1–2. Soske pushajipe si butivar ande le manusha?

LE SHAVORA but pushen. Kana phenes lenge variso, butivar kado pushen: „Sostar?” Thaj kana zumaves vorba te des lenge, pale kado phushen: „De sostar?”

² Vi terne te sam, vi phure, si amen pushajipe. Shajke pushas amendar so te xas, so te las opre, vaj so te kinas. Pasha kado vi pe kasave bare pushajimata shaj gindinas ame, ke so avla amare trajosa pala kodo. Te na rakhasa lashe vorbi pe kadala pushajipe, shajke aba chi gindinas pe lende.

3. Sostar gindin butzhene, ke nashtig rakhen vorba pe bare pushajipe?

³ E Biblia del palpale vorba pe amare bare pushajipe? Si, kon kade gindin, ke pharoj lenge te hatyaren e Biblia. Shajke kade gindin, ke pe kadala pushajipe feri le sityara, thaj le rashaja zhanen te den vorba. Kavera pale lazhanpe andre te pinzharen, ke chi zhanen te den palpale vorba. Tu so gindis?

4–5. Pe soske pushajipe rodes vorba? Sostar te rodes zurales?

⁴ Shajke vi tu kamesas te zhanes e vorba pe kasave pushajipe: „Sostar sim kathe? So avla manca, te mero? Sosko si o Del?” O Jezush, o baro sityari, kado phendas: „Mindig mangen, thaj dena tumenge, mindig roden, thaj rakhena, mindig maren o vudar, thaj puterdyola” (Mate 7:7). Zurales rode, zhi kaj chi rakhes chache vorbi pe tyire pushajipe!

 ⁵ Ova, zurales te rodesa, rakhes le vorbi ande Biblia (Godyaver Vorbi 2:1–5). Kadal vorbi naj phare, thaj shaj hatyaren len. Aba akanak shaj aves baxtalo, kathar kodo so zhanesa, thaj shukar trajo shaj zhukarel pe tute. Akanak dikhas jekh pushajipo, pe soste butzhene gindinpe.

6. Sostar gindinen butzhene kodo, ke o Del chi grizhil pe amende?

⁶ Butzhene kodo gindin, ke o Del chi girizhil pe amende. Kade gindinen, te grizhilas pe amende, kaver avlas e luma. Sako karing maripe, xoji, thaj nasulimo dikhen. Le manusha nasvajven, dukh si len, thaj meren. Anda kado, kado pushen: kana o Del grizhil pe amende, sostar chi nacharel o nasulimo?

7. a) Sosa keren le rashaja, kodo te hatyaren le manusha, ke o Del nasul si? b) Kathar shaj zhanas, ke na o Del kerel le nasul butya?

⁷ Andar kodo, so le rashaja sityaren, butzhene kade hatyaren, ke o Del nasul si. Kana tragedija perel, kodo phenen, ke o Del kamlas kade. Kadalesa le Devles doshajaren ande kodo, so pelaspe. E Biblia kodo phenel, ke kathar o Del chi avel khanchi nasul. O Jakab 1:13 kodo phenel, ke o Del chi zumavel khanyikas nasula butyanca. Kado phenel: „Khonyik te na phenel kana zumaven les: »O Del zumavel man.« Nasulimasa nashtig zumaven le Devles, thaj chi voj chi zumavel kasavesa khanyikas.” Kado sikavel, ke o Del chi tordyarel ke nasul butya te kerdyon, de soha na voj kerel len. (Ginav: Job 34:10–12!) Dikhas variso, so zhutil kado te hatyares.

8–9. Sostar naj chacho kodo, ke o Del si o doshalo anda amaro pharimo? Phen variso!

 ⁸ Phenas si jekh shavo, kon inke khere trajil peske dadesa, thaj peska dejasa. Lesko dad zurales kamel les, thaj sityardas les pe kodo, sar shaj zhal po lasho drom. De pala kodo o shavo, dumo boldel peske dadeske, thaj zhaltar kheral. Nasul butya kerel, thaj ando chorrimo perel. Doshalo si o dad, ke mukhlas te zhaltar kheral o shavo? Nashtig avel doshalo! (Lukach 15:11–13). Sar kado dad, vi o Del mukhlas le manushenge, dumo te bolden leske, thaj nasul te keren. Anda kado, kana nasul perelpe, soha te na bistras, ke na o Del si o doshalo! Xoxajimo avlas, les te doshajaras!

⁹ Le Devles zurali vorba si pe kodo, sostar mukhlas nasul butya te kerdyon. Ande kadi ginadyi ando 11. kotor shaj zhanes, so phenel pe kado e Biblia. De kodo trubul te zhanes, ke o Del kamel amen, thaj soha na voj si o doshalo anda amaro pharimo. Feri voj zhanel kadala te lasharel (Izaiash 33:2).

