1–2. Sostar si kuch e Biblia, so o Del das amenge?

SO HATYARES atunchi, kana tyo amal del tut variso? Aba zhukares, te shaj putres les avri, thaj zurales losshas, ke gindindas pe tute. Shukares najisares leske.

² E Biblia o Del das amenge. Kasave gindura si andre, so kaver thanestar chi zhanasas. Tele iskiril, ke o Del kerdas o cheri, e phuv, thaj le anglune murshes thaj zhuvja. Kasave chachipe phenel, so zhutil amen, kana problemura si amen. Andar e Biblia vi kodi shaj zhanas, ke o Del sar kerela kodo, ke pe phuv majlasho t’avel o trajo. Sosko shukar si kado, kathar o Del!

3. So avla, te sityosa e Biblia?

³ Sar sityos e Biblia, dikhesa, ke o Del kodo kamel, ke t’aves lesko amal. Majbut te zhanes pe leste, majpashal zhasa karing leste.

4. So gindis, sostar naj kasavi kaver ginadyi, sar e Biblia?

⁴ E Biblia karing 3200 shiba bolde aba tele, thaj but milliardura dine avri ande late. Le majbut manusha pe luma, pe pengi shib shaj ginaven la. Pe sako kurko majbut sar 1 millova manushen si nyevi Biblia. Ova, naj kasavi kaver ginadyi, sar e Biblia!

5. Sostar shaj phenas, ke e Biblia „kathar o Del si”?

⁵ E Biblia „kathar o Del si”. (Ginav: 2Timoteus 3:16!) De shajke si ande kaste opre avel e vorba, ke manusha te iskirinde e Biblia, atunchi sostar  shaj phenas, ke kathar o Del si. E Biblia kado phenel: „ke le Devleske vorbi phende manusha, sar o sunto duxo tradelas len” (2Peter 1:21). Kado kasavoj, sar kana jekh raj tele iskiravavel peske gindura ande jekh lil peske manushesa. Kaskoj o lil? Le rajesko, thaj na leske manushesko. Vi kade, e Biblia kathar o Del si, na kathar kodola manusha, kon tele iskirinde la. O Del pe kodo inkerdas len, ke leske gindura te iskirin tele. Anda kado e Biblia le Devleski Vorba si (1Tessalonika 2:13; dikh: Informaciovo 2, E Biblia „kathar o Del si”).

6–7. Sostar shaj phenas, ke la Bibliake vorbi jekh si?

⁶ E Biblia majbut sar 1600 bersha iskirinde tele. Kon iskirinde la, ande kaver vrami trajinde. Sas mashkar lende, kon but sityile, thaj sas kon majcerra. O jekh mashkar lende sastyardo sas, kavera pe phuva kerenas butyi, mashara, bakrara, profeti, krisara thaj kraja sas. But manusha iskirinde e Biblia, de inke jekh si leski vorba. Chi jekh kotor chi phenel kaver, sar so le majbut kotora. *

⁷ La Bibliake anglune kotora phenen amenge, sar avile ande luma le problemura, thaj le palune kotora pale phenen, sar lasharela o Del kadala, thaj sar avela shukar amari phuv. Vi kodi phenel, so pelaspe tela butezera bersha le manushenca, thaj avri vazdel, ke so o Del kamel, kodo mindig kade avla.

8. Phen peldi pe kodo, ke so e Biblia phenel, kodo patyivaloj!

⁸ E Biblia na jekh kasavi ginadyi si, ande soste ande shkola shaj sityos, thaj na pe kodo vorbil, so le manusha zhanen pe luma thaj po trajo. De mindig chachimo phenel, kana pe kadala iskiril. Thaj kado zhukarasas kathar jekh ginadyi, so kathar o Del si. O 3Mozesh kodo phenel, ke o Del soske krisa das le izraelitenge, te na zhal perdal pe but manusha o nasvalimo. Kado butesa majangla kodo sas, kana le manusha opre pinzharde kodo, sar zhan perdal le nasvalimata pe kaver manusha. E Biblia vi kodo mishto phenel, ke e phuv po khanchi si opre kecime (Job 26:7). Thaj kana le  majbut manusha chi zhanenas, ke sar dichol avri e phuv, e Biblia aba dulmut tele iskirindas, ke e phuv kasavij, sar jekh rota (Izaiash 40:22).

9. So sikavel, ke kon iskirinde e Biblia, kodol chachimo iskirinde?

⁹ E Biblia vi ande historija chachoj. Na kade, sar but historijake ginadyi, ke kon kodola iskirinde, nas mindig vortake. Na mindig vorbinde pe kodo, kana lengo nipo xasardas jekh maripe. De kon iskirinde e Biblia, vorta tele iskirinde, kana o Izrael xasardas jekh maripe, thaj vi penge dosha tele iskirinde. Ando 51. asharimo o David kraj avri phenel peski bari dosh, so kerdas. Ke chachimo iskirin, kado sikavel, ke e Biblia kathar o Del si. Ande kado trubul te hatyaras, ke shaj patyas ande Biblia.

10. Sostar shaj zhutin amen la Bibliake vorbi?

¹⁰ E Biblia „kathar o Del si, thaj lashij te sityarel, thaneste te shol, te lasharel, palpale te xutyilel, kodo te keras, so chachoj” (2Timoteus 3:16). La Bibliake vorbi zhutin amen. O Jehova zhanel sar kerdas amen, so hatyaras thaj soj amare gindura. Majfeder pinzharel amen, sar so ame amen, thaj kodo kamel baxtale t’avas. Zhanel, so si lasho amenge, thaj so si nasul.

