1. Pe soste shaj gindistu, pala soste but Bibliako sityaripe pinzhardan andar kadi ginadyi?

BUT Bibliako sityaripo pinzhardan, kana sityilan andar kadi ginadyi. Ke o Del lungo trajo shinadas, so si le mulenca, thaj le mule opre ushtyona (Predikator 9:5; Lukach 23:43; Janosh 5:28, 29; Sikadyimaski 21:3, 4). Shajke aba phires pe le Jehovaske  Chache Manushenge programura, thaj patyas, ke lende si o chachimo (Janosh 13:35). Vi kodo shaj, ke majzuraloj tyo amalipe le Jehovasa, thaj kade gindis, ke les kames te slugis. Anda kado, akanak pe kado shaj gindistu: „So trubul te kerav, te kamav te sluginav le Devles?”

2. So ingerdas jekhe etiopo manushes, te bolelpe?

² Jekh manush andar e Etiopia, pe kado gindindaspe ande le Jezusheske dyesa. Na butesa pala kodo, kana o Jezush opre ushtyilas andar o merimo, jekh sityardo, o Filip, vorbilas kadale manusheske. Andre sikadas leske, ke o Jezush si o Messiashi. Kado reslas le etioposko jilo, thaj sigo kado phendas: „Dikh, paji! So xutyilel man palpale te bolavma?” (Aposhtola 8:26–36).

3. a) So phendas o Jezush peske sityardenge? b) Sar trubul te bolen varikas?

³ E Biblia uzhes kodo sityarel, te kamesas te slugis le Jehovas, atunchi trubul te bolestu. O Jezush kado phendas peske sityardenge: „Sityaren andar sako nipo le manushen, thaj bolen len” (Mate 28:19). O Jezush pelda sikadas kodolesa, ke vi voj boldaspe. Na feri pe lesko shero shorde jekh cerra paji, vi tele gelas tela paji (Mate 3:16). Vi ande amare dyesa, kana bolelpe varikon, tela paji trubul te zhal.

4. So sikavel kaverenge, kana bolestu?

⁴ Te bolesatu, kodolesa vi angla kavera avri sikaves, ke le Devlesko amal kames t’aves, thaj les kames te slugis (Asharimata 40:7, 8). Anda kado, shajke pe kodo gindistu, ke so trubul te keres, te shaj bolestu.

5. a) So trubul te keres anglunes, angla soste bolestu? b) Sostar trubun le kristianicka programura?

⁵ Angla soste bolestu, trubul te pinzhares le Jehovas, thaj le Jezushes. Kado aba vi kerdan, ke sityos e Biblia. (Ginav: Janosh 17:3!) De kadalestar majbut trubul. E Biblia kodo phenel, ke uzhes thaj mishto trubul te pinzhares, so o Jehova kamel (Kolosse 1:9). Vi le Jehovaske Chache Manushenge programura zhutin, ke majpashal te zhas karing o Jehova. Kado si o jekh, anda soste kothe trubul t’aves pe le programura (Heberenge 10:24, 25).

6. Sar trubul te pinzhares e Biblia, te shaj bolestu?

⁶ O Jehova chi zhukarel, ke sakofelo te zhanes pe Biblia, angla soste bolestu. Chi kathar o etiopo manush chi zhukardas, ke sakofelo te zhanel angla soste bolelpe (Aposhtola 8:30, 31). Po Del pale mindig avla so sityuvas (Predikator 3:11). De angla soste bolestu, trubul te pinzhares, thaj andre te les la Bibliake feri le bare sityaripe (Heberenge 5:12).

7. Ande soste zhutindas tuke la Bibliako sityaripo?

⁷ E Biblia kado phenel: „Bipatyamosko nashtig avel varikon pe le Devleski voja” (Heberenge 11:6). Trubul, t’avel tut patyamo angla soste bolestu. E Biblia kodo phenel, ke unyizhene, kon ande dulmutani Korintusi trajinde, shunde kodo, so le Jezusheske manusha sityarde, thaj anda kado patyajle, thaj boldepe (Aposhtola 18:8). Vi tuke, kana sityilan e Biblia, zhutindas, te zhanes te patyas ande le Devleske shinaipe. Thaj vi ande kodo, ke le Jezushesko meripo zhanel te slobodil amen kathar o bezex, thaj kathar  o meripe (Jozhue 23:14; Aposhtola 4:12; 2Timoteus 3:16, 17).

8. So ingrela tut, te vorbis kaverenge pa kodo, so sityos?

⁸ Sar inke majbut sityos andar e Biblia, thaj dikhes, sar zhutil ande tyo trajo, tyo patyamo majzuralo avla. Pe kodo ingrela tut, te vorbis kaverenge pa kodo, so sityos (Jeremiash 20:9; 2Korintus 4:13). De kasa te vorbisares pa kado?

