No, e Phuv chi si te avel pharhadi, chi phabardi ai chi si te avel amen aver. E Biblia sikavel ke o Del kerdias e Phuv te aven manush siempre pe late.

•   “E phuv si te avel dini le manushenge kai si vorta ai von si te train siempre pe late” (Salmo 37:29).

•   “Vo thodias e phuv pe o zuralimos, Ai vo shoha chi mishkila” (Psalmo 104:5, E Nevi Viasta ai o Psalmo [ENV]).

•   “E phuv siempre si te avel” (Eclesiastés 1:4).

•   “Kon lashardias e phuv, ninkerdias la zurales, chi kerdias la intaino, kerdias la te train pe late” (Isaías 45:18).

 O Del chi si te mekel ke le dieli kai keren la phuviake sar te meliaren la, o marimos, ai aver dieli te pharhaven e Phuv. O Del ande Biblia phenel ke si te mundarel godolen “kai pharhaven e phuv” (Sikavimos [Apokalipsis] 11:18, ENV). Sar si te kerel godo?

 O Del si te parhuvel le amperetsii katar le manush kai chi zhangle te arakhen e Phuv ai thola peski Amperetsia ando cheri (Daniel 2:44; Mate 6:9, 10). O amperato anda kacha Amperetsia si o Jesukristo, o Shau le Devlesko (Isaías 9:6, 7). Kana sas pe Phuv, o Jesus kerdias milagruria ai sikadias ke e maria, e barval ai aver prame pakianas lesko mui (Marko 4:35-41). Sar amperato anda e Amperetsia le Devleski, si te avel tela o vast le Jesusosko e Phuv ai sa le prame kai si ande late. Si te kerel prame neve, te avel e Phuv sar sas de mai anglal iek shukar sado sar o Eden (Mate 19:28; Lucas 23:43, La Biblia. Traducción del Nuevo Mundo [NWT]).

 No. But manush gindin gadia kana chi aliaren mishto 2 Petri 3:7, kai phenel: “E phuv ai o cheri kai si akana garade le, ai thodine le rigate te aven pharhade la iagasa”. Aida dikhas dui bare prame kai si te azhutin amen te aliaras gadala vorbi:

1.   Ande Biblia, le vorbi cheri, phuv ai iag chi sikaven numa iek suato. Iek ejemplo si ke, Génesis 11:1 phenel: “Sa e phuv delas duma iek shib”. Kana phenel, “phuv” del duma pa le manush.

2.   2 Petri 3:7 ai aver verseturia anda o kapitulo sikaven so kamel te phenel “o cheri”, “e phuv” ai e iag. Le verseturia 5 ai 6 den duma pa o Baro brishin andel giesa katar o Noe. Ande godia vriama “e phuv”, le manush bilashe kai trainas, mundarde sas numa e Phuv nas pharhadi (Génesis 6:11). Ai vi peradias “o cheri”, godo kamel te phenel, ke peradias le manushen kai amperetsinas ande godia vriama. Godo, sikavel ke e phuv nas pharhadi, numa le manush bilashe. O Noe ai leski familia chi mule kana sas pharhadi godia lumia, porme anda o Baro brishin, pherde e Phuv shaventsa (Génesis 8:15-18).

 Gadia sar o pai anda o Baro brishin, e iag kai sikavel 2 Petri 3:7, kamel te phenel ke o Del si te ankalavel le manushen bilashe, na e Phuv. O Del shinadias amenge “neve cheri ai nevi phuv, kai o chachimos beshela” (2 Petri 3:13). Godia “nevi phuv” sar dikhliam si le manush, ai si te avel len “neve cheri”, kai si e Amperetsia le Devleski. Tela kacha amperetsia, e Phuv si te avel iek shukar paraiso kai traisa pachasa (Sicharimos [Apokalipsis] 21:1-4).