Дила 6:1-15
6 Лэ учениконэн ашэлас май бут и май бут. Андэ кодэя время и евреёря, савэ дэнас дума пэ греческо шыб, линэ тэ ровэнпэ пэ евреёря, савэ дэнас дума пэ еврейско шыб, важ кода кай лэндирэ ԥивлян обделинас, кала кажно дес роздэнас о хамос.
2 Тоди и 12 апосталоря стидэ́ всаворэ учениконэн и ԥэндэ: «Авэла неправильно, если амэ парашаса тэ росԥэнас о алав лэ Дэвлэстар* и ласа тэ роздас о хамос.
3 Важ када, ԥрала, витидэн семь муршэн, савэнди исин патяимос, савэнди дино о свынто зор и савэ годявэрнэ, и амэ пэрэдаса лэнди кадэя важно дила.
4 Ай амэ ласа май бут время тэ отдас, кай тэ мангаспэ и тэ росԥэнас аврэнди о алав лэ Дэвлэстар*».
5 Всаворэнди чалеля кадэва гиндо, и вонэ витидэ́ кацавэ манушэн. Када сас о Стефа́но, савэстэ сас састо патяимос и о свынто зор, о Фили́по, о Про́харо, о Никано́ро, о Тимо́но, о Парме́но, и о Никала́ё анда Антио́хия, саво приля иудейско вера.
6 Лэн андярдэ каринг и апосталоря, савэ манглэпэ и стодэ пэр лэндэ и вас.
7 О алав лэ Дэвлэстар ашундёлас май фартэ, лэ учениконэн андо Иерусалимо ашэлас май бут, и бут рашая прилинэ кадэя вера.
8 О Стефа́но, савэсти о Дэл дя пэско зор и савэс особено подритярэлас, терэлас машкар о миро барэ чудеса и удивительно дила.
9 Лэса линэ тэ споринпэ дэсавэ анда круӷо мануша, савэ варикала сас раборя, ай кадяжэ дэсавэ мануша, савэ жувэнас андэ Кире́на, Александри́я, Килики́я и Азия.
10 Но вонэ не моӷли тэ ԥэнэн варисо против лэско годявэрнимос и против о свынто зор, савэстар во дэлас дума.
11 Тоди вонэ подмардэ лэ манушэн тэ ԥэнэн: «Амэ ашундям, сар во найпативалэс дэлас дума пала Маисеё и пала Дэл».
12 Вонэ звазглэ против лэстэ лэ народос, лэ барэдэрэн и лэ закониконэн; лэс астардэ и андярдэ андо Ӷлавно иудейско сындо*.
13 Вонэ ақардэ хохавнэ манушэн, савэ ԥэндэ пэр лэстэ: «Кадэва мануш вся и время найпативалэс дэл дума пала лэ Дэвлэстири қандири и пала законо.
14 Например, амэ ашундям, сар во ԥэнэнас, кай о Исусо анда Назаре́то розмарэла кадэя қандири и парувэла о законо, саво пэрэдя амэнди о Маисеё».
15 Всаворэ андо Ӷлавно иудейско сындо диқэнас, кай лэ Стефаноско муй сас спокойно, сар анӷелостэ.
Сноски
^ Или «тэ сытярас лэ Дэвлэстирэ алавэсти».
^ Или «тэ сытярас аврэн лэ Дэвлэстирэ алавэсти».
^ Ворта «Синедрёно».
