1–2. So gindis, sostar si bari patyiv o rudyimo? Sostar trubul te zhanas, ke so phenel e Biblia po rudyimo?

PASHA intrego luma e phuv zurales cinij. Kana o Jehova pe phuv dikhel, le intregi nipura kasavej leske, sar jekh cerra paji ande bradyi (Asharimata 115:15; Izaiash 40:15). Vi te sam cine ande luma, ando Asharimata 145:18, 19 kado si: „O Jehova pashal si karing sakoneste, kon akharel les, sakoneste, kon patyivale jilesa akharel les. Kon patyivinen les, kodolen del, so mangen. Shunel kana cipin, te zhutil len, thaj muntisarel len.” Kadi soski bari patyiv si karing amende! O majbaro Del, o Jehova, pashal kamel te avel karing amende, thaj losshasa shunel amaro rudyimo. Ova, o rudyimo bari patyiv si kathar o Jehova, thaj kado sakoneske das.

² O Jehova feri atunchi shunel amen, kana mishto tordyuvas karing leste. So sikavel kado? Dikhas, so phenel e Biblia po rudyimo.

3. Sostar te rudyis karing o Jehova?

³ O Jehova kodo kamel, kade te rudyis karing leste, sar te vorbisas lesa. Kathar zhanas kado? Mangas tu, ginav o Filippi 4:6, 7! Gindintu, pe soste mangel amen shukares ando versho. La lumako raj anda pesko jilo grizhil pe tute, thaj kodo kamel, te phenesas leske so hatyares, thaj tye gindura.

4. Sar zurarel tyo amalipe le Jehovasa, butivar te rudyisa?

 ⁴ La rudyimasa pashal amala shaj avas le Jehovaske. Kana le amala mindig vorbin jekhavresa pe penge gindura, pharimata, thaj so hatyaren, kadalesa majzuralo avla lengo amalipe. Naj kado kaver chi kodole rudyimasa, so le Jehovaske phenas. Ande Biblia phenel tuke peske gindura, thaj so hatyarel, thaj vi kodo phenel tuke, so kerela. Kana butivar vorbis lesa, inke vi kodola shaj phenes leske, so majandral hatyares. Kade majzuralo avla tyo amalipe lesa (Jakab 4:8).

5. Kathar zhanas, ke o Jehova chi shunel sako rudyimo?

⁵ Sako rudyimo shunel o Del? Nichi. Ande le Izaiasheske dyesa, o Del kado phendas le izraelitenge: „Vi te rudyina but, me chi shunav tumen. But rat si pe tumaro vast” (Izaiash 1:15). Te na lasa sama, atunchi shaj  keras kasavo, sosa boldas amendar le Jehovas, thaj kade aba chi shunela amaro rudyimo.

6. Sostar trubul o patyamo? Sar shaj zhanes avri te sikaves tyo patyamo?

⁶ Te kamas o Jehova te shunel amaro rudyimo, atunchi trubul te patyas ande leste (Marko 11:24). O Pal kado iskiril: „Bipatyamosko nashtig avel varikon pe le Devleski voja, ke kon angla leste ashel, kodoleske si te patyal, ke voj si, thaj palpale potyinel kodolenge, kon chachikanes roden les” (Heberenge 11:6). De naj dosta, feri te phenas, ke si amen patyamo. Kado vi andre trubul te sikavas, kodolesa, ke sako dyes mukhasame le Jehovaske. (Ginav: Jakab 2:26!)

7. a) Sostar trubul patyivales te rudyinas kaj o Jehova, thaj kade, ke cineske hatyaras amen? b) Ande soste dichol, ke anda jilo rudyinas?

⁷ Kana rudyinas kaj o Jehova, kado patyivales te keras, thaj te hatyaras amen cineske. Sostar? Kana jekhe krajesa, vaj bare manushesa te vorbinasas, vi kodo patyivales kerasas. Ke o Jehova si o majbaro Del, inke majbari patyiv das les. Thaj inke majfeder tele bandyarasame, kana duma das leste (1Mozesh 17:1; Asharimata 138:6). Andar amaro jilo te phenas leske amare gindura, na pale thaj pale kodola vorbi te phenas (Mate 6:7, 8).

8. Pasha rudyimo so trubul?

⁸ Kana pale rudyinas anda varisoste, atunchi vi trubul te keras anda leste. Phenas, ke anda kodo rudyinas kaj o Jehova, t’avel amen sako dyes so te xas. Te na kerasa khanchi, nashtig zhukaras, ke o Jehova te del amen sakofelo, kana zhanasas te kerasas butyi anda leste. Zurales trubul butyi te keras, thaj nashtig mukhas kothe butyi, so zhanas te keras (Mate 6:11; 2Tessalonika  3:10). Kana kodo mangas kathar o Jehova, te zhutil, te mukhas jekh nasulimo, atunchi trubul te krujinas sako than, kaj so shaj peras palpale (Kolosse 3:5). Akanak dikhas unyi pushajipo po rudyimo.

