Иоано 12:1-50
12 Важ и шов дес жы каринг и Патради о Исусо авеля андэ Вифа́ния, кай жувэлас о Ла́зарё, савэс во жундярдя.
2 Котэ вечером важ о Исусо стодэ мисяйля. И Ма́рфа столас и подэлас, ай о Ла́зарё бэшэлас лэ мироса пала столо.
3 И Мария ля и бутылочка, андэ сави сас ароматно вулей*, фартэ кучутно вужо нардо. Вой вишутя лэс пэ пэрнэ лэ Исусости и виқосля лэн пэстирэ балэнца. И па вся цэр ля тэ қандэл о вулей.
4 Но о Иу́да Искарио́то, ек анда лэ Исусостирэ ученикоря, саво ӷэт май интя придя* лэс, ԥэндя:
5 «Хэба на авелоп фэдэр тэ битинэн кадэва вулей важ и 300 дина́рии* и тэ роздэн и ловэ лэ чорорэнди?»
6 Но па чачимастэ во на гиндояс пала чорорэ, ай ԥэндя кадя важ кода, кай сас чордэӷари. Во ԥиравэлас о ящичко важ и ловэ и чорэлас котар.
7 Тоди о Исусо ԥэндя: «На́ ӷуль латэ, дэ лати тэ стерэл вся, со трэбуй, кай мэрни тила тэ авэл ӷотово каринг о дес, кала ман притидэна.
8 Важ кода кай и чорорэ вся и время авэна паша тумэндэ, ай мэ — най вся и время».
9 Бут иудеёря уӷанглэ, кай сас о Исусо, и авелэ интя тэ диқэн най кати лэ Исусос, но и лэ Лазарёс, савэс во жундярдя.
10 Тоди и барэ рашая сԥэнделэ тэ умарэн и лэ Лазарёс,
11 важ кода кай через лэстэ чимало иудеёря, савэ авелэ интя, патяе андо Исусо.
12 Пэ авэр дес фартэ бут миро, саво авеля по празнико, ашундя, кай о Исусо жал андо Иерусалимо.
13 Кадэла мануша линэ пальмови виточки и вижылэ каринг лэстэ. Вонэ ӷромко ԥэнэнас: «Спасысар лэс, мангас тут! Бахтало* кодэва, ко жал лэ Иеговастирэ* алавэстар, лэ Израилёско царё!»
14 Ай о Исусо виарақля тэрнорэ ишакос и бэшля пэр лэстэ, сар пала када сас пистромэ андэ Свынти Лила:
15 «На́ дар, лэ Сионостири щей. Акэ жал тиро царё. Во ладэл по ишачко».
16 Спэрва лэстирэ ученикоря на полинэ када, но, кала о Исусо ашэля ашунгло, лэнди дя по гиндо, кай вся ашэля точно кадя, сар пала лэстэ сас пистромэ.
17 И мануша, савэ диқэнас, сар во ԥэндя лэ Лазарёсти тэ вижал анда моӷилка и жундярдя лэс, на парашэнас тэ дэн дума пала када.
18 Бут мануша ашундэ пала чуда, сави во стердя, кочай и вижылэ тэ диқэн лэс.
19 Ай и фарисеёря ԥэнэнас ек еқэсти: «Диқэн, амэндэ нисо на вижал. Вся и люма жал пала лэстэ!»
20 Машкар кодэла, ко авеля по празнико, кай тэ зындярэл лэ Дэвлэстири время*, сас и грекоря.
21 Вонэ поджылэ каринг о Фили́по, саво сас анда галилейско Вифсаи́да, и линэ тэ мангэн лэс: «Амэ камлоп тэ диқас лэ Исусос».
22 О Фили́по жыля и ԥэндя пала када лэ Андриёсти, ай тоди вонэ лэдуй жылэ и росԥэндэ пала када лэ Исусости.
23 О Исусо ԥэндя лэнди: «Поджыля и время, кай лэ манушэско Шаво тэ ашэл ашунгло.
24 Чаче ԥэнав тумэнди: если о зэрно на пэрэла андэ ԥув и на хындёла, во кадя и ашэлапэ ек, ай если хындёла, тоди дэла баро урожаё.
25 Ко любий пэстири жызня, во римой ла, ай ко андэ кадэя люма вэрыцый пэстири жызня, во фэрия ла важ и вечно жызня.
26 Ко камэл тэ поможый манди, мэк ԥирэл пала мандэ. Кай авава мэ, котэ авэла и мэрно помошнико. Ко лэла тэ поможый манди, пэр лэстэ о Дад стола патив.
