Марко 9:1-50
-
О Исусо парудёл англа ученикоря (1—13)
-
О Исусо исцэлий лэ бэятос, андэ саво о найвужо (14—29)
-
Важ кодэва, ко патял, вся возможно (23)
-
-
О Исусо упалэ ԥэнэн пала пэстири смэрть (30—32)
-
И ученикоря споринпэ, ко машкар лэндэ само ӷлавно (33—37)
-
«Ко най против амэндэ, во амэнца» (38—41)
-
Кода, со подмарэл каринг о бэзэх (42—48)
-
«Авэн сар лон» (49, 50)
9 О Исусо ԥэндя: «Чаче ԥэнав тумэнди: дэсавэ анда кодэла, ко тердёл катэ, на мэрэна, пока на диқэна лэ Дэвлэско Царство всаворэ́ лэстирэ зорэса».
2 Через шов дес о Исусо ля пэса лэ Петрос, лэ Иаковос и лэ Иоанос и андярдя лэн по вучо плай. Лэнца будэр нико на сас. Котэ вонэ додиқлэ, сар паруделя о Исусо*:
3 лэстири ӥда ашэля кацави парни, кай аж халас и яқа — кацави дэ парни ла на стердоп ни ек мануш пэ ԥув.
4 Кадяжэ англа лэндэ появисайлэ о Илья и о Маисеё, савэ линэ тэ дэн дума лэ Исусоса.
5 Тоди о Пётро ԥэндя лэ Исусости: «Учителё*, амэнди катэ кадя драго! Давай амэ стаса трин катуны: ек важ тутэ, ек важ о Маисеё и ек важ о Илья».
6 (Па чачимастэ о Пётро на полэлас, со тэ терэл, важ кода кай лэн шутя андэ дар.)
7 Посли када появисайля туча и ушарадя лэн, ай анда туча ашунделя ӷолосо: «Када мэрно любимо Шаво. Кандэн лэс».
8 Вонэ обдиқлэпэ и полинэ, кай паша лэндэ ужэ никас нинай — тердёлас ек о Исусо.
9 Кала вонэ змэкэнаспэ па плай, о Исусо приԥэндя лэнди никасти тэ на росԥэнэн пала кода, со вонэ диқлэ, пока лэ манушэско Шаво на жундёла.
10 Вонэ лэс канглэ*, но машкар пэстэ линэ тэ дэн дума, со во камля тэ ԥэнэн, кала ԥэндя пала кода, кай жундёла.
11 Вонэ пушлэ лэ Исусостар: «Васо и законикоря ԥэнэн, кай спэрва трэбуй тэ авэл о Илья?»
12 Во ԥэндя: «Чаче, спэрва трэбуй тэ авэл о Илья и тэ рий вся, сар сас. Но васо тоди пала лэ манушэско Шаво пистромэ, кай во трэбуй тэ пэрэандярэл бут ԥаримос и лажаимос?
13 Ԥэнав тумэнди, кай о Илья ужэ авеля, и андар лэстэ стердэ вся, со камлэ, сар пала лэстэ и сас пистромэ».
14 Кала вонэ рисайлэ каринг авэр ученикоря, вонэ додиқлэ, кай круӷом лэндэ тердёл бут миро лэ закониконэнца, савэ лэнца споринаспэ.
15 Кала и мануша додиқлэ лэ Исусос, вонэ фартэ удивисайлэ и прастае каринг лэстэ, кай тэ поздоровкиинпэ лэса.
16 Во пушля лэндар: «Пала со тумэ споринпэ?»
17 Ек мануш анда толпа ԥэндя лэсти: «Учителё, мэ андэм каринг тутэ пэстирэ шавэс, важ кода кай андэр лэстэ о найвужо, через саво во ашэля муто.
18 Кала во дэл пэ мэрно шаво, то шувидэл лэс пэ ԥув, и тоди кай о шаво марэл пена анда муй, во скрипий лэ дандэнца и ашэл би зорэско. Мэ манглэм тирэ учениконэн тэ видаравэн лэс, но лэндэ на вижыля».
19 О Исусо ԥэндя лэнди: «Неӷожо миро, савэстэ нинай патяимос! Скати инке мэ тэ авав тумэнца? Скати инке мэ тэ тэрписарав тумэн? Анэн лэс кардэ».
20 Вонэ андэ́ каринг лэстэ лэ бэятос. Но о найвужо, кала додиқля лэ Исусос, сразу жэ стердя кадя, кай лэ бэятостэ тэ залэлпэ судараӷа, и кодэва пэля и ля тэ катыийпэ па ԥув и тэ мэкэл пена анда муй.
21 О Исусо пушля лэстирэ дадэстар: «Дэлмут лэса кацаво терэлпэ?» О дад ԥэндя: «Жы бэятостар.
22 О найвужо часто шол лэс то андэ яг, то андо паи, кай тэ умарэл лэс. Если ту можэш варисо тэ стерэс, здик пар мэндэ и поможысар!»