9–10. a) Kasa shaj vorbis pe kodo, so sityos? b) So trubul te keres, te kames te ingres e lashi vorba le phralenca, kasa ande khangeri phires?

⁹ Shajke kamesas te vorbis pa kodo, so sityilan tya familijasa, tye amalenca, kodolenca, kon pasha tute beshen, thaj kasa butyi keres. Kado lashoj. De mindig dragimasa, thaj kamipesa ker kado. Pala jekh cerra vrama, vi le phralenca ande khangeri, shaj zhas te ingres e lashi vorba. Kana kade hatyares, ke gata san pe kado, vorbin kodole phralesa, kon sityol tusa e Biblia. Phen leske, ke kames te ingres e lashi vorba le phralenca ande khangeri. Vi voj kade te dikhela, ke gata san pe kado, thaj kade trajis sar e Biblia iskiril, atunchi duje phurenca vorbisarena.

¹⁰ So avla atunchi? Le phure vorbina tusa, te dikhen, hatyares la Bibliake bare sityaripe, patyas ande lende, kade trajis tye dyesa sar e Biblia phenel, thaj vi chaches le Jehovasko Chacho Manush kames t’aves. Na bister, ke le phure ande khangeri pe sakoneste grizhin, vi pe tute. Ande kado, na dara te vorbis lenca (Aposhtola 20:28; 1Peter 5:2, 3). Pala kado, le phure  phenen tuke ke shaj ingres e lashi vorba le phralenca, kasa ande khangeri phires.

11. Sostar trubul te boldes pe tyo trajo, angla soste le phralenca shaj ingres e lashi vorba?

¹¹ Shajke le phure kodo phenen, ke inke trubul te boldes pe varisoste pasha kodo, te shaj ingres e lashi vorba le phralenca. Sostar trubul andre te les lengi vorba? Ke kana kaverenge vorbinas po Del, ande le Jehovasko anav sam kothe, thaj kade trubul te trajinas, patyiv te anas pe leste (1Korintus 6:9, 10; Galacia 5:19–21).

12. Sostar trubul sakono te bunul peske bezexa?

¹² Inke variso trubul te keres, angla soste bolestu. O Peter aposhtol kado phendas: „Bunun tumare bezexa, thaj bolden tumen kaj o Del, te jertin tumare bezexa” (Aposhtola 3:19). So si kodo, ke bununas amare bezexa? Ke sununas sakofelo nasul, so kerdam. Phenas melale sexualisha butya kerdan, atunchi trubul te bunus kodol. Thaj inke vi ande tyo intrego trajo pe kodo te sanas, te keres so lashoj, vi atunchi trubul te bunus tye bezexa, ke savorazhene bezexale sam, thaj trubul amen le Devlesko jertimo (Roma 3:23; 5:12).

13. So si kodo, ke boldestu?

¹³ De dostaj feri te sunus, ke kerdan variso nasul? Nichi. O Peter vi kodo phendas, ke „bolden tumen”. Kado kodo sikavel, ke si te mukhes, tye nasul butya, thaj kodo si te keres, so lashoj. Phenas, anglunes zhas varikaj. Pala jekh vrama opre pinzhares, ke na po lasho drom zhas. So keresa? Majlokhes zhas, tordyos,  boldestu, thaj po lasho drom zhas majdur. Vi kade, kana sityos e Biblia, shajke opre pinzhares, ke trubul te boldes pe varisoste ande tyo trajo. Av gata pe kodo, te boldestu, thaj te keres o lasho.

14. Sar zhanes perdal te des tu le Devleske?

¹⁴ Jekh kaver baro ushtyaimo, so trubul te keres angla soste bolestu, kodoj, ke perdal des tu le Devleske. Kana perdal des tu le Jehovaske, ando rudyimo shinaves leske, ke feri les patyivisa, thaj kodo avla o majangluno ande tyo trajo, ke kodo keres, so voj kamel (5Mozesh 6:15).

15–16. So ingrel varikas pe kodo, perdal te del pesko trajo le Devleske?

¹⁵ Kana shinaves le Jehovaske, ke feri les slugisa, kodo kasavoj, sar kana shinaves kodoleske, kas kames, ke lesa kames tele te trajis tyo trajo. Gindin andre, ke jekh mursh thaj jekh zhuvji pinzharenpe jekhavresa. Sar o mursh majfeder pinzharel la zhuvja, kamel la, thaj romnyake kamel te lel la. Kadi bari butyi si, de o mursh gataj kado pe peste te lel, thaj so kadalesa phirel, ke kamel la zhuvja.

¹⁶ Sar majfeder pinzhares le Jehovas, majfeder kamesa les, thaj tya intrego zorasa pe kodo avesa, les te slugis. Kado pe kodo ingrela tut, ke ando rudyimo te shinaves leske, ke les slugisa. E Biblia sikavel, ke kon pala o Jezush kamel te zhal, kodoleske tele trubul te phenel pa peste (Marko 8:34). So si kado? Kodoj, ke ande tyo trajo o majangluno kodo trubul t’avel, te mukhestu le Jehovaske. Kado inke vi kathar kodo  majanglunoj, so kames te reses ando trajo. (Ginav: 1Peter 4:2!)