9. Kaste te rudyinas? So sityarel amenge o Janosh 14:6 po rudyimo?

⁹ Kaste te rudyinas? O Jezush pe kodo sityardas peske manushen, kade te rudyin: „Amaro Dad, kon san ando cheri” (Mate 6:9). Thaj vi kado phendas: „Me som o drom, o chachipe thaj o trajo. Khonyik nashtig zhal kaj o Dad, feri pa mande perdal” (Janosh 14:6). Feri kaj o Jehova shaj rudyinas, ande le Jezushesko anav. So si kodo, ke ande le Jezushesko anav trubul te rudyinas? Te kamas, ke o Jehova andre te lel amaro rudyimo, trubul te patyivinas, soski bari butyi das le Jezusheske. Sar aba dikhlam, o Jezush anda kodo avilas pe phuv, te slobodisarel amen kathar o bezex, thaj kathar o meripe (Janosh 3:16; Roma 5:12). O Jehova le Jezushes shutas le anglune rashajeske, thaj leske mukhlas krisi te shinel (Janosh 5:22; Heberenge 6:20).

10. Changa trubul te das, kana rudyinas? Phen vorba!

¹⁰ Changa trubul te das, kana rudyinas? Na, o Jehova chi mangel amendar kado. Andar e Biblia zhanas, ke patyivales shaj rudyinas kaj o Jehova, vi atunchi kana changa das, beshas, vaj tordyuvas (1Kronika 17:16; Nehemiash 8:6; Daniel 6:10; Marko 11:25). Majanglunoj leske, ke patyivales, thaj andar o jilo te vorbinas lesa. Shaj avel dyese, shaj avel ratyi, sajekh si o than, vi vorbasa, thaj vi ande amende shaj das duma karing leste. Shaj patyas, ke o Jehova inke vi atunchi shunel amen, kana ande amende rudyinas (Nehemiash 2:1–6).

11. Pe soste shaj vorbinas le Jehovasa?

 ¹¹ Anda soste shaj rudyinas? Anda sakofelo, so angla leste lashoj. E Biblia kado phenel: „sakofelo te mangasa lestar, vi voj te kamela kodo, voj shunel amen” (1Janosh 5:14). Shaj rudyinas vi anda amare butya? Ova. Kana rudyinas karing o Jehova, kodo kasavoj, sar kana amare lashe amalesa vorbinasas. Sakofelo shaj phenas le Jehovaske, so ande amari godyi, vaj ando amaro jilo si (Asharimata 62:8). Shaj rudyinas anda kodo, te del amen andar pesko sunto duxo, te zhanas kodo te keras, so lashoj (Lukach 11:13). Vi godyi shaj mangas, te zhanas so te keras, thaj vi zor shaj mangas, te zhanas avri te inkras ande amare pharipe (Jakab 1:5). Trubul te mangas le Jehovas, te jertisarel amare bezexa (Efezush 1:3, 7). Mishtoj, vi anda kaverende te rudyinas, anda amari familija, thaj anda amare phrala anda khangeri (Aposhtola 12:5; Kolosse 4:12).

12. So te avel o majangluno ando amaro rudyimo?

¹² So t’avel o angluno ando amaro rudyimo? O Jehova, thaj kodo, so voj kamel. Andar amaro jilo te najisaras leske sogodi, so anda amende kerdas (1Kronika 29:10–13). Vi o Jezush kado phendas, kana sityardas peske manushen, sar te rudyinen. (Ginav: Mate 6:9–13!) Kodo phendas, ke anglunes anda kodo trubul te rudyinen, t’avel sunto le Devlesko anav, vaj te inkren les uzhes. Thaj vi ande kodo trubul te rudyinas, te avel le Devlesko krajipo, thaj te avel kodo, so o Jehova kamel pe intrego phuv. O Jezush feri pala kadal vorbindas pe kodo, so amenge trubun. Kana le Jehovas, thaj kodo so voj kamel, shuvas po angluno than ando amaro rudyimo, kadalesa sikavas, ke kadal si amenge le majanglune.

13. Sosko lungo t’avel amaro rudyimo?

 ¹³ Sosko lungo t’avel amaro rudyimo? E Biblia chi del vorba pe kado. Kana trubul, shaj avel lungo, vaj skurto. Angla soste xas, jekh skurto rudyimo phenas. De kana najisaras, phenas amaro pharimo, vaj amaro jilo shoras avri le Jehovaske, atunchi jekh lungo rudyimo phenas (1Shamuel 1:12, 15). Chi kamasas feri anda kodo lungo rudyimo te phenas, kavera opre te dikhen pe amende, sar  ande le Jezusheske dyesa kerde kado unyizhene (Lukach 20:46, 47). Kadal rudyimata chi fajin le Jehovaske. Les kodo trubul, ke anda jilo te rudyinas.