10. Ande soste zhanas kodo, ke o Del lasharel le dosha, so le nasul manusha kerde?

¹⁰ O Del suntoj (Izaiash 6:3). Sakofelo so kerel, kodo patyivaloj, uzhoj, thaj lashoj. Ande kado, shaj patyas ande leste. Le manusha naj kasave, ke unyivar keren kasavo, so naj lasho. Thaj chi le majpatyivale rajes naj zor pasha kodo, sako nasulimo te lasharel, so le nasul manusha keren. Khanyikas naj kasavi bari zor, sar le Devles. Numa voj zhanel te lasharel kodola dosha, so le nasul manusha kerde, thaj vi kerela kado. Nacharela sako nasulimo! (Ginav: Asharimata 37:9–11!)

11. So hatyarel o Del, kana dikhel, pe soste zhas perdal?

¹¹ So hatyarel o Del, kana dikhel, so perel ande luma, thaj pe soste zhas perdal? Andar e Biblia zhanas, ke o Del „kamel o chachimo” (Asharimata 37:28). Ande kado naj sajekh leske kodo, so si o lasho, thaj so si o nasul. Zurales xojajvel, kana dikhel le manushengi dukh. E Biblia kodo phenel, ke „brigako sas ande pesko jilo”, kana dikhlas, ke e phuv pherdoj nasulimasa (1Mozesh 6:5, 6). O Del chi boldadyilaspe (Malakiash 3:6). E Biblia pe kodo sikavel, ke o Del gindil pe tute. (Ginav: 1Peter 5:7!)

12–13. a) Sostar zhanas te kamas kaveren, thaj so hatyaras, kana dikhas ke kaveren pharimo si? b) Sostar shaj patyas ande kodo, ke o Del sako nasulimo, thaj o bichachimo nacharela?

¹² Andar e Biblia vi kodo shaj zhanas, ke o Del kade kerdas amen, te cirdas pe leste (1Mozesh 1:26). Vi ame shaj keras lashe butya, sar voj. Kana tu brigako san kana dikhes, ke le lashe manushen pharimo si, atunchi o Del inke majfeder brigakoj. Kathar zhanas kado?

¹³ E Biblia kodo sityarel, ke „o Del kamipo si” (1Janosh 4:8). Sogodi andar pesko kamipo kerel. Anda kodo kamas, ke vi o Del kamel. Gindin andre: Te avlas tut pashe zor, nacharesas o nasulimo, thaj o bichachipo ande luma? Sar te na, ke vi tu kames le manushen. Thaj so si le Devlesa? Les si zor pasha kodo, thaj ke kamel amen, nacharela sako nasulimo, thaj o bichachipo. Chaches shaj zhanes kodo, ke sako shinaipe, pe soste vorba sas anglal, ande kadi ginadyi,  andre pherdyola! De pasha kodo, te zhanes te patyas ande kadala shinaipe, majfeder trubul te pinzhares le Devles.

14. So si le Devlesko anav, thaj kathar zhanas, ke trubul te vorbis pe lesko anav?

¹⁴ Te kamesa varikasko amal t’aves, so si o angluno, so phenes leske? Tyo anav. Si anav le Devles? But patyamo kodo phenel, ke lesko anav Del vaj Raj si, de kadal na anava si. Kadal numa kodo sikaven, ke varikon baroj, sar o „kraj”, vaj „direktori”. O Del phenel amenge, ke lesko anav Jehova si. Ando Asharimata 83:18 kado phenel: „Te zhanen le manusha, ke tu, kasko anav Jehova, korkori san, o Majbaro pe intrego phuv.” Ande Biblia le manusha pe butezera thana iskirinde tele le Devlesko anav. O Jehova kodo kamel, te pinzhares lesko anav, thaj te vorbis pe leste. Ande kodo phenel tuke pesko anav, ke vi tu te aves lesko amal.

15. So sikavel o Jehova anav?

¹⁵ Le Devlesko anav, o Jehova, but phenel pa leste. Kodo sikavel, ke o Del zhanel te kerel sakofelo, so shinadas,  thaj zhanel te kerel so feri kamel. Khanchi nashtig tordyol ande lesko drom. Kado anav feri lesko shaj avel. *

16–17. So sikaven kadala vorbi: a) „o Majbaro”, b) „o biagoresko kraj”, c) „kon kerdas”?

¹⁶ Sar aba ginadam, o Asharimata 83:18 kado phenel pal o Jehova: „korkori san, o Majbaro” Del.  O Sikadyimaski 15:3 kado phenel: „Barej thaj chudij so kerdan, Jehova Del, kon o Majbaro san. Biagoresko kraj, sakofelo, so keres, chachoj thaj shaj patyan.” So sikavel kadi vorba, ke „o Majbaro”? Kodo, ke le Jehovas majbut zor si, sar varikaske pe intrego luma. O „biagoresko kraj” pale kodo sikavel ke voj mindig sas. Andar o Asharimata 90:2 zhanas kodo, ke voj mindig sas, thaj mindig avla. Kado igen shukar si!

