Иоано 8:12-59
8 12 О Исусо упалэ взвисайля каринг о народо: «Мэ — свето важ и люма. Ко ԥирэл пала мандэ, во никала на лэла тэ ԥирэл андэ тэмнота, — лэстэ авэла ла жызняко свето».
13 Пэ када и фарисеёря ԥэндэ лэсти: «Ту екжэно англа миро потвердис о алав пала пэстэ, важ када тирэ алава нисо на ашэн».
14 О Исусо ԥэндя лэнди: «Дажэ если мэ екжэно потвердисарав о алав пала пэстэ, андэ мэрнэ алава исин зор, важ кода кай мэ ӷанав, катар авелэм и каринг жав. Ай тумэ на ӷанэн, катар мэ авелэм и каринг жав.
15 Тумэ сындон па манушыкано гиндо — мэ жэ никас на сындосарав.
16 Ай если мэ и сындосарав, тоди мэрно сындо справедливо, важ кода кай мэ най екжэно, но манца о Дад, саво ман бишалдя.
17 Тай инке, андэ тумаро законо пистромэ: „Кодэлэсти, со потвердин дуй мануша, исин патяимос“.
18 Мэ екжэно потвердисарав о алав пала пэстэ, и о алав пала мандэ потвердий о Дад, саво ман бишалдя».
19 Тоди вонэ пушлэ лэстар: «Кай тиро Дад?» О Исусо ԥэндя: «Тумэ на ӷанэн ни ман, ни мэрнэ Дадэс. Тэ ӷанглоп тумэ ман, ӷанглоп и мэрнэ Дадэс».
20 Во ԥэнэнас кадэла алава, кала сытярэлас андэ қандири, андэ кодэя латири часть, кай сас и кувшыноря лэ ловэнца важ лэ Дэвлэстири дила. Но нико лэс на хутилдя, важ кода кай лэстири время инке на поджыля.
21 О Исусо упалэ ԥэндя лэнди: «Мэ ужав. Тумэ лэна тэ родэн ман, но всаек мэрэна андэ пэско бэзэх. Интя, каринг мэ жав, тумэ не сможэте тэ авэн».
22 Тоди и иудеёря линэ тэ пушэн: «Во со, тидэлпэ пэс тэ умарэл? Васо во ԥэнэн: „Интя, каринг мэ жав, тумэ не сможэте тэ авэн“?»
23 Инке во ԥэндя: «Тумэ катар, па ԥув, ай мэ авелэм па небо. Тумэ анда кадэя люма, ай мэ най анда кадэя люма.
24 Кочай мэ и ԥэндэм тумэнди, кай тумэ мэрэна андэ пэско бэзэх. Важ кода кай если тумэ на патяна, кай мэ кодэва, ко трэбуй сас тэ авэл, тоди тумэ мэрэна андэ пэско бэзэх».
25 Вонэ пушлэ лэстар: «Тоди ко ту?» О Исусо ԥэндя лэнди: «Состэ мэ вопще дав дума тумэнца?
26 Мэ моӷу инке бут со пала тумэндэ тэ ԥэнав, важ бутэстэ тумэн тэ сындосарав. Кодэва, ко бишалдя ман, ԥэнэн чачимос, и мэ ԥэнав ла люмати кода, со ашундэм лэстар».
27 Вонэ на полинэ, кай во ԥэнэнас лэнди пала Дад.
28 Инке о Исусо ԥэндя: «Кала тумэ ваздэна* лэ манушэстирэ Шавэс, тоди уӷанэна, кай када мэ и кай мэ нисо на терав корко пэстар. Мэ ԥэнав кати кода, сости сытярдя ман о Дад.
29 Кодэва, ко бишалдя ман, — манца. Во на ашадя ман екжэнэс, важ кода кай мэ вся и время терав кода, со лэсти уӷодно».
30 Кала во ԥэнэнас вся када, бут мануша патяе андэр лэстэ.
31 О Исусо ԥэндя кодэлэнди, ко патяя андэр лэстэ: «Если тумэ жувэн па мэрно законо*, тоди тумэ па чачимастэ андярэн мэрни время*,
32 и тумэ уӷанэна о чачимос, и о чачимос тумэн освободия».
33 Пэ када дэсавэ ԥэндэ: «Амэ лэ Авраамостирэ бэяцэ и никала на самас раборя. Васо ту ԥэнэс амэнди: „Ашэна свободни“?»
34 О Исусо ԥэндя лэнди: «Чаче ԥэнав тумэнди: кажно, ко терэл бэзэх, — лэ бэзэхэско рабо.
35 О рабо на ашэлпэ андо цэр пэ вся и время — пэ вся и время ашэлпэ о шаво.
36 Если о Шаво тумэн освободия, тумэ авэна па чачимастэ свободни.
