Иаково 1:1-27
1 Мэ, о Иа́ково, лэ Дэвлэско рабо и лэ Барэ Хуласко лэ Исусоско лэ Христоско рабо, пистросарав кодэлэнди, ко анда 12 коленоря, савэ росшутэ па люма.
Дорови!
2 Ԥрала, лошавэн, кала прижалпэ тэ виритярэн разно ԥаримос и бида,
3 важ кода кай тумэ ӷанэн, кай тумаро састо патяимос* поможый тумэнди тэ авэн састэ андэ ԥари время.
4 И мэк кода, кай тумэ ашэнпэ састэ андэ ԥари время, поможый тумэнди всаворэсти тэ сытён, кай тэ ашэн идеальни и бидошатирэ андэ вся, и тэ на авэл пэр тумэндэ нисави дош.
5 Если варикасти андар тумэндэ трэбуй тэ ашэл май годявэр*, мэк мангэл када лэ Дэвлэстар, саво дэл* всаворэнди анда ди и никас пала када на лажаварэл*, и кацавэ манушэсти авэла дино.
6 Но тэ мангэн трэбуй патяимаса, и андэ вся тэ допатян, важ кода кай кодэва, ко на допатял, шолпэ пэ волна андэ моря, савя даравэл и балвал и шувидэл то андэ ек риг, то андэ авэр.
7 Мэк кацаво мануш дажэ на́ гиндой, кай лэсти варисо дорэсэлапэ лэ Иеговастар*.
8 Во дарано* мануш, саво найсасто пэстирэ алавэсти, и када дицол андэ вся, со во терэл.
9 Мэк о чороро ԥрал лошавэл* кодэлэсти, кай о Дэл стодя пэр лэстэ патив,
10 ай о барвало — кодэлэсти, кай во сытеля тэ авэл найабуримаско, важ кода кай лэс будэр на авэла, сар ла малятирэ цвиткос.
11 Кала ваздэлпэ о қам и вишутярэл и растения, лако цвитко опэрэл, и тоди вой хасарэл пэско шукаримос. Кадя жэ авэла и лэ барвалэса: лэс будэр на авэла, пока во ӷонийпэ пала ловэ.
12 Бахтало о мануш, саво састэс пэрэандярэл и ԥари время, важ кода кай, кала во виритярэла о ԥаримос, о Иегова подария лэсти жызня*, пала сави во дя обещания кодэлэнди, ко лэс любий.
13 Андэ ԥари время мэк нико на́ ԥэнэн: «Кадэва ԥаримос мандэ лэ Дэвлэстар», важ кода кай нико не можэт тэ заставий лэ Дэвлэс тэ стерэл найлашымос, и во никас на подмарэл тэ стерэл варисо вэрыто.
14 Но кажно терэл пэсти май ԥарэс, кала лэско ди цырдэлпэ каринг кода, со камэл, и обдилярэл* лэс.
15 Посли кода сар оди закамля варисо*, када анэн* каринг о бэзэх, ай о бэзэх, саво стердо, анэн каринг и смэрть.
16 На́ дилярэн корко пэс, мэрнэ кучутнэ ԥрала.
17 Всаворэ лашэ и идеальни подаркоря — упрал, лэн дэл о Дад, саво создал о свето по небо и саво на парудёл, сар парудёл и тень.
18 Во закамля и дя амэнди жызня через чачуно алав, кай амэ тэ ашас пэрви избрани, кас во витидя анда кода, со создал.
19 Мэрнэ кучутнэ ԥрала, на́ бистрэн, кай кажно трэбуй тэ авэл ӷотово тэ ашунэн и тэ на грабийпэ тэ дэл дума и тэ на грабийпэ тэ холявэл,
20 важ кода кай через и холи о мануш на терэл и правильно дила, сави уӷодно лэ Дэвлэсти.
21 Кочай схалавэн пар пэстэ вся о мэлалимос и ашавэн вся о найлашымос, саво инке исин андэ тумаро ди. Ковлэ одеса прилэн о алав лэ Дэвлэстар и домэкэн, кай во, сар корнё, тэ ашэл инке май састо андэ тумаро ди, важ кода кай через лэстэ тумэ можэте тэ спасынпэ.
22 Най кати ашунэн о алав лэ Дэвлэстар, но и терэн кадя, сар во ԥэнэн. Если тумэ лэна кати тэ ашунэн, тоди тумэ дилярэна корко пэс хохавнэ гиндонэнца.
23 Важ кода кай если варико ашунэл о алав, но на терэл кадя, сар ашунэл, во шолпэ по мануш, саво роздиқэл пэс андэ юнглинда:
24 во диқэл пэр пэстэ, оджал и сразу жэ бистрэл, сар во выӷлядит.
25 Но ко внимательно диқэл андо идеально законо, саво анэн свобода, и ритярэл лэс, тоди во на бистрэл кода, со ашунэл, ай жувэл кадя, сар уӷанэн. Кала во кадя терэл, во авэла бахтало.
26 Если варико гиндой, кай андярэл лэ Дэвлэстири время, но на зритярэл* пэстири шыб, во дилярэл корко пэс*. Тоди кодэлэстар, со во терэл важ о Дэл, нинай нисаво толко.
27 Акэ сар трэбуй тэ андярэн амарэ Дадэстири, лэ Дэвлэстири, кай важ лэстэ када тэ авэл вужэс и наймэлалэс: трэбуй тэ заботинпэ пала бэяцэ, савэндэ нинай дад, и пала ԥивля, савэ попэлинэ андэ бида, и тэ на замэлярдён андэ кадэла люматири дила.
Сноски
^ Или «патяимос, саво дицэля пэ дила».
^ Или «на хутилэл годявэрнимос».
^ Или «делийпэ».
^ Или «никасти на шол када пэ яқа».
^ Или «нерешытельно».
^ Ворта «путёл».
^ Ворта «жызня сар винко».
^ Или «астарэл».
^ Ворта «кала можэт тэ заԥирэл».
^ Ворта «арақавэл».
^ Или «на опсытярэл».
^ Ворта «пэско ди».