¹⁷ Feri le Jehovaske shaj phenas, ke voj kerdas sakofelo. O Sikadyimaski 4:11 kado phenel: „Phirel tut, Jehova, ova, amaro Del, ke tyiro te avel o asharimo, e patyiv, thaj e zor, ke tu kerdan sakofelo, thaj sakofelo tutar si thaj kerdyilas.” O Jehova kerdas le andyalon ando cheri, le cherhajen, le fruktura so po kasht si, le mashen ando paji, vaj sako kaver, so ande tyi godyi del!

18. Sostar gindinen unyizhene, ke nashtig aven le Devleske amala? So phenel pe kado e Biblia?

¹⁸ Unyizhene, kana ginaven soskoj o Jehova, darajven, thaj pe kadala gindin: „Sostar te grizhil pe mande o Del, kana les kasavi bari zor si, kasavo uzhoj, thaj kasavi dur si mandar?” De vi chaches kodo kamel o Del, kade te hatyares? Nashtig phenas! O Jehova kamelas majpashal te avel karing amende. E Biblia kodo phenel, ke naj dur khanyikastar (Aposhtola 17:27). O Del kodo kamel, te zhas majpashal karing leste, thaj shinavel, ke vi voj pashola karing tute (Jakab 4:8).

19. a) Sar shaj aves le Devlesko amal? b) So fajil tuke ando Jehova majfeder?

¹⁹ Sar shaj aves le Devlesko amal? O Jezush kado phendas: „Pasha kodo, varikon mindig te trajil, kodo trubul, te pinzharen tut, le korkoro chache Devles, thaj kodoles, kas bishaldan, le Jezush Kristushes” (Janosh 17:3). Zha majdur le sityarimasa, thaj atunchi pinzhares le Jehovas thaj le Jezushes. Kade kasavo trajo shaj avel tut, so chi nachola. Aba sityilam, ke o „Del kamipo si” (1Janosh 4:16). But lasho si inke ande leste. Andar e Biblia zhanas kodo, ke „o Jehova lashe jileskoj, thaj sunuj o Del, zhanel te zhukarel, andar pesko jilo kamel, thaj mindig patyivaloj” (2Mozesh 34:6; 2Peter 3:9; Sikadyimaski 15:4). O Jehova lashoj, thaj andar pesko jilo jertil amenge (Asharimata 86:5). Kana ginaves e Biblia, inke majbut shaj zhanes pe kodo, sosko shukar si amaro Del.

20–22. a) Sar shaj hatyarestu pashal karing o Del, inke vi atunchi, kana chi dikhes les? b) So te keres, kana kavera chi kamen te sityos e Biblia?

 ²⁰ Shaj hatyarestu pashal karing o Del, inke vi atunchi, kana chi dikhes les? (Janosh 1:18; 4:24; 1Timoteus 1:17). Kana pal o Jehova ginaves ande Biblia, t’avel tuke trajindo (Asharimata 27:4; Roma 1:20). Kana majbut zhanes pe leste, majfeder kamesa les, thaj majpashal hatyaresa tut karing leste.

²¹ Dikhesa, ke o Jehova si amaro Dad (Mate 6:9). Lestar si amaro trajo, thaj kodo kamel, ke o majlasho t’avel amaro trajo. Vi jekh lasho dad kado kamel peske shavorenge (Asharimata 36:9). E Biblia sikavel, ke shaj aves le Jehovasko amal (Jakab 2:23). Gindin andre: o Jehova, kon kerdas e intrego luma, kodo kamel, ke t’aves lesko amal!

²² Shaj avel kasavo, ke unyizhene chi kamen, te sityos e Biblia. Shajke daran, ke avri bolden tut andar tyo patyamo. De na mukh, ke varikon tele te tordyarel tut ande kodo, ke le Jehovasko amal te aves! Voj si o majlasho amal, kas feri shaj gindis!

23–24. a) Sostar te na lazhas tut te pushes? b) So dikhasa ando kaver kotor?

²³ Ande Biblia anglunes chi hatyaresa sako gindura. Na lazha tut te pushes thaj te manges te zhutin tut. O Jezush kodo phendas, ke kasave cineske turbul te hatyarasame, sar le shavora (Mate 18:2–4). Thaj le shavora but pushen. O Del kodo kamel, te den tu vorba pe tye pushajipe. Mishto pinzhar e Biblia, te zhanes, ke o chachimo sityos. (Ginav: Aposhtola 17:11!)

²⁴ Te kames te pinzhares le Jehovas, atunchi kodo si o majlasho, te sityos e Biblia. Andar o kaver kotor zhanas, sostar naj kasavi kaver ginadyi, sar e Biblia.