Дила 10:1-48
-
Лэ Карнилиёсти сыкадёл о анӷело (1—8)
-
Лэ Петрости сыкадёл: жывотни, савэн о Дэл стердя вужэ (9—16)
-
О Пётро авэл каринг о Карнилиё (17—33)
-
О Пётро росԥэнэн важ о Дэл лэ манушэнди анда авэр народоря (34—43)
-
«О Дэл всаворэнца обжалпэ еқэндар» (34, 35)
-
-
Лэ манушэнди анда авэр народоря дино о свынто зор, и вонэ болдён (44—48)
10 Андэ Кеса́рия жувэлас мануш, савэс ақарэнас Карни́лиё. Во сас баро халавдо* андо италийско халавдицко отрядо*.
2 О Карни́лиё полэлас лэ Дэвлэс всаворэ́ пэстирэ ереса, поможыяс лэ чорорэнди и вся и время мангэласпэ лэ Дэвлэсти.
3 Варикай в три часа дня* лэсти сыкаделя лэ Дэвлэско анӷело, саво авеля каринг лэстэ и ԥэндя: «Карни́лиё!»
4 О Карни́лиё пэрэдарайля, подиқля пэр лэстэ и пушля: «Со кацаво?*» О анӷело ԥэндя: «О Дэл ашундя тирэ молитвы и додиқля тири лащи дила.
5 Бишал манушэн андэ Ёпия пала Си́мано, пэ саво ԥэнэн Пётро.
6 Во ӷостюет кай о Си́мано, саво мастеро пэ ӷаравля. Лэско цэр тердёл паша моря».
7 Сар кати о анӷело, саво дэлас дума лэса, ужылятар, о Карни́лиё ақардя дуе слуӷонэн и еқэ халавдэс, саво сас фартэ верущё мануш и сас анда лэско отрядо.
8 Во вся лэнди росԥэндя и бишалдя лэн андэ Ёпия.
9 Пэ авэр дес, варикай в 12 часов дня*, кала кодэла мануша ужэ пашонас каринг о форо, о Пётро вазгляпэ пэ крыша, кай тэ мангэлпэ.
10 Во сас фартэ боқало и камэлас тэ хал. Пока гитонас тэ хан, лэ Петрости сыкаделя варисо па небо.
11 Во додиқля, сар ԥэрнаделя о небо, и варисо кацаво, со шолпэ пэ бари скатэрка анда лёно, сави ритярэнас штарэ краёнэндар и змэкэнас пэ ԥув.
12 Пэр латэ сас бут разни жывотни штарэ пэрнэнца, кодэла, ко ползыий па ԥув, ай кадяжэ и чирикля.
13 Во ашундя ӷолосо: «Ущи, Пётро, зашын любонэ жывотнонэс и ха!»
14 Но о Пётро ԥэндя: «Най*, мэ никала на хавас нисо маӷримэ и мэлало».
15 О ӷолосо до дуйто ԥэндя лэсти: «Будэр на ԥэн маӷримэ пэ кода, со о Дэл стердя вужо».
16 Када сас ԥэндо и до трито разо, и посли када и скатэрка сразу жэ сас вазгли по небо.
17 О Пётро нащи полэлас, со вся када значит, ай андэ кадэя время и мануша, савэн бишалдя о Карни́лиё, виарақлэ лэ Симаноско цэр и терделэ паша вороты.
18 Вонэ ӷромко пушлэ, най катэ ӷостюет о Си́мано, пэ саво ԥэнэн Пётро.
19 О Пётро инке гиндояс пала кода, со лэсти сыкаделя, кала через о свынто зор сас ԥэндо: «Тут родэн трин мануша.
20 Змэкпэ тэлэ и смило жа лэнца, важ кода кай мэ лэн бишалдэм».
21 О Пётро ԥэндя кадэлэ манушэнди: «Када ман тумэ родэн. Состэ тумэ кардэ авелэ?»
22 Вонэ ԥэндэ лэсти: «Амэн бишалдя о баро халавдо о Карни́лиё, саво ритярэл лэ Дэвлэско законо и дарал лэстар и пэ саво стон патив всаворэ евреёря. Лэсти через о свынто анӷело сас ԥэндо лэ Дэвлэстар, кай во тэ бишалэл манушэн пала тутэ и тэ виашунэл вся, со ту ԥэнэса».
23 О Пётро ақардя лэн тэ зажан андо цэр и анда ди приля лэн.
Тэсара во жыля лэнца, и лэса жылэ дэсавэ ԥрала анда Ёпия.
24 Пэ авэр дес во авеля андэ Кеса́рия. О Карни́лиё ужэ аштярэлас лэн: во ақардя пэстирэ родос и лэ друӷонэн.
25 Кала о Пётро пашэля каринг и града, о Карни́лиё вижыля каринг лэстэ, пэля каринг лэстирэ пэрнэ и тэлеля.
26 Но о Пётро вазгля лэс и ԥэндя: «Ущи, мэ кацаво жэ мануш, сар и ту».
