Ефесо 5:1-33
5 Ни акэ, лэн примеро лэ Дэвлэстар, важ кода кай тумэ лэстирэ любими бэяцэ,
2 и любин кадя жэ, сар любияс о Христос. Во полюбисардя амэн и муля пала амэндэ, кала андя пэс лэ Дэвлэсти сар жэртва, савятар драго қандэл.
3 Дажэ на́ прошон о алав пала билажавардимос, мэлали и чорымасти дила, важ кода кай када на прижал лэ свынтонэнди,
4 ай кадяжэ ритярдён май дур кодэлэстар, кай тэ андярэн пэс найпативалэс, тэ дэн дума пала дилимос и тэ терэн абисавэ ԥэряса — дурён всаворэстар, со билажавардо. Фэдэр блаӷодарин лэ Дэвлэс.
5 Тумэ ӷанэн и драго полэн, кай, ко терэл билажавардимос и андярэл мэлали жызня и ко чорымаско, ай када еқэндар кодэлэса, кай тэ тэлён аврэ дэвлэнди, — лэнди нисо на дорэсэлапэ андэ лэ Христоско и лэ Дэвлэско Царство.
6 На́ дэн тэ обдилярэн тумэн евутня думаса, важ кода кай о Дэл спушэла лэ найкандинэ миростар важ кацави дила.
7 Кочай мэк на́ авэл тумэндэ нисави дила лэнца.
8 Варикала тумэ сас андэ тэмнота, ай акана тумэ тала свето, важ кода кай тумэ прижан лэ Барэ Хуласти. Андярэн пэс сар лэ светостирэ бэяцэ.
9 Кадэва свето поможый тэ терэн лашымос, тэ андярэн пэс правильно и тэ андярэн и чачуни жызня.
10 Вся и время старыинпэ тэ полэн, со уӷодно лэ Барэ Хуласти,
11 и будэр на́ ӷулен андэ евутни дила, сави жал ла тэмнотатар, ай наоборот, сыкавэн, сави вой па чачимастэ.
12 Важ кода кай пала дила, сави и мануша терэн чоралэс, лажаво дажэ тэ дас дума.
13 Акана вся, со сас гарадо, лэл тэ дицол тала свето, и вся, со дицэля, — када о свето.
14 Важ када сас ԥэндо: «Прошувпэ, суто, жундюв, и лэ Христостар дэладап пэр тутэ о свето».
15 Ни акэ, драго диқэн пала пэстэ и андярэн пэс най сар дилэ, ай сар годявэрнэ.
16 Тратин пэстири время со май фэдэр, важ кода кай андэ кадэла деса терэлпэ бут найлашымос.
17 Кочай на́ андярэн пэс найгодявэрнэс, но стон зор, кай тэ полэн, со уӷодно лэ Иеговасти*.
18 И на́ упэнпэ ягаляса*, состар лэн тэ андярэн пэс билажавардэс, но терэн вся, кай тумэндэ тэ авэл май бут свынто зор.
19 Кай тэ дэн зор ек еқэсти, дилабэн стихонэнца, андярэн лашо алав по Дэл и дилабэн дэвликунэ диля. Дилабэн лэ Иеговасти анда вся ди и драго дэн дума пала лэстэ.
20 Вся и время важ и вся блаӷодарин амарэ Дэвлэс и Дадэс через о Баро Хулай о Исусо Христос.
21 Кандэн ек еқэс через и бари патив каринг о Христос.
22 Мэк и жувля кандэн пэстирэ муршэн, сар лэ Барэ Хулас,
23 важ кода кай о мурш — хулай пэстиря жувляти, сар и о Христос — хулай лэ ӷуртости*, саво спасый кадэя тила.
24 И сар о ӷурто кандэл лэ Христос, кадя и жувля мэк андэ вся кандэн пэстирэ муршэн.
25 Мурша, любин пэстирэ жувлян, сар и о Христос полюбисардя о ӷурто и отдя пэстири жызня пала лэстэ.
26 Во стердя када и, ԥэнэса паеса, вихаладя лэс через о алав лэ Дэвлэстар, кай о ӷурто тэ ашэл свынто.
27 Кадя о ӷурто ашэля англа лэстэ андэ вся шукарно, найвимақло, найизморщимэ и бидошако, ай кадяжэ свынто и идеально.
28 Кадя и мурша трэбуй тэ любин пэстирэ жувлян, сар корко пэс. Ко любий пэстиря хулая́, во любий корко пэс.
29 Важ кода кай нико на вэрыцый пэстири тила, но, наоборот, праварэл и драго диқэл пала латэ, сар и о Христос диқэл пала ӷурто,
30 важ кода кай амэ — лэстиря тилатирэ части.
31 «Важ када о мурш ашавэла лэ дадэс и ла да и вся и время авэла пэстиря хулаяса, и дуй мануша ашэна сар ек».
32 Кадэя свынто тайна па чачимастэ ашунгли. Мэ росԥэнав пала Христос и пала ӷурто.
33 Ни акэ, мэк кажно любий пэстиря хулая́, сар корко пэс, ай и хулаи трэбуй тэ стол бари патив пэ пэско хулай.
