Si iek Beng?
So phenel e Biblia
Ei, si iek dujo kai kerdilo bilasho ai kai dias le zea ka o Del. Pala godia, e Biblia phenel ke vo si “o baro la lumiako” (Iovano 14:30; Efisiana 6:11, 12). Ande Biblia si aver anava kai phenen sar si kako dujo. Uni si:
Satanas, kamel te phenel “Dushmano” (Job 1:6).
Beng, kamel te phenel “Baro Jojamno”, kon meliarel o anau varekasko (Sicharimos [Apokalipsos] 12:9).
Sap, ande Biblia si sar kon atsavel (2 Korintiana 11:3).
Kon zumavel avren (Mate 4:3).
Jojamno (Iovano 8:44).
Nai o semno katar o chorhumos ai nai o bilashimos kai si kal manush
Uni manush gindin ke o Beng si o chorhumos vai o bilashimos kai si andel manush ai vi ando o Del. E Biblia sikavel pa kana iek data o Del ai o Beng dine duma. Numa ando o Del nai khanchi nasul ande sa so kerel ai si vuzho. Pala godia, shai avel bi lasho? (Deuteronomio 32:4; Job 2:1-6). Ai so shai phenas pa kana e Biblia phenel ke o Beng zumadias ka o Jesus, kai nai bezej ande leste? (Mate 4:8-10; 1 Iovano 3:5). Shai das po gor ke e Biblia sikavel ke o Beng si varekon chacho ai na numa iek semno katar o bilashimos.
But manush gindin ke nai iek Beng, ke nai chacho. Si bari prama amenge te dikhas ke le manush gindin gadia? No, e Biblia sikavel ke o Satanas shai kerel fersavi prama te atsavel le manushen (2 Thesaloniana 2:9, 10). Iek diela kai kerel si, te pakian le manush ke nai iek Beng (2 Korintiana 4:4).
Ginduria kai nai chache pa o Beng
Jojaimos: Lucifer si aver anau kai si ka o Beng.
Chachimos: E vorba hebrea ke ande uni Bibli sikavelpe “Lucifer” kamel te phenel “kon strefial” (Isaías 14:12). Kacha vorba si ande iek profesia, kai del duma pa le amperaturia anda e Babilonia. Kakala amperaturia nas te pakian o mui le Devlesko, pala godia o Del sas te mundarel len (Isaías 14:4, 13-20). Ande kacha profesia, kana le amperaturia anda Babilonia peren, asan lendar ai phenen lenge “kon strefial”.
Jojaimos: O Beng kerel buki le Devleske.
Chachimos: O Beng si o dushmano le Devlesko, nai lesko servitori. Ai vi si dushmano katar godola kai luvudin le Devles, pala godia jojavel ai lelpe pala lende (1 Petri 5:8; Sicharimos [Apokalipsis] 12:10).
