1–2. Savo pushajipo shon opre butzhene?

KANA mishkilpe e phuv, ingrel jekh gav. Jekh manush, shovengesa butezhenen mudarel ande jekh khangeri. Jekh dej merel ando zhungalo nasvalipe, thaj kothe mukhel peske panzhe shavoren.

² Kana kasave katastrofi thaj nasulimata peren, butzhene pushen: „Sostar?” Chi hatyaren, sostar si kattyi xoji thaj dukh pe luma. Vi ande tute opre avilas aba kado pushajipe?

3–4. a) Lashoj, te pushas le Devles, ke sostar mukhel e dukh? b) So hatyarel o Jehova kana dikhel o nasulimo thaj e dukh?

³ Andar e Biblia zhanas, ke vi kasave manusha opre shute kado pushajipe, kon chachikanes patyanas ando Del. O jekh o Habakuk profeta, kado pushlas kathar o Jehova: „Sostar mukhes, te dikhav o chorripe? Sostar chi dikhen tye jakha o nasulipe? Sostar si mudaripe thaj maripe angla mure jakha? Sostar si xoji thaj xape?” (Habakuk 1:3).

⁴ Ando Habakuk 2:2, 3 shaj ginavas, sar del o Del palpale vorba pe kado pushajipo, thaj so shinadas, ke lasharela o nasulimo. O Jehova zurales kamel le manushen. E Biblia kado phenel: „voj grizhil pe tumende” (1Peter 5:7). Ova, le Devles majfeder azbal sar amen, ke kattyi dukh si (Izaiash 55:8, 9). Atunchi sostar si kattyi dukh ande luma? Akanak dikhas kado.

5. So sityaren but rashaja pal e dukh? So sityarel e Biblia?

⁵ Rashaja, pastora, thaj vi kaver sunti manusha butivar kodo phenen, ke o Del kamlas kodo, ke le manushen dukha t’aven. Si, kon kodo phenen, ke o Del aba anglal tele iskirindas sakofelo, so amenca perenpe, kade vi le tragediji, thaj ame soha nashtig hatyaras, ke sostar si kado. Kavera inke vi kodo phenen, ke le manusha, vi le shavora, anda kodo meren, le Devlesa te shaj aven ando cheri. De kado naj chaches. Soha na o Jehova kerel le nasulimata. Kado si ande Biblia: „Nashtig avel, ke o chacho Del nasul te kerel, ke o Majbaro bengimo te kerel!” (Job 34:10).

6. Sostar doshajaren butzhene le Devles, anda e dukh?

⁶ Butzhene anda kodo doshajaren le Devles anda e dukh, so ande luma si, ke kade gindin, voj si la lumako raj. De andar o 3. kotor zhanglam, ke la lumako raj o Beng si.

7–8. Sostar si kattyi dukh ande luma?

⁷ Andar e Biblia zhanas, ke „e intrego luma ande le bengesko vast si” (1Janosh 5:19). La lumako raj o Beng, nasul si, thaj losshal, kana azbal varikas. „E intrego phuv rigate ingrel” (Sikadyimaski 12:9). Butzhene zhan pala leste. Kado feri jekh si, ande kodola, ande soste e luma pherdoj xoxajimasa, xojasa, thaj nasulimasa.

⁸ Vi kaver si, anda soste kasave but dukh si ande luma. Pala soste o Adam thaj e Eva chi mukhlepe le Devleske, bezex dine perdal penge shavorenge. Thaj ke le manusha bezexalej, dukh keren kaverenge. Butivar avri kamen te vazdenpe mashkar le kavera. Xape si mashkar lende, marenpe, thaj dar mukhen  pe kaverende (Predikator 4:1; 8:9). Thaj si, kana anda kodo si dukh le manushen, ke „sako dyes shaj peren. . . so chi zhukaren” (Predikator 9:11). Phenas, zhas po drom, thaj jekh baro kasht pe tute perel. Anda kodo sas, ke armaja dine tut, vaj nasul manush san? Nichi! Feri ande nasul vrama sanas, pe nasul thaneste.

9. Sostar shaj zhanas, ke trubul t’avel variso, ke o Del inke chi nachardas e dukh?

⁹ Soha na o Jehova kerel e dukh. Na voj kerel le maripe, le bezexa, thaj o nasulipo. Chi le katastrofi, sar kana mishkilpe e phuv, kana zurales phurdel e balval, vaj kana avri shordyol o paji, sa kadala na o Jehova kerel. De kana o Jehova si o majbaro pe intrego luma, atunchi sostar chi nacharel le but dukha, so adyes si ande luma? Zhanas, ke o Del anda pesko jilo grizhil pe amende, ande kado trubul t’avel variso, ke inke chi nachardas e dukh (1Janosh 4:8).

10. So xoxadas o Beng po Jehova?

¹⁰ Ando Edeno o Beng rigate ingerdas le Adamos thaj la Eva. Kodo xoxadas po Del, ke palpale xutyilel variso lasho kathar o Adam, thaj kathar e Eva, thaj voj nasul raj si. Kamlas te patyavavel lenca, ke voj majlasho raj avlas, sar o Jehova, thaj chi trubul len o Del (1Mozesh 3:2–5; dikh: Informaciovo 27, O Jehova si o majbaro Raj).

11. Pe sosko pushajipo rodas palpale vorba?

¹¹ O Adam thaj e Eva chi mukhlepe le Jehovaske, thaj leske gele. Kodo gindinde, von shaj phenen so si o lasho thaj so si o nasul. Sar zhanelas o Jehova andre te sikavel, ke le kecitoren naj chachipe, thaj voj zhanel majfeder, so si amenge o majlasho?

