Лука 16:1-31
16 Посли када о Исусо ԥэндя лэ учениконэнди: «Еқэ барвалэ манушэсти росԥэндэ, кай о слуӷо, саво диқэлас пала лэстири дила, розындярдя лэско мищимос.
2 Во ақардя лэс и ԥэндя: „Со мэ ашунав пала тутэ? Жа пистросар манди, сар ту тратисас мэрнэ ловэ, важ кода кай ту будэр на лэса тэ диқэс пала мэрно цэр“.
3 Тоди кодэва слуӷо погиндосардя: „Со мэ тэ терав? О хулай ман видаравэл. Тэ терав пэ мал най па мэрно зор, тэ жав тэ мангав ловэ лажаво.
4 О, ӷанав, со тэ стерав, кай и мануша тэ шон сама ман пэстэ цэрэ, кала ман видаравэна!“
5 Во ақардя лэ манушэн, савэ сас вужылэ лэстирэ хуласти, кай тэ подэл дума кажнонэса андар лэндэ, и пушля лэ пэрвонэстар: „Скати ту вужылэ мэрнэ хуласти?“
6 Кодэва мануш ԥэндя: „100 ба́торя* оливково вулей“. О слуӷо ԥэндя лэсти: „Акэ тири росписка. Бэш и май ӥто пистросар: 50“.
7 Потом во пушля аврэстар: „Ай ту скати вужылэ?“ Во ԥэндя: „100 ко́роря* пшэница“. О слуӷо ԥэндя лэсти: „Акэ тири росписка. Пистросар: 80“.
8 И о хулай похвалисардя лэ слуӷос, савэсти на сас патяимос, кай во годявэрнэс андярдя пэс. Важ кода кай кала и мануша андэ кадэя люма* терэн дила аврэнца, вонэ андярэн пэс май годявэрнэс, чем лэ Дэвлэстирэ мануша*.
9 Ԥэнав тумэнди: затерэн друӷонэн через кадэлэ найлашэ мироско барвалимос, кай потом, кала о барвалимос тумэндэ будэр на авэла, вонэ тэ мэкэн* тумэн андэ вечни цэра.
10 Касти исин патяимос андэ найбари дила, лэсти исин патяимос и андэ бари дила, ай касти нинай патяимос андэ найбари дила, лэсти нинай патяимос и андэ бари дила.
11 Ни акэ, если тумэнди нинай патяимос андэ кода, сар тумэ обжанпэ кадэлэ найлашэ миростирэ барвалимаса, ко дэла тумэнди о чачуно барвалимос?
12 И если тумэнди нинай патяимос андэ кода, сар тумэ обжанпэ кодэлэса, со на прижал тумэнди, тоди ко дэла тумэнди кода, со аштярэл тумэн?
13 Ни ек слуӷо не можэт тэ авэл рабо кай дуй хула́я, важ кода кай или еқэс вэрыцыя, ай аврэс любия, или еқэс кандэла, ай аврэс на шола сама. Тумэ не можэте тэ авэн лэ Дэвлэстирэ и лэ барвалимастирэ раборя».
14 Када ашундэ и фарисеёря, савэ здранас пала ловэ, и вонэ линэ лэстар тэ приасанпэ.
15 Но во ԥэндя лэнди: «Англа миро тумэ вистон пэс сар правильни мануша, но о Дэл ӷанэн, со тумэндэ андо ди. Кода, соса абурон и мануша, — гряца важ о Дэл.
16 О законо и кода, со пистронас лэ Дэвлэстирэ особи мануша, — вся када сас жы каринг о Иоа́но. Ай кодэла времятар сар во авеля, росԥэнэнпэ и лащи новость пала лэ Дэвлэско Царство, и само разни мануша пристон зор, кай тэ попэрэн андэ кадэва Царство.
17 Чаче, май ӥто парашэла тэ авэл о небо и ԥув, чем на ашэла кадя, сар ԥэнэн кажно алав* андо законо.
18 Ко розжалпэ пэстиря хулаяса и жэнийпэ пэ авэр, во придэл пэстиря хулая́*, и ко жэнийпэ пэ манушни, сави розжыляпэ пэстирэ хуласа, во ашэл дошало андо билажавардимос*.
19 Ек барвало мануш утидэласпэ андэ кучутни ӥда*, жувэлас барвалэс и кажно дес раюияс андэ пэско барвалимос.
20 Каринг лэстирэ вороты анэнас лэ чорорэс, савэс ақарэнас Лазарё и савэстэ вся и тила сас андэ чирки,
21 и во камэлас тэ чалёл кодэлэстар, со пэрэлас па лэ барвалэско столо. Ай и хорторя авэнас и лизинас лэстирэ чирки*.
22 Через дэсави время о чороро муля, ай и анӷелоря андярдэ лэс каринг о Авраамо*.
Муля и о барвало мануш, и лэс притидэ.
23 Андэ моӷилка*, кай во мучияспэ, во вазгля и яқа и додиқля дур лэ Авраамос, ай паша лэстэ* лэ Лазарёс.
24 Тоди во зацыписайля: „Дадэ Авраамо, здик пэр мандэ и бишал лэ Лазарёс, кай во тэ болэл о най андо паи и тэ шудрярэл мэрни шыб, важ кода кай мэ мучисавав андэ кадэя яг, сави марэл половняса“.
25 Но о Авраамо ԥэндя: „Мэрно шаво, на́ бистэр, кай ту раюисас ла жызняти, ай кай о Лазарё сас ԥари жызня. Акана лэсти катэ ашэл май вушэро, ай ту мучиспэ.
26 Тай инке машкар амэндэ и тумэндэ бари яма: кодэла, ко камэл тэ пэрэжал амэндар каринг тумэндэ, не моӷут када тэ стерэн, и тумэндар каринг амэндэ на пэрэжан“.
27 О барвало мануш ԥэндя: „Тоди мангав тут, дадэ, бишал лэс андо цэр кай мэрно дад.
28 Мандэ исин панч ԥрала, мэк во ԥэнэн лэнди, кай вонэ тэ на попэрэн кардэ и тэ на мучинпэ“.
29 Но о Авраамо ԥэндя: „Лэндэ исин о Маисеё и лэ Дэвлэстирэ особи мануша, мэк лэн ашунэн“.
30 Ай кодэва мануш ԥэндя: „Най, дад Авраамо, но вонэ каинапэ, если каринг лэндэ авэла варико анда мулэ“.
31 О Авраамо ԥэндя лэсти: „Если вонэ на ашунэн лэ Маисеёс и лэ Дэвлэстирэ особонэ манушэн, тоди, дажэ если варико анда мулэ жундёла, вонэ всаек на патяна“».
Сноски
^ Ворта «лэ светостирэ шавэ».
^ Или «тэ прилэн».
^ Ворта «ек ла букватири чёрточка».
^ Или «измений андо брако».
^ Или «измений андо брако».
^ Ворта «андэ пурпурно и лёново ӥда».
^ Ворта «ӷнойни шышки».
^ Ворта «каринг лэ Авраамоско колин».
^ Ворта «паша лэско колин».