11–12. a) Soske lashe vorbi phendas o Jezush ande o Mate 5–7. kotora? b) So shaj sityuvas inke andar e Biblia?

¹¹ Ando Mate 5–7. kotora ginavas le Jezusheske vorbi pe kodo, sar shaj avas baxtale, sar shaj avas avri kaverenca, sar te rudyinas, vaj sar te dikhas le love. Anglal 2000 bersha phendas kadala, de vi ande amare dyesa zhutil amen, ke majlasho te avel amaro trajo.

 ¹² O Jehova vi kasave chachimata tele iskiravadas ande Biblia, so zhutin amen, ke majbaxtali te avel amari familija, majmishto te zhanas butyi te keras, thaj ande pachate te trajinas kaverenca. Sajekh si ke kon sam, kaj trajinas, thaj soske pharimo si amen, la Bibliake chachimata mindig zhutin amen (ginav: Izaiash 48:17; dikh: Informaciovo 3, Chachipe).

13. So phendas angal o Izaiash pal o Babilono?

¹³ But Bibliake profeciji aba andre pherdyile. O Izaiash anglal phendas kodo, ke o Babilono xasarena (Izaiash 13:19). O intrego tele iskirindas, sar avla kado. Po foro bare, thaj zurale vudara sas, thaj vi o paji, sama lelas pe leste. Ande le Izaiasheski profecija vi kodo andre sas, ke avri shutyaren o paji, le foroske vudara pale puterdo mukhen. Le ketanenge chi trubul te marenpe. O Izaiash vi kodi phendas, ke jekh mursh, kasko anav Cirus avla, voj marela tele o Babilono (ginav: Izaiash 44:27–45:2; dikh: Informaciovo 4, Profecija).

14–15. Sar pherdyilas andre le Izaiasheski profecija?

¹⁴ Pala 200 bersha, ke tele iskirinde e profecija, but ketani resle karing o Babilono, leske te zhan. Kon tradelas le ketanen? O Cirus, la perzhiako kraj, kade sar ande profecija sas. Sako gata sas pasha kodo, andre te pherdyol e intregi profecija.

¹⁵ Pe kodi ratyi kana o maripe sas, le babilonicka baro dyes inkerde. Chi daranas, ke zuralo sas o foro thaj o paji sama lelas pe lende. Avral, krujal o foro o Cirus thaj leske manusha kerde jekh bari gropa, kaj so  rigate trade o paji. O paji tele gelas, kade le perzhiake ketani, perdal zhangle te zhan pe leste. De sar zhangle andre te zhan ando foro? Kade, sar e profecija phendas: le foroske vudara puterde mukhle, le ketanenge chi trubundas te marenpe, kade shaj gele andre ando foro thaj, lengo kerdyilas.

16. a) So phendas o Izaiash, so zhukardas po Babilono? b) Kathar zhanas, ke kadi profecija andre pherdyilas?

 ¹⁶ Ande le Izaiasheski profecija andrej, ke o Babilono chi beshena. Kado iskirindas: „Soha chi beshena les, khonyik chi beshela kothe pe but generaciovo” (Izaiash 13:20). Kade pelas? Pe kodo than, kaj o Babilono sas – karing le 80 kilometera kathar o Bagdado (Irako) telal – feri barra si. Chi adyes chi trajil kothe khonyik. O Jehova shiladas o Babilono le pustimaske shilavasa (Izaiash 14:22, 23). *

17. Sostar shaj patyas ande le Devlesko sako shinaipe?

¹⁷ Kodo chachimo, ke la Bibliake but profeciji aba andre pherdyile, sikaven, ke shaj patyas, so pe kodo iskiril, so inke angla amende avla. Zhanas, ke o Jehova mindig andre inkrel, so shinadas, thaj shukar avla  e phuv. (Ginav: 4Mozesh 23:19!) Ande kodo patyas, ke chi trubul te meras, thaj „kado o Del, kon nashtig xoxavel, aba dulmut shinadas” (Titus 1:2). *

18. So iskirindas o Pal pal le Devleski vorba?

¹⁸ Shaj dikhlam, ke naj inke jekh kasavi ginadyi, sar e Biblia. O intrego iskirimo jekh si, thaj patyivaloj, vi kana pe kodo vorbil, so le manusha zhanen pe luma, thaj vi kana pal le historija vorbil. Zhutil te lasharas amaro trajo, thaj but profeciji shaj rakhas ande late, so aba andre pherdyile. De si inke kaver riga, ande soste e Biblia korkori si. O Pal aposhtol kado iskirindas: „le Devleski vorba zhuvindoj, thaj zor mukhel avri”. So sikavel kadi? (Ginav: Heberenge 4:12!)

19–20. a) Sar shaj zhutil tuke e Biblia, ke uzhes te dikhes, kon san tu vi chaches? b) Sar shaj sikaves, ke najisares e Biblia?

¹⁹ E Biblia shaj boldel tyo trajo. Shaj zhutil, ke majuzhes te dikhes, kon san tu vi chaches. Majfeder shaj pinzhares tye gindura, thaj kodo, so ande tyo jilo si. Shajke kade gindinas, ke kamas le Devles, de feri kade shaj sikavas amaro kamipo, te kerasa kodo, so e Biblia phenel.

²⁰ E Biblia vi chaches kathar o Del si. Voj kodo kamel, te ginavesas, sityosas thaj te kamesas kadi ginadyi. Najisar kodo, so das tut o Del, thaj vi pala kado sityuv ande late. Kade hatyaresa so kamel o Del le manushenca, pa soste ando kaver kotor avla vorba.