27 Пока во дэлас дума лэ Карнилиёса, вонэ зажылэ андо цэр, и во додиқля, кай котэ стидяпэ бут миро.
28 О Пётро ԥэндя лэнди: «Тумэ драго ӷанэн, кай лэ евреёнэнди нащи тэ вэдинпэ лэ манушэнца анда авэр нацыя или тэ зажан лэндэ андэ града. Но о Дэл сыкадя манди, кай ни ек мануш на трэбуй тэ авэл важ мандэ маӷримэ или мэлало.
29 Важ када, кала бишалдэ пала мандэ манушэн, мэ би алавэско жылэм лэнца. Ай акана ԥэнэн, состэ тумэ ман ақардэ?»
30 О Карни́лиё ԥэндя: «Штар дес палпалэ, варикай андэ кадэя время, кала сас три часа дня*, мэ мангаваспэ цэрэ, и акэ англа мандэ появисайля мануш андэ ӥда, сави светияспэ,
31 и ԥэндя: „Карни́лиё, о Дэл ашундя тири молитва и додиқля* тири лащи дила.
32 Важ када бишал манушэн андэ Ёпия и ақар каринг пэстэ лэ Симанос, пэ саво ԥэнэн Пётро. Во ӷостюет кай о Си́мано, саво мастеро пэ ӷаравля; лэско цэр тердёл паша моря“.
33 Мэ сразу бишалдэм манушэн пала тутэ, и амэ фартэ ради, кай ту авелян. Акана амэ всаворэ стидямпэ катэ англа Дэл и камас тэ виашунас, со о Иегова* ԥэндя тути тэ росԥэнэс».
34 Тоди о Пётро ԥэндя: «Акана мэ точно ӷанав, кай о Дэл всаворэнца обжалпэ еқэндар
35 и шол сама* манушэс анда любо народо, если во дарал лэстар* и терэл правильно.
36 О Дэл бишалдя лэ израильтянонэнди и лащи новость пала мирно жызня через о Исусо Христос, саво Хулай пэ всаворэ мануша.
37 Тумэ ӷанэн, кай посли крещения, пала сави росԥэнэнас о Иоа́но, спэрва андэ Галиле́я, ай потом па вся Иуде́я ашунделя и дума:
38 кай о Дэл витидя свынтонэ зорэса лэ Исусос анда Назаре́то и дя лэсти зор и кай кадэва Исусо ԥирэлас па кадэла краёря, терэлас лашымос и исцэлияс кодэлэн, касти на дэлас жызня о Бэнг. О Исусо вся када терэлас, важ кода кай лэса сас о Дэл.
39 Амэ диқлям вся, со во стердя машкар и евреёря пэ кадэла краёря и андо Иерусалимо. Лэс умардэ, кала казнисардэ* по столбо*.
40 Но по трито дес о Дэл жундярдя лэс и дя тэ диқэн лэс —
41 най всаворэ́ манушэнди, ай кати кодэлэнди, кас май данглал витидя: када амэ, ко халас и пэлас лэса, посли кода сар во жунделя.
42 Во приԥэндя амэнди тэ росԥэнас амарэ народости и тэ обиснисарас, кай када лэс о Дэл витидя тэ авэл лэ жундэнго и лэ мулэнго сындомари.
43 Всаворэ лэ Дэвлэстирэ особи мануша доԥэнэн, кай кажнонэсти, ко патял андэр лэстэ, простияпэ о бэзэх через лэско алав».
44 О Пётро инке дэлас дума, кала всаворэнди, ко ашунэлас о алав*, сас дино о свынто зор.
45 И ученикоря анда евреёря, савэ авелэ лэ Петроса, удивисайлэ, кай о Дэл дя* о свынто зор и лэ манушэнди анда авэр народо.
46 Важ кода кай вонэ ашунэнас, сар кадэла мануша дэн дума пэ разни шыба и ԥэнэн лашэ алава пала Дэл. Тоди о Пётро ԥэндя:
47 «Ко можэт тэ запретий тэ болдён андо паи кодэлэнди, касти, сар и амэнди, сас дино о свынто зор?»
48 И во ԥэндя, кай кажно, ко прижанэн лэ Исусос лэ Христос, тэ болдёл. Потом вонэ манглэ лэс тэ ашэлпэ лэндэ пэ дэсавэ деса.
Сноски
^ Ворта «цэнтурёно». Када сас барэдэр по отрядо андэ римско халавдия, андэ саво обычно сас 100 халавдэ.
^ Ворта «кагорта». Андэ кацаво баро отрядо сас най май бут чем 600 халавдэ.
^ Ворта «варикай в девять часов дня (сар вижыля о қам)».
^ Или «Со кацаво, ӷосподино?».
^ Ворта «варикай в шэсть часов (сар вижыля о қам)».
^ Или «най, мэрно ӷосподино».
^ Ворта «варикай в девять часов (сар вижыля о қам)».
^ Или «сэрэл».
^ Или «прилэл».
^ Или «стол бари патив пэр лэстэ».
^ Ворта «амбладэ».
^ Или «пэ витка».
^ Када о алав лэ Дэвлэстар.
^ Или «подарисардя».