12–13. a) Sostar chi mudardas sigo o Jehova le kecitoren? b) Sostar mukhlas o Jehova, o Beng te rajil pe luma, thaj le manusha pen te traden?

 ¹² O Jehova chi mudardas sigo le Adamos thaj la Eva. Mukhlas lenge, t’avel len shavora. Lenge shavorenge pale mukhlas, te shaj gindinpe, kas kamen penge rajeske. O Jehova kodo kamlas, ke bidoshale manusha te trajin pe phuv, thaj kado o Beng nashtig shinel perdal (1Mozesh 1:28; Izaiash 55:10, 11).

¹³ O Beng angla le but milliardura andyala phendas kodo, ke o Jehova nasul raj si (Job 38:7; Daniel 7:10). Anda kado o Jehova vrama das le Bengeske, te sikavel andre, ke chachimo si les. Vi le manushen das vrama, ke tela le Bengesko vast te keren pengo rajimo, ke te dichol, ke bi le Devlesko sar zhanen te trajin.

14. So shaj sityuvas ande kodo, so tela but ezera bersha pele?

¹⁴ Le manusha but ezera bersha zumaven te rajinpen, de chi phirde mishto. Po Beng andre sikadyilas, ke xoxamno si. Le manushen trubul o Del. Le Jeremiash profetas chachipe sas, kana kado iskirindas: „Mishto zhanav Jehova, ke na le manusheskoj lesko drom. Chi kodo chi zhanel o manush, te tradel pesko ushtyajimo” (Jeremiash 10:23).

15–16. a) Sostar mukhel o Jehova, ke kasavi lungo vrama t’avel dukh? b) Sostar chi andas inke thaneste o Jehova kodo, so o Beng rumundas?

¹⁵ Sostar mukhel o Jehova, ke kasavo lungo vrama t’avel dukh? Sostar chi nacharel aba o nasulimo? Vrama trubundas pasha kodo, andre te sikadyol, ke le Bengesko rajimo nasul si. Le manusha sakofelo rajimo  zumade aba, de nasules phirde. Shajke adyes majbut zhanen le manusha pe luma, de o bichachimo, o nasulimo, o bezex, thaj o marimo majbaroj, sar dulmut. Bi le Devlesko chi zhanas mishto te tradas amen.

¹⁶ De o Jehova inke chi andas thaneste kodo, so o Beng rumundas. Kado te kerelas, kodolesa zhutilas le Bengesko rajimo, de o Del kado soha chi kerela. Thaj shajke le manusha kodo patyanas, ke zhanen te traden pengo drom. De kado xoxajimo si, thaj o Jehova zhanel, ke le manusha chi zhanen te traden pengo drom. Voj soha chi xoxavel (Heberenge 6:18).

17–18. Sar lasharela o Jehova kodol but nasulimo, so o Beng kerdas?

¹⁷ Thaneste zhanel te anel o Jehova kodo but nasulimo, so o Beng thaj le manusha kerde? Sar te na, ke o Del sakofelo zhanel te kerel. O Jehova uzhes dikhel, kana avla andre sikado, ke le Bengeske intregi xoxajimata naj chache. Pala kado e phuv nyevi kerela, sar so vi majanglal kamlas. „Kon ande serimaski gropa si”, opre ushtyona (Janosh 5:28, 29). Le manusha chi avna majbut nasvale, thaj chi merena. O Jezush lasharel sako chorrimo, so o Beng kerdas. O Jehova le Jezushesa le Bengeske sakofelo butya rumusarel (1Janosh 3:8). Najisaras, ke o Jehova zhukarel pe amende, kade shaj pinzharas les, thaj pasha leste shaj tordyuvas, voj t’avel amaro raj. (Ginav: 2Peter 3:9, 10!) Vi te si amen dukha, voj zhutil amen avri te inkras (Janosh 4:23; ginav: 1Korintus 10:13).

¹⁸ O Jehova chi zurarel pe amende, voj t’avel amaro raj. Slobodipe das le manushen. Dikhas, so sikavel, ke dine amen kado baro kuchimo.

19. Sosko kuch das amen o Jehova? Sostar te najisaras kado?

¹⁹ O slobodipe jekh baro kuchimo si kathar o Jehova, sosa butesa kavera sam, sar le allatura. Le allatura feri kodo keren, so ande lende shutas o Del, ande kado zhanen, kaj te rakhen xamasko, sar te len pa pende sama, thaj sar te keren kavera butya. Ame pale shaj gindinasame, sar kamas te trajinas amaro trajo. Shaj gindinasame pe kodo, kamas lossh te anas le Jehovaske, vaj nichi (Godyaver Vorbi 30:24). Chi sam robotura, kon feri kodo keren, so phenen lenge. Ame shaj phenas, ke soske manusha kamas te avas, kon t’aven amare amala, thaj so te keras amare trajosa. O Jehova kodo kamel, te losshas le trajoske.

20–21. Savo si o majlasho drom, pe soste shaj phires?

²⁰ O Jehova kodo kamelas, te kamas les (Mate 22:37, 38). Kasavoj, sar jekh dad, kon atunchi losshal, kana lesko shavoro andar pesko jilo phenel leske, ke „kamav tut”, thaj na anda kodo, ke trubul. O Jehova pe amen mukhel, te gindinas perdal, kamas les te sluginas, vaj nichi. O Beng, o Adam, thaj e Eva kodo gindinde, ke dumo bolden le Jehovaske. Tu sar trajisa tye slobodimasa?

²¹ Ker kade, ke le Jehovas slugis! Aba but milliovura gindinde kade, ke lossh anen le Devleske, thaj boldenpe kathar o Beng (Godyaver Vorbi 27:11). So shaj keres anda kodo, ke kothe te aves ande le Devleski nyevi luma, kana nacherela e dukh? Andar o kaver kotor zhanasa e vorba.