1–3. Soske pushajipe aven opre ande manusha pa meripo, thaj sar den vorba pe kadala kaver patyaimata?

E BIBLIA kodo shinavel, ke avela kodo dyes, ke „chi avla majbut meripo” (Sikadyimaski 21:4). Andar o 5. kotor zhanglam, ke le parujimaske shaj najisaras, ke shaj trajinasa, thaj chi merasa. Adyes inke meren le manusha (Predikator 9:5). Anda kado si jekh baro pushajipo: kaj zhasa kana merasa?

² Inke majfeder kamas te zhanas vorba pe kado pushajipo, kana merel amen varikon, kas kamas. Pe kadala gindisaras: „Kaj gelas? Dikhel amen? Si les dukh? Shaj zhutil amenge? Pale shaj dikhasa les?”

³ Sako patyamo kaver vorbi del palpale pe kadal pushajipe. Si savo kodo sityarel, lasho manush te san, ando cheri zhas, nasul manush te san, ande jag zhas. Si patyamo, kaj so kodo phenen, ke pala amaro meripo duxo kerdyuvas, thaj amara familijasa trajinas majdur, kon aba mule. Kavera kodo phenen, pala soste meras, krisi shinen pe amende, thaj pale shaj trajinas, vaj ande jekh kaver manush, vaj ande jekh allato.

4. So sityaren but patyaimo po meripe?

⁴ But patyaimo kade mezil, ke kaver sityaren po meripe, de anda jekh gindo aven avri. Kodo sityaren, ke kana merel o manush, si les variso, so inke majdur trajil. Kado chacho si?

5–6. So avla amenca, kana meras?

⁵ O Jehova zhanel, ke so avla amenca, kana meras, thaj phenel amenge, ke kana varikon merel, lesko trajo nacholtar. O meripo, thaj o trajo kaver si, thaj dur si jekhavrestar. * Anda kado kana varikon merel, chi hatyarel khanchi, naj les gindura, thaj chi trajil pe kaver than.

⁶ O Salamon kraj kodo iskirindas, ke „le mule khanchi chi zhanen”. Chi zhanen te kamen, chi te xojajven, thaj „ande gropa. . . naj butyi, gindo, pinzharimo vaj godyaverimo.” (Ginav: Predikator 9:5, 6, 10!) Ande Asharimata 146:4 pale kodo iskiril e Biblia, ke kana varikon merel, „nachontar leske gindura”.

7. So phendas o Jezush pa meripo?

⁷ O Jezush kodo phendas le sityardenge, kana lesko amal, o Lazar mulas: „O Lazar, amaro amal sovel”. Feri o Jezush na pe kodo gindisardas, ke o Lazar pe jekh cerra vrama tele daspe, vi pashe sutas: „O Lazar mulas” (Janosh 11:11–14). Thaj kadalesa kodo phendas, ke o meripe kasavoj, sar kana varikon sovel. Na kodo phendas, ke o Lazar ando cheri si, vaj peska familijasa si, kon aba mule. Thaj chi kodo chi phendas, ke dukh si les ande jag, vaj pale rakhadyilas manusheske vaj allatoske. Na, o Lazar kasavo sas, sar kon zurales sovel. Vi kaver Bibliake vorbi kodo phenen, ke o meripo  kasavoj, sar kana varikon zurales sovel. Kana o Jezush opre ushtyardas le Jairusheska sheja, kodo phendas, ke o meripo kasavoj, sar kana varikon sovel. Kado phendas: „Chi mulas, feri sovel” (Lukach 8:52, 53).

8. Kathar zhanas ke o Del na kade kerdas amen, te meras?

⁸ O Del kade kerdas le Adamos thaj la Eva, ke jokhar te meren? Nichi. Ke o Jehova kade kerdas len, ke bidoshale, saste t’aven, thaj lungo trajo te trajin. Kana kerdas len, ande lengo jilo das o lungo trajo (Predikator 3:11). Chi jekh dad, vaj dej chi kamel, ke leske shavora te phuron, thaj te meren. Vi o Jehova  kade hatyarel karing amende. De kana o Del po lungo trajo kerdas amen, atunchi sostar meras?