17. Sostar chi den perdal pengo trajo unyizhene le Jehovaske?

¹⁷ Unyizhene anda kodo chi den perdal pengo trajo le Jehovaske, ke kathar kodo daran, ke chi zhanena andre te inkren pengi vorba, les te sluginen. Chi kamen te azban le Jehovas. Shajke kade gindin, te na dena pen perdal leske, atunchi chi shinela krisi pe lende o Del.

18. So zhutil, te na daras kathar kodo, ke azbas le Jehovas?

¹⁸ Tyo kamipo karing o Jehova, zhutila, te na daras kathar kodo, ke azbas les. Ke kames les, sakofelo keresa, te inkrestu pasha kodo, so shinadan (Predikator 5:4; Kolosse 1:10). Chi gindisa, ke pharoj kade te trajin, sar o Jehova kamel. O Janosh aposhtol kado iskirindas: „te kamas le Devles, andre inkras leski vorba. Leske vorbi pale naj phare amenge” (1Janosh 5:3).

19. Sostar te na daras, perdal te des tyo trajo le Jehovaske?

¹⁹ Chi trubul bidoshako t’aves pasha kodo, perdal te destu le Jehovaske. Voj soha chi zhukarel amendar majbut, sar so zhanas te keras (Asharimata 103:14). Zhutila kodo te keres, so lashoj (Izaiash 41:10). „Patya ando Jehova intregone jilesa . . . atunchi voj lasharela tyo drom” (Godyaver Vorbi 3:5, 6).

20. So trubul te keres, pala soste perdal dan tyo trajo le Devleske?

²⁰ Kade hatyares, ke gata san, perdal te des tyo trajo le Jehovaske? Pala soste kado kerdan, shaj avel o kaver ushtyaimo: trubul te bolestu.

21–22. Sar zhanes avri te sikaves tyo patyamo?

 ²¹ De duma ande tyi khangeri le phureske, kon kethane xutyilel le majbute phuren, ke perdal dan tyo trajo le Jehovaske, thaj kames te bolestu. Pala kado vorbil le kaver phurenca, te dikhen perdal tusa la Bibliake bare sityaripe. Kade te dikhen, ke gata san, atunchi phenen tuke, ke shaj bolestu pe Jehovaske Chache Manushengo kongressushi. Po kongressushi  avla jekh programo, so pa bolipe vorbil. Kon programo inkrel, opre shola duj pushajipe kodolenge, kon kamen te bolenpe. Sar palpale des vorba, kodolesa avri sikaves tyo patyamo (Roma 10:10).

²² Pala kado avel o bolipe. Tela paji trubul te zhas. O bolipe angla sakono sikavel, ke perdal dan tyo  trajo le Jehovaske, thaj le Jehovasko Chacho Manush san.

23. So si „ande Dadesko, ande Shavesko thaj ande sunto duxosko anav” te bolenpe?

²³ O Jezush kodo phendas, ke leske sityarden „ande Dadesko, ande Shavesko thaj ande sunto duxosko anav” bolena. (Ginav: Mate 28:19!) So si kado? Kodo, ke patyas ande le Jehovasko rajipe, kuch si amenge, ke o Jezush mulas anda amende, thaj ke sar kerel o Jehova so kamel, peske sunto duxosa (Asharimata 83:18; Mate 28:18; Galacia 5:22, 23; 2Peter 1:21).

24–25. a) So sikavel o bolipe? b) So dikhasa ando paluno kotor?

²⁴ O bolipe jekh bari butyi sikavel. Kana tela paji zhas, kasavoj, sar kana meresas. Pala kado aba na kade trajis, sar angla kodo. Pala soste avri aves ando paji, nyevo trajo avla tut, thaj kathar kado, kodo keres so o Del mangel tutar. Kodo sikavel, ke aba le Jehovas slugis. Na bister, ke na jekhe manusheske, organizacijake, vaj butyake dan perdal tyo trajo. Tyo trajo aba le Jehovaskoj.

²⁵ Perdal te destu le Devleske, kodo zhutila tut, ke majzuralo t’avel tyo amalipe lesa (Asharimata 25:14). De o bolipe inke na kodoj, ke jekh manush muntundaspe. O Pal aposhtol kado iskirindas: „vi kade keren butyi pe tumaro muntimo, kade, ke daran thaj izdran” (Filippi 2:12). O bolipe feri o angluno ushtyaimo si kaj kodo, te muntusarasame. Sar zhanes majpashal te ashes kaj o Jehova? O paluno kotor del palpale vorba pe kado.