Иаково 5:1-20
5 Акана ашунэн тумэ, барвалэ: ровэн и ӷолосын, кай тумэн аштярэл бида.
2 Тумаро барвалимос стернеля, и тумари ӥда похаля и моль.
3 Тумаро сомнак и о руп похаля и ржавчина, и вой доԥэнэна тумари дош и похала тумари тила. Андэ послидни деса кода, со тумэ стидэ́, ашэла сар яг.
4 Кода, кай тумэ на потинэн лэ бутярнэнди, савэ стидэн о урожаё пэ тумарэ маля, дожыля жы каринг о Дэл, и о Иегова*, лэ халавдэнго Дэл, ашундя, сар вонэ цыпин пала помощь.
5 Тумэ жувэнас барвалэс и терэнас кадя, сар камэлас тумаро ди. Тумэ виправардэ пэс* пэ кодэва дес, кала зашынэн лэ скотос.
6 Тумэ сындосардэ и умардэ лэ правильнонэ манушэс. Хэба во на жал против тумэндэ?
7 Ԥрала, на́ парашэн тэ тэрпин, пока на рияпэ о Баро Хулай. Кодэва, ко залэлпэ ла ԥувьяса, аштярэл кучутно урожаё, саво дэл и ԥув, и би грабимаско доаштярдёл, кала залэнапэ и пэрви и послидни брышында.
8 И тумэ старыинпэ тэ тэрпин. Ашэнпэ састэ андэ ԥари время*, важ кода кай пашэля о дес, кала рияпэ о Баро Хулай.
9 Ԥрала, на́ ровэнпэ* ек пэ ек, кай тэ на сындон тумэн. О сындомари тердёл паша вудара.
10 Ԥрала, погиндон пала лэ Дэвлэстирэ особи мануша, савэ дэнас дума лэ Иеговастирэ алавэстар, и лэн лэндар примеро, сар тэ пэрэандярэн и ԥари время и тэ тэрпин.
11 Па амарятэ бахталэ* кодэла, ко вся виритярдя. Тумэ ашундэ, сар о Иово ашэляпэ састо андэ ԥари время и сар о Иегова лэс блаӷословисардя. Када сыкадя, сар дэ фартэ о Иегова любий амэн* и пэскати во дэ одяло.
12 Само ӷлавно, ԥрала, парашэн тэ солахан — по небо, пэ ԥув или пэ варисо авэр. Но мэк тумаро «да» авэл «да», ай тумаро «най» — «най», кай тумэндар тэ на спушэн по сындо.
13 Исин варикастэ андар тумэндэ исин ԥаримос? Мэк мангэлпэ. Варико радуийпэ? Мэк дилабэл диля.
14 Варико андар тумэндэ занасвайля? Мэк ақарэл лэ барэдэрэ ԥралэн анда ӷурто и мэк вонэ мангэнпэ пала лэстэ и мақэн лэсти по шэро о вулей важ лэ Иеговаско алав.
15 Тоди и молитва, сави ԥэнэн патяимаса, исцэлия кодэлэс, ко насвало*, и о Иегова ваздэла лэс. Ай если во стердя бэзэх, тоди о Дэл простия лэс.
16 Важ када на́ гаравэн ек еқэстар о бэзэх и мангэнпэ ек пала ек, кай тэ исцэлинпэ. Кала анда вся ди мангэлпэ о правильно мануш, тоди кай кацави молитва исин баро зор.
17 О Илья сас кацаво жэ мануш, сар и амэ*, но, кала во анда ди мангляпэ, кай тэ на авэл брышын, о брышын пэ кодэла краёря на жалас трин епашэса бэрш.
18 Ай кала во упалэ мангляпэ, жыля брышын, ай и ԥув дя урожаё.
19 Ԥрала, если варико андар тумэндэ змардёла па чачуно дром, ай авэр лэс рия палпалэ,
20 тоди ӷанэн: кодэва, ко поможыя лэ бэзэхэстирэ манушэсти тэ ашавэл о неправильно дром, спасыя лэс ла смэртятар, и о Дэл простия кадэлэ бэзэхэстирэ манушэсти бут бэзэха.
Сноски
^ Ворта «пэско ди».
^ Или «састярэн пэско ди».
^ Или «на́ быныин». Ворта «на́ пэрэԥурдэнпэ».
^ Или «блаӷословлёни».
^ Или «кай о Иегова глаба пала амэндэ».
^ Или, можэт, «цыено».
^ Или «кай о Илья по ди сас кода жэ, со и амэндэ».