9. Sostar sas lashi kodi vorba, so o Jehova le Adameske, thaj la Evake das?

⁹ O Jehova kado phendas le Adameske ando Edeno: „Pe la barako sako kasht shaj xas, zhi kaj chajos. De po lasho, thaj nasul zhanimasko kasht, te na xas, ke savo dyes xasa pa leste, vi meresa” (1Mozesh 2:9, 16, 17). Nas pharo kadi vorba ande te inkren. Thaj feri lestar pelaspe te phenel le Adameske, thaj la Evake, ke so si o lasho, thaj so si o nasul. O Adam, thaj e Eva kodo te kerdo, so o Jehova phendas, kodolesa pengi patyiv sikado avri karing leski bari zor. Thaj vi kodo avri shaj sikado, ke sar najisaren sa kodola, so voj das len.

10–11. a) Sar xoxadas o Beng le Adames, thaj la Eva, te na mukhenpe le Devleske? b) Sostar naj jertisaripe pe kodo, so o Adam, thaj e Eva kerdas?

¹⁰ De o Adam, thaj e Eva chi mukhlepe le Jehovaske. O Beng kado pushlas la Evatar: „Vi chaches kodo phendas o Del, ke chi pe jekh kasht nashtig xan?” E Eva kado phendas: „Shaj xas pal le kashtengo frukto. De pe kodo kasht so mashkaral si ande bar, pe kodolesko frukto, o Del kado phendas: »Te na xan, chi te na unzon leste, ke merena«” (1Mozesh 3:1–3).

¹¹ O Beng kado phendas: „Chi merena. Ke zhanel o Del ke savo dyes xana pe leste, avri puterdyon tumare jakha, thaj kasave avena sar o Del, zhanena so si o lasho, thaj so si o nasul” (1Mozesh 3:4–6). O Beng kodo kamlas te patyavavel ke vi e Eva shaj phenel so  si o lasho, thaj so si o nasul. Majdur xoxadas lake, ke so avla, te na mukhelape le Devleske. Kodo phendas, ke e Eva chi merela, kade e Eva xalas andar o frukto, thaj das vi peske romeske. O Adam thaj e Eva zhangle, ke o Jehova chi mukhlas lenge te xan andar o frukto. Anda kodo ke xale andar leste, von zhangle so keren, ke kadalesa rigate shon le Devleski vorba, thaj kade nas patyivale karing pengo Dad. Naj khanchi jertisaripe pe kado!

12. Sostar si briga, ke o Adam thaj e Eva chi patyande le Devlesko muj?

¹² Soski brigaj, ke o Adam thaj e Eva chi patyande le Devlesko muj! So hatyaresas, te bararesas tye shaves, vaj tya sheja, de von pala kodo chi patyanas tyo muj, thaj kodo kerenas, so von kamen, thaj na kodo, pe soste sityardan len. Kadalesa kethane phagenas tyo jilo.

13. Pe soste gindisardas o Jehova, kana kodo phendas, ke „palpale zhasa ando praxo”?

¹³ Kana o Adam thaj e Eva chi mukhlepe le Devleske, xasarde o lungo trajo. O Jehova kado phendas le Adameske: „praxo san, thaj palpale zhasa ando praxo.” (Ginav: 1Mozesh 3:19!) Kadalesa kodo phendas, ke pale praxo avla, sar te na trajindo soha (1Mozesh 2:7). Pala soste o Adam bezex kerdas, mulas, thaj chi trajindas majdur.