27 Манди кадя ԥарэс по ди. Со мэ тэ ԥэнав? Дадэ, фэрисар ман кадэла времятар*. Но авря ригатар, важ кадэя время мэ и авелэм.
28 Дадэ, стер ашунгло тиро алав». Тоди па небо ашунделя ӷолосо: «Мэ стердэм тэ авэл ашунгло и инке стерава».
29 И мануша, савэ тердёнас котэ, ԥэнэнас, кай када сас ӷромо. Ай варико доԥэнэнас: «Лэса дэлас дума о анӷело».
30 О Исусо ԥэндя: «Кадэва ӷолосо сас най важ мандэ, ай важ тумэндэ.
31 Акана жал о сындо пэ кадэя люма, и кадэла люмако правителё авэла видарадо.
32 Ай мэ пашарава каринг пэстэ само разнонэ манушэн, кала ман ваздэна понад и ԥув».
33 Кадэлэ алавэнца о Исусо дя тэ полэн, сар во мэрэла.
34 Тоди и мануша ԥэндэ лэсти: «Андо законо пистромэ, кай о Христос лэла тэ жувэл вечно. Васо тоди ту ԥэнэс, кай лэ манушэстирэ Шавэс трэбуй тэ ваздэн понад и ԥув? Ко кадэва лэ манушэско Шаво?»
35 О Исусо ԥэндя лэнди: «О свето авэла тумэнца инке набут. Ԥирэн, пока тумэндэ исин свето, кай тумэн тэ на нақавэл и тэмнота. Ко ԥирэл андэ тэмнота, во на ӷанэн, каринг жал.
36 Пока тумэндэ исин свето, патян андэ кадэва свето, кай тэ ашэн лэ светостирэ шавэ».
О Исусо, кала ԥэндя кадэла алава, ужылятар и гараделя лэндар.
37 И хоть во стердя англа лэндэ кадя бут чудеса, вонэ на патянас андэр лэстэ.
38 Вся ашэля кадя, сар ԥэндя лэ Дэвлэско особо мануш о Иса́я: «Иегова, ко патяя кодэлэсти, со ашундя амэндар? И касти о Иегова сыкадя пэско зор*?»
39 Вонэ не моӷли тэ патян, важ кода кай о Иса́я кадяжэ ԥэндя:
40 «Мэ корадэм лэнди и яқа и стердэм лэнго ди тэ авэл баруно, кай вонэ тэ на диқэн лэ яқэнца, тэ на полэн лэ одеса и тэ на парудён и кай мэ тэ на исцэлисарав лэн».
41 О Иса́я ԥэндя кадэла алава, важ кода кай диқля, пэскати дэ ашунгло о Христос. Во дэлас дума пала лэстэ.
42 Авря ригатар, дажэ бут иудейски барэдэра патяе андэр лэстэ, но через и фарисеёря на прижанэнас када англа всаворэ, кай лэн тэ на видаравэн анда синагога.
43 Важ лэндэ май куч сас тэ затерэн лашо алав англа миро, чем тэ уӷодин лэ Дэвлэсти.
44 О Исусо ӷромко ԥэндя: «Ко патял андэр мандэ, во патял най кати андэр мандэ, но и андэ кодэва, ко бишалдя ман.
45 И ко диқэл ман, во диқэл и кодэлэс, ко бишалдя ман.
46 Мэ авелэм андэ люма тэ светисарав, кай кажно, ко патял андэр мандэ, тэ на ашэлпэ андэ тэмнота.
47 Мэ на спушав кодэлэндар, ко ашунэл мэрнэ алава, но на терэл, сар мэ ԥэнав, важ кода кай мэ авелэм най тэ спушав ла люматар, ай тэ спасысарав ла.
48 Пэ кодэла, ко отшол ман и на приашундёл каринг мэрнэ алава, исин сындомари. О алав, саво мэ ԥэнавас, — во ашэла лэнго сындомари андо послиднё дес.
49 Важ кода кай мэ давас дума най корко пэстар. О Дад, саво ман бишалдя, ԥэндя манди, пала со тэ дав дума и сости тэ сытярав.
50 И мэ ӷанав, кай лэстирэ алава дэн вечно жызня. Кочай кода, со мэ ԥэнав, мэ ԥэнав точно кадя, сар ԥэндя манди о Дад».
Сноски
^ Или «тидэласпэ тэ здэл».
^ Или «блаӷословлёно».
^ Или «тэ полэл лэ Дэвлэс».
^ Ворта «кадэлэ часостар».
^ Ворта «вас».
