Лука 17:1-37
17 О Исусо ԥэндя лэ учениконэнди: «Вся и время лэла тэ появийпэ варисо, со подмарэл лэ манушэн каринг о бэзэх, но бида кодэлэсти, через кастэ када терэлпэ!
2 Важ лэстэ авелоп фэдэр, кай тэ амблавэн лэсти пэ кор баро бар и тэ шон лэс андэ моря, чем через лэстэ тэ стерэл бэзэх ек анда кадэла прости мануша*.
3 Диқэн пала пэстэ. Если тиро ԥрал стерэла бэзэх, мустрисар лэс и, если во каияпэ, простисар лэс.
4 Дажэ если во семь раз важ о дес стерэла бэзэх против тутэ и семь раз авэла каринг тутэ и ԥэнэна: „Мэ каисавав“, простисар лэс».
5 И апосталоря манглэ лэ Исусостар*: «Поможысар амэнди май фартэ тэ патяс*».
6 О Исусо* ԥэндя лэнди: «Тэ авелоп тумаро патяимос дажэ сар само цынёнё* зэрницо, тоди тумэ ԥэндоп кадэлэ тутовникости: „Вишындюв ку корнё и пэрэсадисар пэс андэ моря!“ — и во канглоп тумэн.
7 Ԥэнаса, варикастэ андар тумэндэ исин рабо, саво пахыий и ԥув или пасый лэ скотос. Ԥэнэна тумэ лэсти, кала во рияпэ па мал: „Май ӥто ав кардэ и бэш пала столо“?
8 Хэба тумэ на ԥэнэна лэсти: „Гитосар тэ хан, лэ пэр пэстэ и зависка и стов и подэ манди, пока мэ хав и пав, ай потом можэш тэ бэшэс и тэ хас и тэ пэс екжэно“?
9 Лэла о хулай тэ блаӷодарий пэстирэ рабос, кай во стердя кода, со трэбуй сас тэ стерэл?
10 Кадя и тумэ, кала стерэна вся, со тумэнди дино, ԥэнэн: „Амэ просто раборя и на затердям, кай пала амэндэ тэ ԥэнэн лашо алав. Амэ стердям кода, со трэбуй самас тэ стерас“».
11 Па дром андо Иерусалимо о Исусо прожалас понад ӷраница машкар Сама́рия и Галиле́я.
12 Кала во зажалас андэ ек гав, лэс додиқлэ дэш дералэ. Вонэ терделэ май дур
13 и зацыписайлэ: «Исусо, Учителё, здик пар мэндэ!»
14 Во додиқля лэн и ԥэндя: «Жан и сыкадён лэ рашанди». Вонэ жылэ и па дром исцэлисайлэ*.
15 Ек андар лэндэ додиқля, кай исцэлисайля, рисайля каринг о Исусо и ӷромко ԥэнэнас лашо алав пала Дэл.
16 Во пэля каринг лэ Исусостирэ пэрнэ и ля тэ блаӷодарий лэс. Кадэва мануш сас самаритя́нино.
17 О Исусо пушля: «Хэба най всаворэ дэш исцэлисайлэ? Ай кай инке девять?
18 Чаче кати кадэва найевреё рисайля, кай тэ ԥэнэн лашо алав пала Дэл, и будэр нико?»
19 Посли када во ԥэндя лэсти: «Ущи и жа. Ту патяян, и када тут исцэлисардя*».
20 И фарисеёря пушлэ лэстар, кала залэла тэ правий лэ Дэвлэско Царство, и во ԥэндя лэнди: «Най сразу дицола, кай лэ Дэвлэско Царство лэл тэ правий,
21 и о миро на ԥэнэна: „Диқэн, во катэ!“ или „Во котэ!“ Важ кода кай лэ Дэвлэско Царство машкар тумэндэ».
22 Тоди во ԥэндя лэ учениконэнди: «Авэла время, кала тумэ закамэна тэ диқэн лэ манушэстирэ Шавэско ек дес, но на диқэна.
23 И мануша ԥэнэна тумэнди: „Диқэн, во котэ!“ или „Во катэ!“ На́ вижан и на́ прастэн пала лэндэ.
24 Важ кода кай лэ манушэско Шаво андэ пэско дес авэла сар молния, через сави, кала вой дэлдап, ашэл свитло па вся небо*.
25 Но спэрва во трэбуй тэ пэрэандярэл бут ԥаримос и бида, и лэстар трэбуй тэ отԥэндёл кадэла времяко миро.
26 Сар сас тоди, кала жувэлас о Ноё, кацаво терэлапэ и кала авэла лэ манушэско Шаво:
27 и мануша ханас и пэнас, жэнинаспэ и жанас миростэ жы каринг кодэва дес, кала о Ноё зажыля андо ковчеӷо и упрал дя о паи и потасадя лэн всаворэн.
28 Кадя жэ сас и тоди, кала жувэлас о Ло́то: о миро халас и пэлас, тинэлас и битинэлас, садияс и строияс,
29 но андэ кодэва дес, кала о Ло́то вижыля анда Садо́мо, па небо брышындэса динэ яганэ бара и поумардэ лэн всаворэн.
30 Кадя авэла и андэ кодэва дес, кала сыкадёла* лэ манушэско Шаво.
31 Если андэ кодэва дес варико авэла пэ крыша, во на трэбуй тэ змэкэлпэ андо цэр пала мищимос, и, если варико авэла пэ мал, во на трэбуй тэ рийпэ каринг кода, со ашадя.
32 На́ бистрэн пала лэ Лотостири хулаи.
33 Ко старыийпэ тэ фэрий пэстири жызня, во хасарэла ла, ай ко хасарэла пэстири жызня, во ла фэрия.
34 Ԥэнав тумэнди: андэ кодэя рят дуй мануша совэна андэ ек ҭан: еқэс залэна, ай аврэс ашавэна.
35 Дуй манушня мэлина пэ ек мэльница: еқа залэна, ай авря ашавэна».
36 ——*
37 Вонэ пушлэ лэстар: «Кай када трэбуй тэ авэл, Учителё*?» Во ԥэндя: «Кай авэла и тила, котэ стидэнапэ и орлоря».
Сноски
^ Ворта «кадэла цынёне».
^ Или «лэ Барэ Хуластар».
^ Или «дэ амэнди май бут патяимос».
^ Или «Баро Хулай».
^ Ворта «ӷарчишно».
^ Или «ашэлэ вужэ».
^ Или «Тиро патяимос исцэлисардя тут».
^ Ворта «па небо еқэ краёстар жы кай авэр краё».
^ Или «ԥэрнадёла».
^ Или «Баро Хулай».