14. Sodivar te rudyinas, thaj so shaj zhanas anda kado po Jehova?

¹⁴ Sodivar te rudyinas? O Jehova pe kodo mangel amen, ke sako dyes te vorbisaras lesa. Ande Biblia kado si: mindig te rudyinen, inkren avri ando rudyimo, thaj ande sako vrama rudyinen! (Mate 26:41; Roma 12:12; 1Tessalonika 5:17). O Jehova mindig gataj te shunel amen. Sako dyes shaj najisaras leske, ke kamel amen, thaj lashe jileskoj karing amende. Shaj mangas lestar te tradel amen, thaj te del amen zor. Kuch te si amenge, ke kaj o Jehova shaj rudyinas, atunchi mindig pe kodo avasa, te vorbisaras lesa.

15. Sostar te phenas pala rudyimasko agor, ke „amen”?

 ¹⁵ Sostar te phenas pala rudyimasko agor, ke „amen”? O „amen” vorba kodo si, ke ’kade te avel’ vaj ’kade avla’. Kodo phenas lesa, ke vi kade gindisaras, sar ando rudyimo phendam (Asharimata 41:13). Andar e Biblia vi kodo shaj zhanas, ke vi atunchi mishtoj te phenas „amen”, kana ande amende, vaj avri te phenas, kana varikon rudyil angla kavera. Kadalesa sikavas avri, ke jekh hatyaras kodolesa, so shundyilas (1Kronika 16:36; 1Korintus 14:16).

16. Kathar zhanas, ke o Jehova vi chaches del palpale vorba pe amaro rudyimo?

¹⁶ O Jehova vi chaches del palpale vorba pe amaro rudyimo? Ova. E Biblia kade akharel les: „kon ashunes o rudyipe” (Asharimata 65:2). O Jehova bute milliova manushengo chacho rudyimo shunel, thaj vi del palpale vorba pe kodola, sar trubul.

17. Sar ingrel o Jehova peske andyalon, thaj peske manushen pe phuv, te del palpale vorba pe amare rudyimata?

¹⁷ O Jehova peske andyalon, thaj vi peske manushen pe phuv pe kodo ingrel, te del palpale vorba pe amaro rudyimo (Heberenge 1:13, 14). But pelda si, ke na butesa pala kodo, kana varikon rudyindas te shaj hatyarel e Biblia, le Jehovaske Chache Manusha rodine les. Kado sikavel, ke le andyala zhutinen, thaj traden ke e „lashi vorba” te shaj ingren pe intrego phuv. (Ginav: Sikadyimaski 14:6!) Thaj butzhene boldamame aba ando rudyimo karing o Jehova, anda amaro pharimo, vaj kana trubundas amen variso. Pala kodo pale, zhutindas amen jekh phral (Godyaver Vorbi 12:25; Jakab 2:16).

18. Sar zhutil o Jehova peske sunto duxosa, thaj la Bibliasa, te del palpale vorba pe amare rudyimata?

 ¹⁸ O Jehova peske sunto duxosa del palpale vorba pe amare rudyimata. Kana anda kodo rudyinas, te zhutil amenge ande amaro pharimo, shajke peske sunto duxosa tradel amen, thaj del amen zor (2Korintus 4:7). O Jehova vi ande Biblia del palpale vorba pe amare rudyimata, thaj zhutil, godyaveres te shaj ushtyavas. Kana ginavas e Biblia, shaj rakhas kasave vershura, so zhutin amen. Pasha kado o Jehova pe kodo shaj ingrel varikas, kon duma del ande khangeri, ke kasavi vorba te phenel, so amen atunchi trubul. Vi le phuren pe kodo shaj ingrel, te ulaven amenca jekh lasho Bibliako versho (Galacia 6:1).

19. Sostar shaj dichol kade, ke o Jehova chi del palpale vorba pe amare rudyimata?

¹⁹ De shajke unyivar gindinasame pe kodo, ke sostar chi das inke palpale vorba o Jehova pe amare rudyimata. Te na bistras, ke voj zhanel kana, thaj sar te del palpale vorba. Zhanel, so trubul amen. Shajke, pe jekh vrama avri trubul te inkras ando rudyimo, te sikavas, ke vi kade gindinas so phenas leske, thaj avri te sikavas, ke vi chaches patyas ande leste (Lukach 11:5–10). Si kana, na kade del palpale vorba pe amaro rudyimo, sar zhukaras. Phenas, ke ande jekh pharimo leste boldasame, de voj chi nacharel o pharimo, feder zor del, avri te inkras. (Ginav: Filippi 4:13!)

20. Sostar te rudyinas butivar karing o Jehova?

²⁰ Bari patyiv si, ke shaj rudyinas kaj o Jehova! Shaj patyas, ke shunel amen (Asharimata 145:18). Sodivar avri shoras leske amaro jilo, majzuralo avla lesa amaro amalipe.