Галатия 3:1-29
-
Тэ ритярэн о законо или тэ патян? (1—14)
-
«Кодэва, ко андярэл пэс правильно, лэла тэ жувэл, если на парашэл тэ патял» (11)
-
-
Лэ Авраамости сас дино алав най важ кода, кай во ритярэлас о законо (15—18)
-
О Христос жыля лэ Авраамостар (16)
-
-
Состэ и сар сас дино о законо (19—25)
-
Лэ Дэвлэстирэ шавэ через кода, кай патян (26—29)
-
Лэ Авраамостирэ бэяцэ — када кодэла, ко прижал лэ Христости (29)
-
3 Найгодявэрнэ галаторя! Ко опхохадя тумэн? Тумэнди драго динэ тэ полэн, состэ о Исусо Христос муля по столбо.
2 Пала ек камав тэ пушав тумэндар. Васо тумэнди сас дино о свынто зор: кай ритярэн о законо или кай патяе андэ кода, со ашундэ?
3 Тумэ чаче кацавэ найгодявэрнэ? Линэ тэ терэн вся па лэ Дэвлэстирятэ, ай акана доандярэн и дила, сар када терэн лэ бэзэхэстирэ мануша?
4 Тумэ чаче евья пэрэандярдэ скати ԥаримос? Не можэт вся када тэ авэл евья!
5 Васо кодэва, ко дэл тумэнди о зор и сыкавэл машкар тумэндэ чудеса, терэл вся када? Важ кода, кай тумэ ритярэн о законо, или важ кода, кай патяе андэ кода, со ашундэ?
6 Погиндон пала Авраамо, саво «патяя лэ Иеговасти*, и во прижангля лэ Авраамос найдошалэса».
7 Тумэ точно ӷанэн, кай лэ Авраамостирэ шавэ — када кодэла, ко патял.
8 О Дэл май данглал ԥэндя через и Свынти Лила, кай прижанэна найдошалэнца лэ манушэн анда авэр народоря, если вонэ патян. И инке жы каринг када во ԥэндя кадэя лащи новость лэ Авраамости: «Через тутэ блаӷословинапэ всаворэ народоря».
9 Кочай кодэлэн, ко патял, блаӷословина кадя жэ, сар и лэ Авраамос, саво патяя.
10 Пэ всаворэ, ко надеийпэ по законо, можэт тэ дэл и бида, важ кода кай пистромэ: «Тэ дэл и бида пэ кодэва, ко на ритярэл вся, со пистромэ андо законо».
11 Тай инке, драго дицол, кай никас на прижанэна найдошалэса англа Дэл через о законо, важ кода кай «кодэва, ко андярэл пэс правильно, лэла тэ жувэл, если на парашэл тэ патял».
12 Ай важ о законо на трэбуй, кай о мануш тэ патял, но «кодэва, ко лэс ритярэл, лэла тэ жувэл через лэстэ».
13 О Христос витиндя амэн и спасысардя кодэлэстар, кай пар мэндэ тэ на дэл и бида через о законо. Када пэр лэстэ вместо амэндэ дя и бида, важ кода кай пистромэ: «Бибахтало кодэва, ко амбладёл по столбо».
14 Вся када трэбуй сас, кай через о Христос Исусо лэ Авраамостири блаӷословения тэ дорэсэлпэ и аврэ народонэнди. Тоди через кода, кай амэ патяс, амэнди тэ авэл дино о зор, пала саво сас ԥэндо.
15 Ԥрала, призындярава ек примеро анда жызня: кала сас стердо о доӷоворо, қанч дажэ если лэс потвердисардя о мануш, тоди лэс нико не можэт тэ парувэл или лэстар тэ отԥэндёл.
16 Ни акэ, о Дэл дя обещании лэ Авраамости и лэстирэ бэятости. Андэ Свынти Лила на ԥэнэнпэ: «И тирэ бэятонэнди*», со сыкадоп пэ бутэндэ. Но котэ ԥэндо пала еқэстэ: «И тирэ бэятости», — када о Христос.
17 Но кода, кай о Дэл через 430 бэрш дя о законо, на сыкадя, кай во на ритярэл пэско доӷоворо и на приритярдёл пэстиря обещанияти.
18 Важ кода кай если и блаӷословения дорэсэлпэ через о законо, тоди када ритярдёл най пэ обещания. Но о Дэл, кай лэстэ баро ковло ди, дя обещания лэ Авраамости, кай лэсти тэ дорэсэлпэ и блаӷословения.
19 Ай состэ тоди о законо? Ӷэт май интя о Дэл дя амэнди о законо, кай через лэстэ тэ дицол и вэрыто дила. Кадэва законо трэбуй сас, пока анда лэ Авраамоско колено на авеля о бэято, савэсти сас дини обещания. О Дэл дя кадэва законо лэ анӷелонэнди, савэ пэрэдинэ лэс через о помошнико.
20 Но кала о доӷоворо стердо еқа ригатар, тоди ужэ на трэбуй кодэва, через кастэ во терэлпэ. Ай о Дэл вся стердя екжэно.
21 Вижал со, чаче о законо на зжалпэ лэ Дэвлэстирэ обещаниенца? Най! Важ кода кай тэ авелоп кай и мануша о законо, саво дэл и жызня, тоди лэн прижанглоп найдошалэнца через о законо.
22 Но через и Свынти Лила амэ ӷанас, кай пэ всаворэ ля тэ хулаий о бэзэх. Кочай кодэлэндэ, ко патял андо Исусо Христос, авэла лашымос, пала саво о Дэл дя обещания.
23 Но жы каринг кода, сар амэ тэ патяс андо Христос, амэн фэрияс о законо, и во хулаияс пар мэндэ, пока амэ аштярасас и время, андэ сави о Дэл дэла пала када тэ ӷанас.
24 Кадя, о законо ля тэ диқэл пала амэндэ сар пала бэяцэ, кай тэ андярэл каринг о Христос. Тоди амэн моӷут тэ прижанэн найдошалэнца через кода, кай патяс.
25 Но акана, кала амэ патяям андо Христос, о законо парашэля тэ диқэл пала амэндэ сар пала бэяцэ.
26 Всаворэ тумэ лэ Дэвлэстирэ шавэ, важ кода кай патян андо Христос Исусо.
27 Всаворэ тумэ, ко болделя, кай тэ авэл лэ Христоско, ашэлэ кацавэ жэ, сар о Христос.
28 Неважно, ко ту — евреё или греко, рабо или свободно, мурш или жувли, важ кода кай всаворэ тумэ ек вместе лэ Христоса лэ Исусоса.
29 И если тумэ прижан лэ Христости, тоди тумэ бэяцэ анда лэ Авраамоско колено, и тумэнди дорэсэлапэ о лашымос, сар сас дини обещания.