37 Мэ ӷанав, кай тумэ лэ Авраамостирэ бэяцэ. Но тумэ камэн ман тэ умарэн, важ кода кай на приашундён каринг мэрнэ алава.
38 Мэ ԥэнав пала кода, со диқлэм, кала сымас мэрнэ Дадэса, ай тумэ терэн кода, сости сытелэ пэстирэ дадэстар».
39 Пэ када вонэ ԥэндэ лэсти: «Амаро дад — о Авраамо». Но о Исусо ԥэндя лэнди: «Тэ авелоп тумэ лэ Авраамостирэ бэяцэ, тоди андярдоп пэс сар о Авраамо.
40 Но тумэ камэн тэ умарэн ман — кодэлэс, ко ԥэндя тумэнди чачимос, саво ашундя лэ Дэвлэстар. О Авраамо кадя на терэлас.
41 Тумэ терэн сар тумаро дад». Вонэ ԥэндэ лэсти: «Амэ закони* бэяцэ, амэндэ ек Дад — о Дэл».
42 О Исусо ԥэндя лэнди: «Тэ авелоп о Дэл тумаро Дад, тумэ любисардоп ман, важ кода кай мэ авелэм лэ Дэвлэстар и акана мэ катэ. Мэ авелэм най корко пэстар — во бишалдя ман.
43 Васо тумэ нащи полэн кода, со мэ ԥэнав? Важ кода кай тумэ на камэн* тэ ашунэн мэрнэ алава.
44 Тумаро дад — о Бэнг, и тумэн цырдэл тэ терэн кода, со камэл тумаро дад. Во ля тэ одлэл и жызня кодэла времятар, сар звазгляпэ, и отшутя о чачимос, важ кода кай андэ лэско ди нинай о чачимос. Кала во хохавэл, во терэл кадя, сар лэсти прижал, важ кода кай во хохавно и лэ хохаимаско дад.
45 Ай мэ ԥэнав чачимос, кочай тумэ манди и на патян.
46 Ко андар тумэндэ дошалярэла ман андо бэзэх? Ай если мэ ԥэнав чачимос, васо тумэ манди на патян?
47 Кодэва, ко лэ Дэвлэстар, ашунэл и алава лэ Дэвлэстар. Ай тумэ най лэ Дэвлэстар, кочай и на ашунэн».
48 Пэ када и иудеёря ԥэндэ лэсти: «Хэба амэ най чаче ԥэнас, кай ту самаритя́нино и андэр тутэ о найвужо?»
49 О Исусо ԥэндя лэнди: «Андэр мандэ нинай о найвужо. Мэ став патив пэ мэрно Дад, ай тумэ ман ӷиткон.
50 Но мэ на старысавав тэ затерав пэсти ашунгло алав — исин кодэва, ко камэл, кай мэ тэ ашав ашунгло, и када во сындой.
51 Патян манди: кодэва, ко жувэл па мэрно законо*, никала на мэрэла».
52 И иудеёря ԥэндэ лэсти: «Акана амэ точно ӷанас, кай андэр тутэ о найвужо. О Авраамо муля, и лэ Дэвлэстирэ особи мануша тожэ, ай ту ԥэнэс: „Ко ритярэл мэрно законо, во никала на мэрэла“.
53 Ту со, май баро амарэ дадэстар лэ Авраамостар? Во муля, и лэ Дэвлэстирэ особи мануша мулинэ. Тоди ко ту кацаво?»
54 О Исусо ԥэндя лэнди: «Тэ старысайлоп мэ екжэно тэ затерав пэсти ашунгло алав, тоди кацаво ашунгло алав на ашэлоп нисо. Но мэ ашав ашунгло через мэрно Дад — через кодэва, кас тумэ прижанэн пэстирэ Дэвлэса
55 и кас всаек на ӷанэн. Ай мэ лэс ӷанав. Тэ ԥэндоп мэ, кай на ӷанав лэс, тоди мэ авелоп хохавно, сар тумэ. Но мэ лэс ӷанав и жував па лэско законо*.
56 Тумаро дад о Авраамо фартэ лошавэлас кодэлэсти, кай диқэла мэрно дес, и во диқля лэс и сас лошало».
57 И иудеёря ԥэндэ лэсти: «Тути нинай дажэ 50 бэрш, и ту диқлян лэ Авраамос?»
58 О Исусо ԥэндя лэнди: «Чаче ԥэнав тумэнди: мэ сымас, сар инке на арақаделя о Авраамо».
59 Тоди вонэ хутилдэ́ и бара тэ шувидэн андэр лэстэ, но во гараделя лэндар и ужыля анда қандири.
Сноски
^ Катэ и дума жал, кай тэ казнин по столбо.
^ Или «мэрнэ алава».
^ Или «мэрнэ ученикоря».
^ Или «не можэте».
^ Или «па мэрнэ алава».
^ Или «лэстирэ алава».
