O Jehova kasavo Del si, kon kodo kamel, ke le chaladura boldoga te aven (1Timoteusheske 1:11). Voj kerdas kodo, te beshen kethane o mursh, thaj e zhuvlyi. E gazhikani colax trubul pasha kodo, ke e intrego familija majmishto te hatyarelpe. Te kamas te shunas le Devles, kade trubul te colaxaras, sar kodo them kamel, kaj beshas. Dikh: Lukachesko 2:1, 4, 5.

Sostar kamel o Del e colax? Ke kodo kamel, ke zuralo te avel lengo trajo. O Del kodo zhukarel seldujzhenendar, ke patyivale te aven karing jekhavreste (Biboldenge [Héberek] 13:4). Xojajvel kana mukhenpe (Malakiasheske 2:16). Feri numa atunchi mukhel, te mukhenpe le kerestenya, thaj pale te colaxaren, kana o kaver colax phaglas. Dikh: Matevesko 19:3–6, 9.

O Jehova kade kerdas le murshes, thaj le zhuvlya, te zhutin jekhavres (Genezarimaski [1Mózes] 2:18). Le mursheske trubul te inkrel peska familija. Vi kodi leski butyi si, te sityarel peska familija pe le Devleski vorba. Le mursheske, andar pesko jilo trubul te kamel peska romnya. Seldujzhenenge trubul te kamen, thaj te patyivin jekhavres. Chi jekh naj bidoshako, ande kado trubul te jertin jekhavreske. Dikh: Efezushicko 4:31, 32; 5:22–25, 33; 1Peteresko 3:7.

Kana gindo si mashkar lende, o kamipe zhutil te shaj lasharen la (1Korintushicko 13:4, 5). Le Devleski vorba na mukhel rigate te zhan anda kodo, te lasharen penge problemi. Dikh: 1Korintushicko 7:10–13.

O Jehova kodo kamel, le shavora te losshan. E legmajlashi vorba del lenge, te shaj trajin shukar ternipe. Mangel len, te sityon anda kodo, so dine len godyi, thaj so dikhle, kathar pengo dad, thaj kathar pengi dej. Te zumaven avri soski lossh del, kana kodo keren so o Del kamel (Kolossicko 3:20). Dikh: Predikatoreski 11:9–12:1; Matevesko 19:13–15; 21:15, 16.

O dad thaj e dej zurales trubul te keren butyi, te zhanen te den penge shavoren, te xan, gada, thaj te avel len kaj te beshen (1Timoteusheske 5:8). Anda kodo, lossh te avel ande shavora, trubul te kamen le Devles, thaj te shunen leski vorba (Efezushicko 6:4). Kana dikhen kodo ke lengo dad, thaj lengi dej, kamen le Devles, barol lengo jilo. Kade te bararena penge shavoren, sar o Del phenel, kodo ande pengi godyi lena. Dikh: Dujto Krisaki (5Mózes) 6:4–7; Parabolengi (Példabeszédek) 22:6.

Losshan le shavora kana asharen len. De trubul vi kodo, te den pe lende duma. Kado sityaripe sama lel pe lende, te na keren kasavo, pala soste briga avla (Parabolengi 22:15). Naj slobodo zurales te xutyilen len. Dikh: Kolossicko 3:21.

Le Jehovaske Chache Manusha but ginadyi dine avri, te zhutinen le dadenge, le dejange, thaj le shavorenge. Dikh: Salmongi (Zsoltárok) 19:7, 11.