronomio 12:2-4). O Jesus phendias ka le bare rasha anda peski vriama ke nas vorta sar von luvudinas le Devles. Von kamenas te luvudin le Devles numa mekle “so si o mai baro ande o zakono, e kris, e mila ai o chachimos” (Matei 23:23, ENV).

 Agies, e religion kai pasharel amen ka o Del si godia kai sikavel o chachimos la Bibliako (Iovano 4:24; 17:17; 2 Timote 3:16, 17). Le religionuria kai sikaven prame kai nai ande Biblia duriaren amen katar o Del. But manush pakian ke e Biblia phenel ke o Del, o shau ai o sunto dujo si iek, ke o dujo le manushesko chi merel ai ke o Del kerel te kinuil le manushes porme te merel. Numa, gadala prame aven katar o luvudimos kai zhal kal dela jojamne. Ai godo thol le zakonuria le manushenge mai anglal de sar le zakonuria kai sikavel e Biblia (Marko 7:7, 8).

 O Del vurhitsil le religionuria kai mothon ke luvudin les numa ke pa so keren sikaven ke chi prinzharen les (Titos 1:16). Te pasharel amen ka o Del, iek religion nashtil te avel la numa zakonuria; trobul te azhutil amen ande amaro traio suako gies. Iek ejemplo si, ke e Biblia phenel: “Te mothola vari kon ke pachalpe ando Del, ai te nashtila te inkerel peski ship, wo dziliarel pe pes, ai ande soste mothol ke pachalpe, chi mol kanchi. Le devlekane kai si vuzhi ai chachi angla Del amaro Dat si te le sama katar le sirotki ai katar le phivlia ande pengo chino, ai arakh tu katar le dieli la lumiake kai sai rimon tu” (Iakov 1:26, 27). E Biblia La Palabra de Dios para Todos phenel ande kako verseto “e religion vuzhi”.