23 О Исусо ԥэндя лэсти: «Ԥэнэс „если можэш“? Важ кодэва, ко патял, вся возможно».
24 Лэ бэятоско дад сразу ԥэндя: «Мэ патяв! Поможысар манди, кай мэрно патяимос тэ авэл май састо!»
25 Кала о Исусо додиқля, кай каринг лэндэ спрастэлпэ бут миро, во приԥэндя лэ найвужэсти: «Найвужо, лэ мутонэнго и лэ кашукэнго хулай, приԥэнав тути: вижа андар лэстэ и будэр на́ зажа!»
26 О найвужо зацыписайля, стердя, кай лэ бэятос тэ зболдэл через и судараӷа, и вижыля андар лэстэ. О шаворо пашлёлас сар муло, и бут ко ля тэ ԥэнэн: «Во муля!»
27 Но о Исусо ля лэс вастэстар, вазгля, и о бэято ущеля.
28 Кала о Исусо зажыля андо цэр и ашэляпэ екжэно лэ учениконэнца, вонэ пушлэ лэстар: «Васо амэндэ на вижыля лэс тэ видаравас?»
29 Во ԥэндя лэнди: «Кацавэ найвужэн можно тэ видаравэс кати молитваса».
30 Вонэ ужылэ котар и жылэ через и Галиле́я, но во на камля, кай варико пала када тэ уӷанэн,
31 важ кода кай во сытярэлас пэстирэ учениконэн. Во ԥэнэнас лэнди: «Лэ манушэстирэ Шавэс придэна и отдэна андэ вас лэ манушэнди. Вонэ лэс умарэна, но через трин дес во жундёла».
32 Но и ученикоря на полинэ кадэла алава, ай тэ пэрэпушэн лэстар даранас.
33 Вонэ авелэ андо Капернау́мо. Кала о Исусо сас андо цэр, во пушля лэндар: «Пала со тумэ споринаспэ па дром?»
34 Вонэ ашэнас мулком, важ кода кай па дром споринаспэ, ко андар лэндэ само ӷлавно.
35 Тоди во прибэшля, подақардя каринг пэстэ лэ 12 апосталонэн и ԥэндя лэнди: «Кодэва, ко камэл тэ авэл пэрво, трэбуй тэ ашэл послиднё и тэ авэл важ всаворэ слуӷо».
36 Потом о Исусо стодя англа лэндэ лэ бэятос, обля лэс и ԥэндя:
37 «Ко прилэл пэстэ кацавэ бэятос ради мандэ*, прилэл пэстэ и ман. Ай ко прилэл пэстэ ман, прилэл пэстэ най кати ман, но и кодэлэс, ко ман бишалдя».
38 О Иоа́но ԥэндя лэсти: «Учителё, амэ диқлям, сар ек мануш тирэ алавэстар видаравэл лэ найвужэн, и камлям лэс тэ тердярас, важ кода кай во на ԥирэл амэнца».
39 Но о Исусо ԥэндя: «На́ ӷулен лэстэ, важ кода кай если варико стерэла чуда мэрнэ алавэстар, во посли када на лэла сразу найдраго тэ дэл дума пала мандэ.
40 Ко най против амэндэ, во амэнца.
41 И кодэлэсти, ко дэла тумэнди стакано паи, важ кода кай тумэ прижан лэ Христости, — чаче ԥэнав тумэнди, — точно дорэсэлапэ лэстири блаӷословения*.
42 Ай если через варикастэ хасарэла пэско патяимос ек анда кадэла прости мануша*, савэ патян андэр мандэ, тоди авэла фэдэр лэсти пэ кор тэ амблавэн баро бар* и тэ шон лэс андэ моря.
43 Если тиро вас подмарэл тут каринг о бэзэх, отшын лэс. Фэдэр ту хасарэса о вас, но тутэ авэла жызня, чем дуе вастэнца попэрэса андэ гее́на, андэ вечно яг.
44 ——*
45 И если тиро пэрно подмарэл тут каринг о бэзэх, отшын лэс. Фэдэр ту хасарэса о пэрно, но тутэ авэла жызня, чем дуе пэрнэнца тут шона андэ гее́на.
46 ——*
47 И если тири як подмарэл тут каринг о бэзэх, вишын ла. Фэдэр ту хасарэса и як, но авэса андэ лэ Дэвлэско Царство, чем дуе яқэнца тут шона андэ гее́на,
48 кай и термэ на мэрэн и яг на мудардёл.
49 Важ кода кай кажно трэбуй тэ авэл лондярдо ягаса.
50 О лон — када драго, но, если во хасарэла пэско вкусо, сар упалэ стерэса лэс лондо? Авэн сар лон и старыинпэ тэ ладин ек еқэса».
Сноски
^ Или «лэ Исусостири стэма».
^ Ворта «рави́».
^ Или, можэт, «никасти на росԥэндэ; гарадэ кадэва секрето».
^ Ворта «мэрно алав».
^ Или «наӷрада».
^ Ворта «кадэла цынёне».
