Дила 20:1-38
20 Кала о форо парашэля тэ ӷудий, о Павло ақардя лэ учениконэн, придя лэнди зор, попрощался лэнца и жыля андэ Македо́ния.
2 Во прожыля через кодэла краёря и фартэ подритярдя лэ катутнэ учениконэн, ай тоди авеля андэ Гре́цыя.
3 Котэ во сас трин шон и камля тэ рийпэ андэ Си́рия по кораблё, но, кала во уӷангля, кай и евреёря тидэнпэ лэс тэ умарэн, во приля решэния тэ жал через и Македо́ния.
4 Лэса андо дром сас о Сапа́тро, лэ Пироско шаво анда Ве́рия, о Ариста́рхо и о Секу́ндо анда Фесало́ники, о Га́ё анда Де́рвия, о Тимафеё, ай кадяжэ о Ти́хико и о Трафи́мо анда Азия*.
5 Вонэ вижылэ май рано и аштярэнас амэн андэ Траа́да.
6 Ай амэ посли лэ Преснонэ марнэско празнико отплывисардям анда Фили́пы и через панч дес авелям каринг лэндэ андэ Траа́да, кай самас семь деса.
7 Андо пэрво дес андо курко амэ стидямпэ вместе тэ хас. Пэ авэр дес о Павло трэбуй сас тэ жал андо дром, важ када во ԥэндя дума кодэлэнди, ко стидяпэ, и дэлас дума жы каринг и епаш рят.
8 Упрэ андэ комната, кай амэ стидямпэ, ԥабонас бут лампы.
9 Пока о Павло ԥэнэнас дума, ек тэрно мануш о Евти́хо, саво бэшэлас пэ фэлястра, састэс засутя и пэля па трито этажо. Кала каринг лэстэ пашэлэ, во ужэ сас муло.
10 О Павло змэкляпэ тэлэ, тэлеля каринг лэстэ, обля лэс и ԥэндя: «Не пережывайте, во жундо».
11 Тоди о Павло вазгляпэ упрэ, ԥагля о марно* и ля тэ хал. Во инке долӷо, жы каринг и тэсара, дэлас дума лэнца и потом жыля андо дром.
12 Ай лэ шаворэс андярдэ цэрэ, и всаворэ лошавэнас, кай во жундо.
13 Посли када амэ бэшлям по кораблё и отплывисардям андо А́со; котэ амэ трэбуй сас тэ залас лэ Павлос. Во екжэно када ԥэндя, важ кода кай закамля тэ жал интя пешком.
14 Андо А́со амэ лям лэс по кораблё и отплывисардям андэ Митиле́на.
15 Пэ авэр дес амэ отплывисардям котар и лаглям жы кай о Хио́со; через десэстэ амэ авелям по Само́со и инке через ек дес — андо Миле́то.
16 О Павло решыл тэ на тердёл андо Ефе́со, кай тэ на заритярдёл андэ Азия. Во грабияспэ, важ кода кай камля тэ попэрэл андо Иерусалимо каринг лэ Куртенго празнико.
17 Анда Миле́то во бишалдя манушэн андо Ефе́со, кай тэ ақарэн лэ ӷуртостирэ барэдэрэ ԥралэн.
18 Кала вонэ авелэ, во ԥэндя лэнди: «Тумэ драго ӷанэн, сар мэ андяравас пэс машкар тумэндэ лэ пэрвонэ десэстар, кала авелэм андэ Азия:
19 мэ тэлярдэ шэрэса и лэ ясвэнца теравас* лэ Барэ Хуластири дила и пэрэандяравас о ԥаримос лэ евреёнэндар, савэ камэнас ман тэ умарэн.
20 Мэ на парашавас тэ росԥэнав тумэнди пала вся, со андоп тумэнди лашымос, и тэ сытярав тумэн англа миро и па цэра.
21 Мэ састэс давас дума и ԥэнавас лэ евреёнэнди и лэ греконэнди тэ каинпэ, тэ бандён каринг о Дэл и тэ патян андэ амаро Баро Хулай о Исусо.
22 Ай акана о свынто зор андярэл ман андо Иерусалимо, и мэ жав интя, хоть и на ӷанав, со манца котэ авэла.
23 Мэ ӷанав ек: андэ кажно форо о свынто зор упалэ и упалэ сыкавэл манди, кай ман аштярэл баруно и ԥаримос.
24 Но мэрни жызня совсем най куч важ мандэ, мэ кати камав тэ домарав мэрно дром и тэ достерав и дила, сави манди дя о Баро Хулай о Исусо, — када тэ росԥэнав и лащи новость пала лэ Дэвлэско баро ковло ди.
25 Мэ ӷанав, кай всаворэ тумэ, касти мэ росԥэндэм пала Царство, будэр никала ман на диқэна.
26 Кочай адес мэ мангав тумэн тэ потвердин, кай пэр мандэ нинай дош ни андэ кастири смэрть*,
27 важ кода кай мэ на парашавас тэ ԥэнав тумэнди пала вся, со о Дэл камэл тэ стерэл*.
28 Диқэн пала пэстэ и пала вся о стадо, андэ саво о свынто зор стодя тумэн барэдэрэ ԥралэнца*. Кадя тумэ сможэте тэ пасын лэ Дэвлэско ӷурто, саво во тиндя пэстирэ Шавэстирэ ратэса.
29 Мэ ӷанав, кай, кала мэ ужаватар, тумэндэ авэна дыки рува, савэ на жалуина о стадо*,
30 и машкар тумэндэ появинапэ мануша, савэ пэрэбандярэна о чачимос, кай тэ ундярэн лэ учениконэн пала пэстэ.
31 Важ када авэн внимательни и на́ бистрэн, кай трин бэрш мэ о дес и рят на парашавас ясвэнца тэ сытярав кажнонэс андар тумэндэ.
32 Ай акана мэк тумэн фэрий о Дэл и о алав пала лэско баро ковло ди, саво можэт тэ придэл тумэнди зор и через саво тумэнди дорэсэлапэ кода, пала со во дя алав всаворэ свынтонэнди.
33 Мэ никала на мангавас пэсти руп, сомнак или ӥда.
34 И тумэ ӷанэн, кай мэ пэстирэ вастэнца затеравас по котор марно пэсти и мэрнэ амалэнди.
35 Пэстиря жызняса мэ сыкадэм тумэнди, кай трэбуй тэ на бэшэн би дилако, тэ поможын кодэлэнди, ко би зорэско, и тэ сэрэн, со ԥэндя о Баро Хулай о Исусо: „Май бари бах — тэ дэн, ай най тэ лэн“».
36 Посли кадэла алава во вместе всаворэнца терделя пэ чанга и мангляпэ.
37 Всаворэ динэ тэ ровэн и линэ тэ облэн и тэ чуминдэн лэ Павлос.
38 Со май фартэ лэнди сас ԥарэс лэстирэ алавэндар, кай вонэ будэр лэс на диқэна. Потом вонэ проандярдэ лэ Павлос по кораблё.
Сноски
^ Када сыкавэлас, кай можно тэ лэн тэ хан.
^ Или «служысаравас сар рабо».
^ Или «мэ вужо всаворэндирэ ратэстар».
^ Или «пала вся лэ Дэвлэстири время».
^ Греч. епи́скапас.
^ Или «на лэна анда ди тэ заботинпэ пала стадо».
