Иоано 20:1-31
20 Андо пэрво дес андо курко, рано тэсара, кала инке на вазгляпэ о қам, и Мария Магдали́на авеля каринг и моӷилка и додиқля, кай о бар, савэса и моӷилка сас ԥандади, ужэ отстодо андэ риг.
2 Вой прастая каринг о Си́мано Пётро и каринг о ученико, саво сас куч* лэ Исусости, и ԥэндя лэнди: «Лэ Барэ Хулас залинэ анда моӷилка, и амэ на ӷанас, каринг лэс стодэ».
3 Тоди о Пётро и авэр ученико грабисайлэ каринг и моӷилка.
4 Спэрва вонэ прастае вместе, но авэр ученико прастая май ӥто лэ Петростар и пэрво очутисайля паша моӷилка.
5 Во задиқля андэ моӷилка и додиқля, кай котэ пашлёлас лёново котор кирпа, но на зажыля андрэ.
6 Пала лэстэ припрастая и о Си́мано Пётро. Во зажыля андрэ и тожэ додиқля котэ котор кирпа.
7 О қосно, савэса обмотысардэ лэ Исусоско шэро, сас стидо и пашлёлас най ла кирпаса, ай аврэтэ.
8 Тоди андрэ зажыля и о ученико, саво пэрво очутисайля паша моӷилка. Во вся додиқля и патяя кодэлэсти, пала со вонэ ашундэ май данглал.
9 Но вонэ всаек на полэнас и алава анда Свынти Лила пала кода, кай о Исусо трэбуй тэ жундёл.
10 Посли када и ученикоря рисайлэ цэрэ.
11 Ай и Мария тердёлас паша моӷилка и ровэлас. Вся андэ ясвэндэ, вой задиқля андрэ
12 и додиқля, сар пэ кодэва ҭан, кай пашлёлас лэ Исусостири тила, бэшэн дуй анӷелоря андэ парни ӥда: ек котэ, кай сас о шэро, ай авэр — кай сас и пэрнэ.
13 Вонэ пушлэ латар: «Манушни, васо ту ровэс?» Вой ԥэндя: «Мэрнэ Барэ Хулас залинэ, и мэ на ӷанав, каринг лэс стодэ».
14 И тоди вой обдиқляпэ и додиқля, кай палал тердёл о Исусо, но вой на ӷатярдя, кай када во.
15 О Исусо пушля латар: «Манушни, васо ту ровэс? Кас ту родэс?» Вой погиндосардя, кай када садовнико, и ԥэндя лэсти: «Если када ту ундярдян лэстири тила, ԥэн манди, каринг ту ла стодян, и мэ залава ла».
16 Тоди о Исусо взвисайля: «Мариё!» Вой банделя каринг лэстэ и ԥэндя пэ еврейско шыб: «Равуни́!» (када пэрэандярдёл «учителё»).
17 О Исусо ԥэндя лати: «На́ ритярдюв пала мандэ, важ кода кай мэ инке на вазглэмпэ каринг о Дад. Жа каринг мэрнэ ԥрала и пэрэдэ лэнди мэрнэ алава: „Мэ ваздавпэ каринг мэрно Дад и тумаро Дад и каринг мэрно Дэл и тумаро Дэл“».
18 И Мария Магдали́на авеля каринг и ученикоря и ԥэндя: «Мэ диқлэм лэ Барэ Хулас!» — и пэрэдя лэнди лэстирэ алава.
19 Кодэва жэ дес, андо пэрво лэ куртеско дес, вечером, и ученикоря стидэ́пэ вместе и заԥандадэ всаворэ вудара через и дар англа иудеёря. И акэ, машкар лэндэ появисайля о Исусо и ԥэндя: «Лашымос тумэнди*!»
20 Во сыкадя лэнди пэстирэ вас и риг. Кала и ученикоря додиқлэ лэ Исусос, вонэ залошайлэ.
21 О Исусо инке еқвар ԥэндя: «Лашымос тумэнди*! Сар о Дад бишалдя ман, кадя и мэ бишалав тумэн».
22 Посли кадэла алава во ԥурдя пэр лэндэ и ԥэндя: «Прилэн о свынто зор.
23 Если тумэ простина варикасти о бэзэх, вижал, о Дэл простисардя лэс. Ай если на простина, вижал, о Дэл на простисардя лэс».
24 О Фама́, пэ саво ԥэнэнас Близнецо, ек анда 12, на сас лэнца, кала машкар лэндэ сыкаделя о Исусо.
25 И кала авэр ученикоря ԥэндэ лэсти: «Амэ диқлям лэ Барэ Хулас!» — во ԥэндя лэнди: «Кала диқава и ямы лэ карфяндар пэ лэстирэ вас и лавапэ наеса каринг лэндэ и кала лавапэ вастэса каринг лэстири риг, кати тоди патява».
26 Через восемь деса и ученикоря упалэ стидэ́пэ андо цэр, и лэнца сас о Фама́. Хоть и вудара сас ԥандадэ, о Исусо сыкаделя машкар лэндэ и ԥэндя: «Лашымос тумэнди*!»
27 Тоди во взвисайля каринг о Фама́: «Дик пэ мэрнэ вас и лэпэ наеса каринг лэндэ, лэпэ лэ вастэса каринг мэрни риг. Патя и ав састо андо патяимос».
28 О Фама́ ԥэндя лэсти: «Мэрно Баро Хулай и мэрно Дэл!»
29 О Исусо ԥэндя лэсти: «Ту патяян важ кода, кай диқлян ман? Бахтало кодэва, ко на диқля и всаек патял».
30 О Исусо стердя англа ученикоря и бут авэр чудеса, пала савэ най пистромэ катэ*.
31 Ай пала кадэла чудеса пистромэ, кай тумэ тэ патян: о Исусо — када Христос, лэ Дэвлэско Шаво, и, если тумэ патян, тэ авэл тумэндэ вечно жызня через лэско алав.
Сноски
^ Или «савэс любияс».
^ Ворта «тэ жувэн тумэ мирно».
^ Ворта «тэ жувэн тумэ мирно».
^ Ворта «тэ жувэн тумэ мирно».
^ Или «андэ кадэва лил».
