Лука 18:1-43
18 О Исусо росԥэндя лэнди примеро пала кода, кай трэбуй вся и время тэ мангэнпэ и тэ на умэкэн и вас:
2 «Андэ ек форо сас сындомари, саво на даралас лэ Дэвлэстар и на столас патив пэ мануша.
3 Андэ кодэва жэ форо жувэлас ԥивли, сави вся и время авэлас каринг лэстэ и ԥэнэнас: „Поможысар манди тэ домардював, кай справедливо тэ розлэн и дила кодэлэса, каса мандэ споро“.
4 Дэсави время во лати отԥэнэнас, но потом погиндосардя: „Мэ на дарав лэ Дэвлэстар и на став патив пэ мануша,
5 но кадэя ԥивли вся и время вихал манди оди. Важ када поможысарава лати, кай вой будэр тэ на авэл каринг мандэ и тэ на вистол манди оди“».
6 Посли када о Исусо* взвисайля: «Диқэн, со ԥэндя кадэва несправедливо* сындомари?
7 Тоди хэба о Дэл на виандярэла справедливо сындо важ кодэла, кас во витидя, — ко о дес и рят взвийпэ каринг лэстэ, — пока во тэрпий ради лэндэ?
8 Ԥэнав тумэнди: во ӥто виандярэла важ лэндэ справедливо сындо. Но кала лэ манушэско Шаво авэла, додиқэла во, кай варико пэ ԥув кадя тэ патял*?»
9 Ай важ кодэла, ко патялас, кай вся терэл правильно, и ни пэр кастэ на столас патив, во росԥэндя кацаво примеро:
10 «Дуй мануша зажылэ андэ қандири тэ мангэнпэ: ек фарисеё, ай авэр мануш анда налоӷово.
11 О фарисеё мангэласпэ андо гиндо кадя: „Мэрно Дэл, блаӷодарисарав тут важ кода, кай мэ най кацаво, сар авэр мануша, савэ вимарэн и ловэ, на терэн правильно, придэн пэстирэ хулаян — или сар кадэва анда налоӷово.
12 Мэ ритярав о посто дувар андо курко, отдав и десято часть анда вся, со мандэ исин“.
13 Ай о мануш анда налоӷово тердёлас май дур и дажэ на ваздэлас и яқа каринг о небо. Во кати марэлас пэс андо колин и ԥэнэнас: „Мэрно Дэл, ав одяло каринг мандэ, каринг бэзэхэско мануш“.
14 Ԥэнав тумэнди: кала кадэва мануш жыля цэрэ, андэ лэ Дэвлэстирэ яқа во сас май правильно, чем о фарисеё. Важ кода кай кодэва, ко путёл, авэла лажавардо, ай пэ кодэва, ко найабуримаско, стона патив».
15 И мануша анэнас каринг о Исусо ԥарнэндирэ бэятонэн, кай во тэ лэлпэ каринг лэндэ*. Кала и ученикоря додиқлэ када, вонэ линэ тэ цыпин пэр лэндэ*.
16 Но во мангля тэ анэн каринг лэстэ лэ цынёне бэятонэн и ԥэндя: «Мэк и бэяцэ авэн каринг мандэ. На́ запретин лэнди, важ кода кай лэ Дэвлэско Царство прижал кацавэнди, сар вонэ.
17 Чаче ԥэнав тумэнди: ко на прилэла лэ Дэвлэско Царство сар бэято, во на попэрэла интя».
18 Ек баро мануш пушля лэстар: «Лашо Учителё, со мэ тэ стерав, кай мандэ тэ авэл вечно жызня?»
19 О Исусо ԥэндя лэсти: «Васо ту взвиспэ каринг мандэ Лашо Учителё? Вся, со лашо, жал кати лэ Дэвлэстар.
20 Ту жэ ӷанэс о законо: на́ придэ лэ хулас или ла хулая*, на́ умар, на́ чор, на́ хохав пэ авэр, стов патив по дад и пэ дэй».
21 Кодэва мануш ԥэндя лэсти: «Вся када мэ терав жы анда тэрнорэ бэрша».