14. Sostar meras?

 ¹⁴ O Adam thaj e Eva muj te patyando le Devleske, vi adyes trajinas. De kodolesa, ke chi mukhlepe leske, bezex kerde, thaj mule. O bezex kasavoj, sar jekh zhungalo nasvalipe, so kathar o Adam thaj kathar e Eva lam perdal. Sa bezexales rakhadyilam, thaj anda kado trubul te meras (Roma 5:12). De o Del na kado kamel le manushenca. Soha chi kamlas, ke le manusha te meren, thaj vi e Biblia kodo phenel, po meripo, ke xojako (1Korintus 15:26).

15. Sostar slobodisarel amen o chachipe pe le mule?

¹⁵ O chachipo pa meripo, kathar but xoxamno gindo slobodisarel amen. E Biblia kodo sityarel pa mule, ke chi hatyaren dukh, thaj briga. Chi zhanas te vorbisaras lenca, thaj chi von chi zhanen te vorbin amenca. Chi zhanas te zhutinas lenge, thaj chi von chi zhanen te zhutin amenge. Chi zhanen te azban amen, anda kado chi trubul te daras lendar. But patyaimo kodo sityarel, ke le mule trajin, thaj zhanas te zhutinas lenge, te dasa love le rashajen, vaj kodole manushen, kon sunti kerenpe. De kana pinzharas o chachipe, chi zhanen rigate te ingren amen kasave xoxajimasa.

16. Soske xoxajimata sityaren but patyaimo pe mule?

¹⁶ O Beng le xoxamne patyaimasa kamel rigate te ingrel amen, te patyas, ke le mule vi majdur trajin. Si patyaimo, kaj so kodo sityaren, ke kana meras, andar amende variso majdur trajil varikaj. Vi tyo patyaimo kado sityarel? Vaj kodo, so e Biblia phenel pa mule? O Beng le xoxajimasa kamel te boldel le manushen kathar o Jehova.

17. Sostar anel lazhavo e jagali gropako sityaripe po Jehova?

 ¹⁷ Lazhavoj, so ande but patyaimo sityaren. Si savo patyaimo kodo sityarel, ke le nasula mindig ande jag phabona. Kado xoxajimo lazhavo anel po Jehova. Soha chi mukhelas, ke le manushen kasave dukha t’aven! (Ginav: 1Janosh 4:8!) So gindisas pa kodo manush, kon kade sityarel peske shavores, ke lesko vast ande jag shol? Kodo gindisas, ke zurales nasul manush si, thaj chi kamesas te pinzhares les. O Beng kodo kamel, kade te gindinas pa Jehova.

18. Sostar chi trubul te daras kathar le mule?

¹⁸ Si patyaimata, kaj so kodo phenen, kana le manusha meren duxo kerdyon. Kodo sityaren, ke kadale duxon trubul te patyivinas, thaj te daras lendar, ke bare amalaj, de vi xojake shaj aven. Butzhene patyan kado xoxajimo. Daran kathar le mule, thaj anda kado le mulen patyivin, na le Jehovas. Na bister, ke le mule khanchi chi hatyaren, anda kado chi trubul te daras lendar. O Jehova kerdas amen. Voj si o chacho Del, thaj feri les trubul te patyivinas (Sikadyimaski 4:11).

19. Sar zhutil amen o chachipo pa le mule?

¹⁹ Te pinzharasa o chachipe pa meripe, slobodisajvas kathar o xoxamno patyaimo. Kado chachipe vi ande kodo zhutil, ke majfeder te hatyaras, so shinadas o Jehova, ke opre ushtyona le mule.

20. Pe soste avla vorba ande kaver kotor?

²⁰ Le Devleski jekh sluga, o Job bute bershenca angla kadi kado pushlas: „Te merela o manush, shaj trajil pale?” (Job 14:14). Shaj avel kasavo, ke kon mulas, kodo pale shaj trajil? E vorba, so o Del ande Biblia phendas, pacha del amen. Ando kaver kotor pe kado avla vorba.