Калосы 1:1-29
1 Мэ, о Павло, кас о Дэл витидя тэ авэл лэ Христоско лэ Исусоско апостало, и амаро ԥрал о Тимафеё.
2 Мэ пистросарав лэ свынтонэнди и лэ кандинэ ԥралэнди, лэ Христостирэ учениконэнди андэ Кало́сы.
Мэк о Дэл, амаро Дад, здиқэл пэр тумэндэ па пэско баро ковло ди и дэл мирно жызня.
3 Кала амэ мангаспэ пала тумэндэ, амэ вся и время блаӷодарисарас лэ Дэвлэс, амарэ Барэ Хуластирэ лэ Исусостирэ лэ Христостирэ Дадэс.
4 Амэ ашундям, кай тумэ патян андо Христос Исусо и кай тумэ любин всаворэ́ свынтонэн.
5 Тумэ терэн кадя, важ кода кай надеинпэ пэ блаӷословения, сави аштярэл тумэн по небо. Тумэ уӷанглэ пала када, кала ашундэ и чачунэ алава — и лащи новость.
6 Кадэя новость, сави дожыля каринг тумэндэ, анэн лашымос и ашундёл па вся и люма. Точно кадя жэ вой анэн лашымос и ашундёл машкар тумэндэ кодэла времятар, кала тумэ ашундэ, кай о Дэл здиқэл па пэско баро ковло ди, и уӷанглэ, сар када дицол па чачимастэ.
7 Тумэ уӷанглэ кадэя лащи новость, кала пала латэ росԥэндя амаро кучутно амал о Епафра́со, лэ Христоско кандино слуӷо, саво дэл зор тумэнди, пока нинай амэн.
8 Во кадяжэ росԥэндя амэнди, кай тумэ лэн май фартэ тэ любин через о свынто зор.
9 Акэ васо амэ кодэла времятар, сар ашундям пала када, на парашас тэ мангаспэ пала тумэндэ. Амэ мангас Дэвлэс, кай тумэ правильно тэ уӷанэн лэстири время, па чачимастэ тэ годявэн и тэ полэн кода, со дэвликуно.
10 Тоди тумэ сможэте тэ андярэн пэс, сар прижал лэ Иеговастирэ* помошниконэнди, и кадя тэ уӷодин лэсти андэ вся, кала терэн и лащи дила и инке май драго уӷанэн лэс.
11 Мэк о Дэл, савэстэ исин баро зор, састярэл тумэн, кай тумэ тэ тэрпин и тэ лошавэн, кала вся виритярэн.
12 Блаӷодарин лэ Дадэс, кай через лэстэ тумэ ашэлэ достойни и акана тумэнди можэт тэ дорэсэлпэ кода, пала со во дя алав лэ свынтонэнди, савэндэ исин свето.
13 Во спасысардя амэн, кай пар мэндэ тэ на хулаий и тэмнота, и пэрэандярдя андэ пэстирэ любимонэ Шавэско царство.
14 Через лэстэ, кала во потиндя и цэмин пэстиря жызняса, амэ ашэлям свободни и о Дэл простисардя амэнди о бэзэх.
15 Во — копия лэ Дэвлэстири, саво на дицол, и во пэрво анда вся, со сас создано.
16 Во поможыяс, кай тэ авэл создано вся авэр по небо и пэ ԥув, со дицол и на дицол: царёря, хула́я, правителя и барэдэра. Вся авэр появисайля через лэстэ и важ лэстэ.
17 Во сас инке жы каринг кода, сар тэ появийпэ вся авэр, и вся авэр ляпэ лэстирэ зорэса.
18 И во — хулай пэ тила, сави сыкавэл лэ Дэвлэско ӷурто*. Лэстар вся заляпэ, во — пэрво, ко сас жундярдо, кай тэ авэл пэрво андэ вся.
19 О Дэл закамля, кай о Христос андэ вся тэ авэл, сар во,
20 и во камля тэ примирийпэ всаворэнца, ко по небо и ко пэ ԥув, через лэ Христоско рат, саво муля по столбо.
21 Варикала тумэ сас дур лэ Дэвлэстар и сас лэстирэ вороӷоря, важ кода кай тумаро шэро сас замардо найлащя диласа.
22 Ай акана о Дэл примирисайля тумэнца и стердя када через лэ Христостири тила, саво муля. Кадя тумэ можэте тэ авэн свынти, найвимақлэ и бидошатирэ андэ лэстирэ яқа.
23 Кати тумэнди трэбуй вся и время тэ жувэн кадя, сар патян, састэс тэ тердён пэ када, тэ на змардён и тэ на парашэн тэ надеинпэ пэ кода, пала со уӷанглэ через и лащи новость, сави ашунделя па вся и люма. И манди, лэ Павлости, сас дино ла тэ росԥэнав.
24 Акана мэ лошавав кодэлэсти, кай мучисавав важ тумэндэ. Мэ пэрэандярав лэ Христостири бида, но инке най андэ вся мэ мучисайлэм важ лэстири тила, сави сыкавэл лэ Дэвлэско ӷурто.
25 Мэ ашэлэм кадэлэ ӷуртоско* помошнико, важ кода кай о Дэл дя манди тэ терав кадэя дила, кай тумэнди тэ авэл драго. Во ԥэндя манди тэ пристав вся о зор, кай тэ росԥэнав о алав лэстар.
26 Мэ сымас трэбуй тэ росԥэнав пала свынто тайна. Вой сас згаради инке андэ дэлмутни время, и пала латэ на ӷанэнас о миро, саво варикала жувэлас. Ай акана о Дэл дя тэ ӷанэн пала латэ лэ свынтонэнди.
27 О Дэл закамля, кай авэр народоря тэ полэн и свынто тайна, сави исин бари блаӷословения*. Кадэя тайна — када кай лэ Христостэ ек гиндо тумэнца, кай тумэ надеинпэ тэ ашэн ашунглэ вместе лэса.
28 Амэ росԥэнас о алав пала лэстэ, кала поможысарас лэ манушэнди тэ ашэн годявэрнэ и сытярас лэн всаворэ́ годявэрнимаса. Кадя амэ стераса, кай кажно тэ тердёл англа Дэл сар дэвликуно мануш, саво андярэл лэ Христостири время.
29 Кай тэ домардював када, мэ терав и дила и пристав вся о зор. Мэ надеисавав пэ лэско баро зор, саво во манди дэл.