22 Кала о Исусо ашундя када, во ԥэндя лэсти: «Исин ек со тути на хутилэл: битин вся, со тутэ исин, и роздэ и ловэ лэ чорорэнди, и тутэ авэла барвалимос по небо. Ай потом ав и ԥир пала мандэ».
23 Кала во ашундя кадэла алава, лэсти ашэля фартэ ԥарэс, важ кода кай лэстэ сас бут барвалимос.
24 О Исусо диқля пэр лэстэ и ԥэндя: «Сар дэ ԥарэс авэла лэ барвалэнди тэ попэрэн андэ лэ Дэвлэско Царство!
25 Май вушэро лэ верблюдости тэ прожал через ла сувьяко каноро, чем лэ барвалэсти тэ попэрэл андэ лэ Дэвлэско Царство».
26 Кодэла, ко када ашундя, пушлэ: «Ай ко тоди можэт тэ спасыйпэ?»
27 Во ԥэндя: «Кода, со невозможно важ и мануша, возможно важ о Дэл».
28 Тоди о Пётро ԥэндя: «Ай амэ? Амэ ашадям вся, со амэндэ сас, и лям тэ ԥирас пала тутэ».
29 Во ԥэндя лэнди: «Чаче ԥэнав тумэнди: кажнонэсти, ко ашадя о цэр, или ла хулая́, или лэ ԥралэн, или лэ родителёнэн, или лэ бэятонэн важ лэ Дэвлэско Царство,
30 дорэсэлапэ акана пэбутэстэ май бут, ай май англэ* — и вечно жызня».
31 Посли када во одындярдя андэ риг лэ 12 апосталонэн и ԥэндя лэнди: «Амэ жас андо Иерусалимо, и вся ашэла кадя, сар пистросардэ пала лэ манушэско Шаво лэ Дэвлэстирэ особи мануша.
32 Лэс отдэна андэ вас лэ манушэнди анда авэр народоря, лэстар лэна тэ асанпэ, андар лэстэ лэна тэ издеваюца и лэна тэ шунгардэн пэр лэстэ.
33 Лэс лэна тэ марэн ла чукняса, ай потом умарэна, но по трито дес во жундёла».
34 Но вонэ нисо на полинэ, о смысло кадэлэ алавэнди сас гарадо лэндар.
35 Кала о Исусо поджалас каринг о Ерихо́но, паша дром бэшэлас ек коро мануш и мангэлас ловэ.
36 Кала во ашундя, кай мимо жал бут миро, во ля тэ пушэл, со терэлпэ.
37 Лэсти ԥэндэ: «Када жал о назаретя́нино Исусо!»
38 Тоди во зацыписайля: «Исусо, лэ Давидоско Шаво, здик пэр мандэ!»
39 Кодэла, ко жалас англал, линэ тэ заставин лэс тэ ашэл мулком, но во цыпияс инке май фартэ: «Лэ Давидоско Шаво, здик пэр мандэ!»
40 О Исусо терделя и ԥэндя тэ подындярэн каринг лэстэ кадэлэ манушэс. Кала во поджыля, о Исусо пушля лэстар:
41 «Со мэ важ тутэ тэ стерав?» Кодэва мануш ԥэндя: «Баро Хулай, стер кадя, кай мэ тэ диқав».
42 О Исусо ԥэндя лэсти: «Акана ту лэса тэ диқэс! Ту патяян, и када тут исцэлисардя*».
43 Во сразу ля тэ диқэл, жыля пала лэстэ и драго дэлас дума пала Дэл. И всаворэ, ко када диқля, ԥэнэнас лашо алав пала Дэл.
Сноски
^ Или «Баро Хулай».
^ Или «неправильно».
^ Или «виарақэла во кацаво патяимос пэ ԥув».
^ Или «тэ блаӷословий лэн».
^ Катэ и дума жал, кай и ученикоря цыпинас пэ лэ бэятонэндирэ родителя.
^ Или «на́ изменисар андо брако».
^ Или «Тиро патяимос исцэлисардя тут».
